Read Ыдыктыг Библия, 2011 Захария 10 Bible Online

Захария 10 - Ыдыктыг Библия, 2011 bible

Захария 10

¹Чазын Дээрги-Чаяакчыдан чаъс дилеп, мөргүңер. Ол диңмирээшкин-кызаңнаажын чайыннадып, силерге суггур чаъс чагдырып бээр, кижи бүрүзүнге шөлге чемниг үнүш хайырлаар.

²Дүрзү-бурганнар хоозун чүве чугаалаар, караң көрнүрлер хей-куруг көстүүшкүннер көрүп, меге дүштерин чугаалаар; оларның аргалалы хей болур. Ынчангаш улус-чон хойлар дег тояап, кадарчызы чогундан түреп чоруур.

³«Чоннуң кадарчыларынче Мээң килеңим кыптыкты, улус-чоннуң хуналарын кезедир мен, чүге дээрге Аг-шериглиг Дээрги-Чаяакчы Мен Бодумнуң коданым — Иудеяның чонунче сагыш салып, ону көрүштүг дайынчы аъдым дег кылып аар мен.

⁴Иудеядан бажыңның таваанга салыр эң кол даш, чадырның өргени, дайылдажыр ча-согун — бүгү чагырыкчылар үнер.

⁵Олар шупту, тулчуушкун үезинде дайынчылар дег, дайзыннарын кудумчуда малгаш ышкаш таптай базар; олар дайылдажып, аъттыг шериглерни безин ажып-тиилээр, чүге дээрге Дээрги-Чаяакчы олар-биле кады болгай.

⁶Иуданың салгалын быжыглаар мен, Иосифтиң салгалын камгалаар мен. Оларны Мен чандырар мен, чүге дээрге кээргей бердим. Олар Меңээ кажан-даа кагдырбаан ышкаш боор. Оларның Бурганы Дээрги-Чаяакчы — Мен болгай мен, оларга харыы бээр мен.

⁷Израильчилер маадырлар дег боор, оларның чүректери арага ишкенде дег хөглүг апаар. Оларның ажы-төлү ол бүгүнү көргеш, өөрүүр, оларның чүректери Дээрги-Чаяакчыга хамааржыры дээш өөрүп-байырлаар.

⁸Мен оларже сыгырып имнээш, чыыптар мен; оларны хостап аар болгай мен, олар биеэде дег хөй санныг болур.

⁹Мен оларны өске чоннар аразынче тарадып каапкан-даа болзумза, олар Мени ырак чурттарга-даа сактып кээр. Олар-даа, ажы-төлү-даа дириг артып, чанып кээр.

¹⁰Чонумну египет черден чандыргаш, Ассириядан чыып алгаш, Галаад болгаш Ливанче эккээр мен — аңаа оларның шуптузун сыңырар чер чок болур.

¹¹Олар кызагдаашкын далайын кеже бээр, хайнып-мөөрээн далайны томаартып каар. Нил хемниң ээремнери кургап каар, турамык Ассирия куду көрдүрер, Египеттиң эрге-чагыргазының төнчүзү кээр.

¹²Мен чонумну Дээрги-Чаяакчы-биле харылзаазының ачызында быжыглап каар мен, олар Мээң адымга чагыртып, амыдыраар». Дээрги-Чаяакчының медеглээн чүвези ол-дур.