Read Ыдыктыг Библия, 2011 Малахия 1 Bible Online

Малахия 1 - Ыдыктыг Библия, 2011 bible

Малахия 1

¹Өттүр билген медеглел. Дээрги-Чаяакчының израиль чонга Малахияны дамчыштыр ажыткан сөзү.

²Дээрги-Чаяакчы: «Мен силерге ынак мен» — деп чугаалады. А силер: «Сээң биске ынакшылың чүден көстүп турарыл?» — дээр-дир силер. «Иаков биле Исав ийистер эвес чүве бе? — деп, Дээрги-Чаяакчы харыылады. — Ындыг-даа болза, Иаковка ынак мен,

³а Исавка хөңнүм чок. Мен Исавтың даглыг чуртун [1] хоозурадып кагдым, ооң ээлээн черин ээн кургаг хову кылдыр хуулдуруп, шөө-бөрүлерге бериптим».

⁴Эдом чурттуглар: «Бис чылча шаптыртывыс, ынчалза-даа хоозураан чуртувусту катап тургузуп аар бис» — деп тургай аан. А Аг-шериглиг Дээрги-Чаяакчы: «Олар катап тудуп аар-даа болза, Мен үрегдеп каар мен. Оларның чуртун бузуттуг чер деп адаар, а боттарын Дээрги-Чаяакчының кезээ шагда килеңнээни чон деп адаар.

⁵Силер боттарыңар ону көрүп кааш: „Дээрги-Чаяакчы Израильдиң кызыгаарларындан дашкаар-даа өндүр бедик!“ [2] — деп чугаалаар силер» — диди.

⁶«Оглу адазын, а чалча кижи — дээргизин хүндүлээр. Бир эвес Мен Адаңар болзумза, Меңээ хүндүткелиңер кайыл? Бир эвес Мен Дээргиңер болзумза, чүге Мени хүндүлевес силер?» Бурганның адын баксырадып чоруур бараалгакчылар, Аг-шериглиг Дээрги-Чаяакчының силерге чугаалаан чүвези ол-дур. А силер: «Сээң адыңны канчаар баксыраттывыс?» — деп тур силер.

⁷«Силер Мээң өргүл салыр бедигээжимче бужартадып каан аъш-чем эккеп салыр-дыр силер». А силер: «Бис Сени чүнүң-биле бужартадып кагдывыс?» — деп тур силер. «Дээрги-Чаяакчыга өргүл салыр бедигээшти херекке албайн барып болур деп санаар-дыр силер.

⁸Өргүл кылыры-биле согур малдар эккээр-дир силер, ол кем-буруу эвес бе?! Аскак-бүскек, аарыг мал эккээр-дир силер, ол кем-буруу эвес бе?! Ындыг малды чагырыкчыга аппарып бээрин шенеп көр даан! Ол таарзынар деп бе, сенче ээ көрнүр деп бе?» Аг-шериглиг Дээрги-Чаяакчының чугаалаан чүвези ол-дур.

⁹«„Бурган чонувусту өршээр кылдыр, Аңаа чаннып, мөргүңер че“ — деп турар-дыр силер. Ынчалза-даа силерниң холуңардан ындыг өргүлдер кээп турда, Ол силерже ээ көрнүр деп бе?» Аг-шериглиг Дээрги-Чаяакчының чугаалаан чүвези ол-дур.

¹⁰«Силерниң кайы-бирээңер Бурганның өргээзиниң хаалгазын хаап каан болза эки боор. Ынчан Меңээ өргүл салыр бедигээшке хей черге от кывыскан херээ чок боор ийик. Силер Мээң сеткилимге кирбес-тир силер — деп, Аг-шериглиг Дээрги-Чаяакчы чугаалаан. — Мен силерниң холуңар салган өргүлге таарзынмас мен.

¹¹Мээң адым хүн үнер чүктен хүн ажар чүкке чедир өске чоннар аразынга өндүр бедик. Каяа-даа Мээң адымга тураскааткан чаагай чыттыг чүүлдер кыпсыр, арыг өргүлдер кылыр, чүге дээрге Мээң адым ол чоннар аразынга өндүр бедик». Аг-шериглиг Дээрги-Чаяакчының чугаалаан чүвези ол-дур.

¹²«А силер Мээң адымны баксырадып: „Дээргиге өргүл салыр бедигээш чаржынчыг-дыр“ — деп турар-дыр силер, аңаа салган аъш-чемни херекке албайн барып болур деп санаар-дыр силер.

¹³Силер: „Кандыг кончуг берге үүле боор!“ — дээш, Мени херекке албас-тыр силер — деп, Аг-шериглиг Дээрги-Чаяакчы чугаалаан. — Оорлап алган [3], аскак азы аарыг малды өргүл кылдыр эккеп салырыңарга, ындыг өргүлдү Мен силерниң холуңардан хүлээп аар мен бе? — деп, Дээрги-Чаяакчы чугаалаан. —

¹⁴Коданында эки эр малдыг, оозун Дээргиге өргүүр бооп даңгыраглапкан, а оон өргүл кылдыр четпес-дудуу мал эккеп салган кара сагыштыг кижи каргаттырар! Мен — өндүр улуг Хаан болгай мен, бүгү чоннар аразында Мээң адым ханы хүндүткелдиг». Аг-шериглиг Дээрги-Чаяакчының чугаалаан чүвези ол-дур.