Read Ыдыктыг Библия, 2011 Захария 3 Bible Online

Захария 3 - Ыдыктыг Библия, 2011 bible

Захария 3

¹Оон Дээрги-Чаяакчы меңээ Бодунуң төлээзиниң мурнунда турар дээди бараалгакчы Иисусту көргүстү. Ооң чанында ону буруудадырынга белен эрлик турду.

²Дээрги-Чаяакчы эрликке: «Дээрги-Чаяакчы сени чемелеп тур, эрлик! Иерусалимни шилип алган Дээрги-Чаяакчы сени чемелээр-дир! Ол кижи оттан ушта соп эккелген кезек дег-дир» — дээн.

³Хирлиг хептиг Иисус дээрниң төлээзиниң мурнунда турган.

⁴Дээрниң төлээзи Иисустуң мурнунда турар өске төлээлерге: «Ооң хирлиг хевин уштуп кааптыңар» — дээн. Оон Иисустуң бодунга: «Көр даан, Мен сээң кем-бурууңну уштуп кааптым, ам сеңээ байырлал хеви кедирип тур мен» — дээн.

⁵Мен [3] ынчан: «Ооң бажынга арыг тюрбан бөрттен кедирип кагзын» — дээн мен. Олар ооң бажынга арыг тюрбан кедиргеш, хепкерип кагды. А Дээрги-Чаяакчының төлээзи ооң чанында хевээр турду.

⁶Дээрги-Чаяакчының төлээзи Иисуска даалга берип, мынча диди:

⁷«Аг-шериглиг Дээрги-Чаяакчының чугаалаан чүвези бо-дур: бир эвес сен Мээң оруумну эдерип, Мээң дүрүмнеримни күүседир болзуңза, Мээң өргээмге башкарар эрге сенде болур, Мээң өргээмниң девискээрин сен хайгаараар сен. Ынчан мында турар төлээлерим дег, Менче хостуг кирер арганы сеңээ хайырлаар мен.

⁸Дээди бараалгакчы Иисус, сен база сеңээ башкарткан бараалгакчылар, эки келир үениң бадыткал демдээ болур улус, дыңнаңар: Мен Бодумнуң чалчамны — Өзүмнү [4] чорудуптар мен.

⁹Көрүңер, Иисустуң мурнунга бир дашты салып тур мен. Ол даш чеди кырлыг [5], Мен аңаа тускай бижик оя кезип каар мен — деп, Аг-шериглиг Дээрги-Чаяакчы медеглээн. — Бо черниң кем-буруузун чаңгыс хүн дургузунда чайладып кааптар мен.

¹⁰Ол хүн силер хувааглыг чериңерге виноградтыг, фига ыяштарлыг амыр-шөлээн амыдырап, бот-боттарыңар удур-дедир чаалажыр силер». Аг-шериглиг Дээрги-Чаяакчының медеглээн чүвези ол-дур.