Read Ыдыктыг Библия, 2011 Захария 11 Bible Online

Захария 11 - Ыдыктыг Библия, 2011 bible

Захария 11

¹Ливан, хаалгаңны ажыт, от сээң пөштериңни чипсин!

²Чойган, ыглап-сыкта, чүге дээрге пөш кээп ушкан-дыр, улуг-чаагай ыяштар узуткаттынган-дыр. Васан черниң дубтары, ыглап-сыктаңар, чүге дээрге эрттинмес эзимни кыргып каапкан-дыр.

³Кадарчыларның ыы-сыызы дыңналып тур: оларның байлак-чаагай одар-белчиири узуткаттынган-дыр. Аныяк арзылаңнарның ырланган алгызы дыңналып тур: Иордан шынаазында оларның шыргайлары узуткаттынган-дыр.

⁴Мээң Бурганым Дээрги-Чаяакчы мынча дээн: «Дөгерер дээн кодан хойдан кадарып көр.

⁵Оларны садып алган улус буруузунмайн кыра шаап кааптар, а садыпкан улус: „Дээрги-Чаяакчыга алдар, мен байый бердим!“ — дээр; кадарчылар хойларын кээргевес.

⁶Мен база бо черниң чурттакчыларын моон соңгаар кээргевес мен — деп, Дээрги-Чаяакчы медеглээн. — Көр, Мен кижи бүрүзүн өске кижиниң база ооң хаанының холунга хүлээдир мен; олар черни хоозурадыр, а Мен оларның холундан кымны-даа адырбас мен».

⁷Мен дөгерер дээн хойларны хой садыглаар улуска кадарып берип турдум [23]. Ийи даянгыыш тудуп алгаш, бирээзин Буян деп, өскезин Эвилел деп адап алгаш, олар-биле хойларны кадарып эгеледим.

⁸Бир ай дургузунда өске үш кадарчыны узуткап каан мен. Ол садыгжылар [24] меңээ хөңнү чок апарган, мен база олардан хөңнүм кала берген.

⁹Ынчан мен: «Моон соңгаар силерге кадарчы болбас мен. Өлүр дээн хойлар өлү берзин, чок болур дээн хойлар чок болзун. Артып калганнары бот-боттарын чипсин» — дээн мен.

¹⁰Мен бодумнуң Буян деп даянгыыжымны тудуп алгаш, сыйып каапкаш, бүгү аймактар-биле чарган чагыг-керээмни күш чок болдурдум.

¹¹Чагыг-керээ ол хүн күш чок апарган. Мени хайгаарап көрүп турган хой садыгжылары [25] Дээрги-Чаяакчының ажыдып чугаалаан сөзү ындыг дээрзин билип алган.

¹²Мен оларга: «Күзээр болзуңарза, меңээ төлеңер, а күзевес болзуңарза, төлевеңер» — дээн мен. Олар меңээ үжен °шекел мөңгүн деңзилеп берди.

¹³Дээрги-Чаяакчы меңээ: «Ол акша-мөңгүннү дой сава кылыкчызынга октап бер! [26]» — диди. Оларның мени үнелээн бедик өртээ ыя ол ышкажыл! Мен үжен °шекел мөңгүннү алгаш, ону Бурганның өргээзинде дой сава кылыкчызынга октап берген мен.

¹⁴Оон мен Эвилел деп ийиги даянгыыжымны сыйып, Иудея биле Израильдиң аразында акы-дуңмалышкы харылзааны үзүп кааптым.

¹⁵Дээрги-Чаяакчы меңээ катап база мынча дээн: «Мелегей кадарчыга тааржыр херекселди ап ал.

¹⁶Чүге дээрге Мен бо чуртка бир чаа кадарчы бээр мен, ол кадарчы өлүр деп барган хойларже сагыш салбас, читкен хойларны дилевес, кемдээн хойларны эмневес, кадыктарын чемгербес, харын-даа семис хойларның эъдин чиир, оларның дуюгларын үзе тыртып кааптар.

¹⁷Кодан хоюн каапкаш баар чөгенчиг кадарчы ат болур! Хылыш ооң холунче шашсын, оң талакы караан дешсин! Ооң холу шуут кадып калзын, оң талакы караа шуут согурара берзин!»