Read Ыдыктыг Библия, 2011 Наум 3 Bible Online

Наум 3 - Ыдыктыг Библия, 2011 bible

Наум 3

¹Ханга борашкан хоорай ат болур! Ону меге болгаш өлүрүүшкүн долган-дыр, ында үптээшкин соксаар ужур чок-тур.

²Дыңнаңар! Кымчы дазылааны, дугуйлар даажы, дүрген маңнаан аъттар шимээни, дайынчы тергелерниң күштүг даажы дыңналып тур.

³Аъттыг шериг дүрген шапкан, хылыштар кылаңнашкан, чыдалар чайынналган! Өлүрткеннер эңдерик, мөчү-сөөктер овааланган, санаттынмас-даа. Улус өлүг мага-боттарга тептигип турар.

⁴Ол бүгү — Ниневияның эмге-тикчок самыыраашкыны дээш кеземче-дир. Ол дээрге аянныг чараш, илби-шидини билир, бодунуң самыыраашкыны-биле чоннарны чагырып аар, бодунуң илби-шидизи-биле аймактарны дуурайлап аар самыын херээжен-дир.

⁵«Мен сеңээ удур мен — деп, Аг-шериглиг Дээрги-Чаяакчы медеглээн, — Мен сээң хевиң эдээн арныңче өрү дүрүптер мен; чоннарга сээң шалдаңыңны, күрүнелерге — бужарыңны көргүзер мен.

⁶Чүдек-бужар чүүлдү сенче хөме октап, бак көөр мен, сени бүгү улус мурнунга бужартадыр тургузуптар мен.

⁷Сени көрген кижи бүрүзү сенден дезип: „Ниневия узуткаттырган-дыр, ооң ажыын ажып, кым ыглаарыл?“ — дээр. Сени аргалаар кижини Мен кайыын тывар мен?»

⁸Нил хемде турар, долгандыр суглар аккан Фивы хоорайдан [3] дээре деп сен бе? Хем ол хоорайны камгалап, суг ооң ханазы бооп турду.

⁹Эфиопия биле Египеттиң кедергей улуг күчү-күжүнге ол ооргаланып турду, фут биле ливий чоннар ооң эвилелчилери бооп турду.

¹⁰Ындыг-даа болза, ол база туттуруп алган, өскээр көжүрткен. Ооң чаш ажы-төлүн кудумчулар белдирлеринде чылча шаап, өлүрүп каан. Ооң алдар-аттыг кижилерин дайзыннар аразында үлешкеш, шуптузун илчирбелеп бектеп алган.

¹¹Ниневия, сен база ындыг дашканы ижер сен, чаштынып, дайзындан камгалал дилээр сен.

¹²Сээң бүгү шивээлериң чимизи бышкан фига ыяжынга дөмей апаар: ооң чимизин тө силгиптер болза, олар чиир дээн кижиниң аксынче дорт кире бээр.

¹³Бодуңнуң шерииңче көрүп көр — кадайларзыг улус-тур. Сээң чериңниң хаалгазы дайзыннарга аңгайтыр ажыттынар, а дээктерни от чиир.

¹⁴Бүзээлел үезинде ижер сугдан курлавырлай узуп ал. Дойдан хоюдуп, тууйбу кылырынга белеткенип ал. Шивээлериң быжыгла!

¹⁵Сени от сыырыптар, хылыш шанчып каар; шартылаага чирткен ышкаш болур сен. Шартылаа ышкаш өзүп-көвүдээн сен, шерги ышкаш өзүп-көвүдээн сен!

¹⁶Сээң садыгжыларың дээрде сылдыстардан хөй апарган-дыр, ынчалза-даа олар шартылаа ышкаш, эрги кежин солуп каапкаш, ужуп чоруй баар.

¹⁷Сээң дүжүметтериң имилеме шартылаа дег, сээң шериг баштыңнарың хээкчи мөөң шерги дег; олар соок үеде ханаларга хоруп орар, а хүн чылыдып кээрге, тарадыр ужа бээр, а кайнаар дээрзин кым-даа билбес.

¹⁸Ассирияның хааны, сээң томуйлаан чагырыкчыларың база дээди дүжүметтериң мөңге уйгуга алзыптар. Сээң чонуң дагларга тоо быдарай бээр, оларны чыыр кижи чок болур.

¹⁹Сээң балыың экиртинмес, сээң балыгланыышкының өлүмнүг. Сээң дугайыңда дыңнаан бүгү улус ол дээш адыш часкаар, чүге дээрге сээң соксаал чок каржы-дошкунуңну боду көрүп эртпээн кижи бар бе?!