Read Ыдыктыг Библия, 2011 Аввакум 1 Bible Online

Аввакум 1 - Ыдыктыг Библия, 2011 bible

Аввакум 1

¹Бурганның Аввакум медээчиге ажытканы өттүр билиишкин бо-дур.

²Дээрги-Чаяакчы, чежеге дээр дуза дилеп кыйгырар мен, а Сен мени дыңнавас-тыр сен, чежеге дээр күчүлел дээш хомудап, Сени кыйгырар мен, а Сен мени камгалавас-тыр сен.

³Кемниг үүлгедиглерже көөр кылдыр чүге мени албадаар сен? Базындырыышкынче чүге анаа көрүп турар сен? Үптээшкин биле күчүлелди көрүп тур мен, адаан-өжээн көдүрлүп, алгыш-кырыш кедереп тур.

⁴Ол бүгүнүң уржуу-биле хоойлу-даа күжүн чидирген, шын шииткел-даа шуут үндүрбестээн: бузуттуглар чөптүг-шынныг улусту бүзээлеп алган болгаш, хажыткан шииткел үндүрер-дир.

⁵«Чоннарда чүү болуп турарын топтап көрүңер — кайгап-харай бээр силер. Чүге дээрге улустан дыңнааш-даа, бүзүревейн баар чүүлүңер чурттап чоруур үеңерде бүде бээр.

⁶Көрүңер даан, Мен ам халдей чонну күштелдирер мен; ол дээрге бодунга хамаарышпас хоорай-суурларны эжелеп алыр дээш чер-делегей кезип чоруур, каржы-хажагай, хайжок чон болгай.

⁷Ол чон коргунчуг-даа, түрлүг-даа. Шииткел ол чондан үнер, күчү-күш-даа ооң холунда.

⁸Ооң аъттары ирбиштен-даа дүрген маңнаар, кежээ чимзенген бөрүлерден-даа шалыпкын; ооң аъттыг шерии халдып чоруп турар, аъттыг шеригжилери ырактан хөме келгеш, олчазын тевер дээн эзир дег шүүргедээр.

⁹Ол чоннуң шупту улузу күчүлел эккээр, ооң арын-шырайы өрттендир изидер хат дег [1], ол чон элезин дег хөй улусту тудуп алгаш баар.

¹⁰Ол чон өске чоннарның хааннарын дорамчылаар, баштыңнарын кочулаар, шупту шивээлерже шоодуп көөр — бүзээлел чалды оларга деңнештир оваалааш, ол шивээлерни эжелеп аар.

¹¹Оон ол чон хат ышкаш ужугуп, оруун уламчылаар. Шак ол бачыттыг улус бодунуң күжүн бурганчыдып турар [2]».

¹²Дээрги-Чаяакчы, ыдыктыг Бурганым, үе-дүптен бээр бар турган эвес ийик сен бе?! Сен өлбес сен! [3] Дээрги-Чаяакчы, Сен ол чонну шииткелиңни боттандырар кылдыр тургузуп кагдың. Мээң Хаям, Сен аңаа кеземчеңни күүседирин дагзып кагдың.

¹³Сээң арыг карактарыңга кемниг үүлгедиглерже көөрү таарышпас, улустуң базындырыышкынынче анаа көрүп шыдавас сен. А чүге-ле кара сагыштыг улусче анаа көрүп турар сен, бодундан чөптүг-шынныг кижини бузуттуг кижи сыыра бээрге, чүге ыыт чок хайгаарап турар сен?

¹⁴Чүге-ле Сен кижилерни далайның балыы дег, баштыңы чок соястаар амытаннар дег кылдыр кылып каан сен?

¹⁵Ол улусту шуптузун бузуттуг дайзын сыырткыыш-биле ушта тыртып, балык тудар четки-биле шүүреп ап турар, ынчангаш өөрүп-байырлаар.

¹⁶Четкилери аңаа бай-шыырак чурттап, эки-чаагай аъш-чем чиир арга бээр боорга, ол дайзын четкизинге өргүл салып, айдызап турар-дыр!

¹⁷Таанда-ла ол олчалыг четкизин божудуп, чоннарны хайыра чогу-биле үргүлчү узуткаар ужурлуг бе?