Read Ыдыктыг Библия, 2011 Захария 6 Bible Online

Захария 6 - Ыдыктыг Библия, 2011 bible

Захария 6

¹Мен катап база топтап көргеш, ийи хүлер даг аразындан үнүп орар дөрт дайынчы терге эскерип кагдым.

²Бирги тергени шилги аъттар сөөртүп чорду, ийигизин — дас кара аъттар,

³үшкүзүн — ак аъттар, дөрткүзүн — ала-шокар, күштүг аъттар.

⁴Мен ынчан мээң-биле чугаалажып турган дээрниң төлээзинден: «Бо чүү деп чүвел, дээргим?» — деп айтырдым.

⁵Дээрниң төлээзи меңээ: «Олар дээрге бүгү чер-делегейниң Чагырыкчызының турар черинден үнүп келген дөрт хат-тыр [10].

⁶Дас кара аъттар соңгу чүкте чуртче [11] бар чыдары ол-дур, ак аъттар — оларның соо-биле [12], ала-шокар аъттар — мурнуу чүкче» — деп харыылады.

⁷Күштүг аъттар үнүп келгеш, чер-делегейни эргий халыксап, чүткүп турду. Дээрниң төлээзи: «Барып, чер-делегейни эргип кезиңер!» — дээрге, олар халдып чорупту.

⁸Ол ынчан дыңзыдыр: «Көр даан, соңгу чүкте чуртче халдып чорупкан аъттар ол черге Дээрги-Чаяакчының Сүлдезин оожургадып кагды» — диди.

⁹Дээрги-Чаяакчы меңээ Бодунуң сөзүн ажыткан:

¹⁰«Вавилонга туттуруушкундан ээп келген Хелдай, Товия болгаш Иедайя оларның белектерин ап ал. Ол-ла хүн Софонияның оглу Иосияның бажыңынче чорувут.

¹¹Алдын-мөңгүнден ап алгаш, оваадайдан кылгаш, Иоседектиң оглу, Бурганның дээди бараалгакчызы Иисустуң бажынга кедире салып каг.

¹²Аңаа Аг-шериглиг Дээрги-Чаяакчының чугаалаан чүвезин дамчыт: көр даан, Өзүм деп аттыг кижи бо-дур. Ооң өзүмү турар черинден өзүп үнгеш, Дээрги-Чаяакчының өргээзин тургузуп каар.

¹³Дээрги-Чаяакчының өргээзин ол тургузуп каар. Ол алдар-хүндүге бүргеттирер, Бодунуң дүжүлгезинге саадапкаш, чагырар. Ооң дүжүлгезиниң чанынга Бурганның бараалгакчызы турар [13], олар аразында эп-найыралдыг болур.

¹⁴А ол оваадай Хелдай [14], Товия, Иедайя болгаш Софонияның оглу Хен дугайында тураскаал демдек бооп, Дээрги-Чаяакчының өргээзинге артып калзын».

¹⁵Ыракта чурттап турар улус чедип келгеш, Дээрги-Чаяакчының өргээзин тударынга киржир, ынчан мени силерже Аг-шериглиг Дээрги-Чаяакчының чорутканын билип аар силер. Силерниң Бурганыңар Дээрги-Чаяакчының чугаалаан чүвезин чүткүлдүү-биле тооп дыңнаар болзуңарза, ол бүгү болдуна бээр.