Read Ыдыктыг Библия, 2011 От Матфея 1 Bible Online

От Матфея 1 - Ыдыктыг Библия, 2011 bible

От Матфея 1

¹Авраамдан база Давидтен укталган Иисус Христостуң ада-өгбе даңзызы бо-дур.

²Авраам Исаактың ачазы турган. Исаак — Иаковтуң, Иаков — Иуда биле ооң акы-дуңмаларының ачазы турган.

³Иуда — Фарес биле Зерахтың (а оларның авазы — Фамар), Фарес — Хецроннүң, а Хецрон Арамның ачазы турган.

⁴Арам — Аминадавтың, Аминадав — Наассоннуң, а Наассон Салмоннуң ачазы турган.

⁵Салмон — Воозтуң ачазы (а Воозтуң авазы — Раав) турган. Вооз — Овидтиң ачазы (а Овидтиң авазы — Руф) турган. Овид — Иессейниң,

⁶а Иессей Давид хаанның ачазы турган. Давид — Соломоннуң ачазы (а Соломоннуң авазы — Урияның кадайы) турган.

⁷Соломон — Ровоамның, Ровоам — Авияның, а Авия Асафтың [1] ачазы турган.

⁸Асаф — Иосафаттың, Иосафат — Иорамның, а Иорам Озияның ачазы турган.

⁹Озия — Иоафамның, Иоафам — Ахазтың, а Ахаз Эзекияның ачазы турган.

¹⁰Эзекия — Манассияның, Манассия — Амостуң [2], а Амос Иосияның ачазы турган.

¹¹Иосия — Иехонияның болгаш ооң дуңмаларының өгбези турган [3]. (Оларның чурттап турган үезинде израиль чонну Вавилонче көжүрүп үндүрген чүве-дир.)

¹²Израиль чонну Вавилонче көжүрген соонда, Иехония Салафиилдиң ачазы апарган, а Салафиил Зоровавелдиң ачазы турган.

¹³Зоровавел — Авиудтуң, Авиуд — Элиакимниң, а Элиаким Азорнуң ачазы турган.

¹⁴Азор — Садоктуң, Садок — Ахимниң, а Ахим Элиудтуң ачазы турган.

¹⁵Элиуд — Элеазарның, Элеазар — Маттанның, а Маттан Иаковтуң ачазы турган.

¹⁶А Иаков Иосифтиң ачазы турган. Ол Иосиф болза Христос деп адаткан Иисусту божаан Марияның ашаа боор.

¹⁷Ынчангаш Авраамдан Давидке чедир шупту он дөрт салгал, Давидтен израиль чонну Вавилонче көжүрүп үндүргенинге чедир база он дөрт салгал болгаш израиль чонну Вавилонче көжүргенинден Христостуң төрүттүнгенинге чедир база-ла он дөрт салгал солушкан.

¹⁸Иисус Христос мынчаар төрүттүнген. Ооң авазы Марияны Иосиф-биле дүгдеп каан чүве-дир. Ынчалза-даа олар өгленчир бетинде, Марияның Ыдыктыг Сүлдеден иштелгени билдине берген.

¹⁹Ооң душтуу боор Иосиф чөптүг-шынныг кижи турган болгаш, Марияны улус мурнунга бак атка киирбес дээш, кымга-даа дыңнатпайн, дүгдээшкинни бүдүү соксадыр деп шиитпирлээн.

²⁰Ынчалзажок ол ынчаар бодап алган турда, Дээрги-Чаяакчының төлээзи ооң дүжүнге көзүлгеш, мынча дээн: «Давидтиң оглу, Иосиф, Марияны кадай кылып аарындан кортпа. Чүге дээрге ооң иштинде Чаш төл Ыдыктыг Сүлдеден боттанган-дыр.

²¹Мария оол уруг божуп алыр, а сен Ону Иисус [4] деп адап аар сен, чүге дээрге Ол Бодунуң чонун бачыттарындан камгалаар-дыр».

²²[22-23] (Дээрги-Чаяакчының Бодунуң медээчизин дамчыштыр: «Көрүңер даан, арыг кыс иштели бергеш, оол уруг божуп алыр, Ону Эммануил деп ат-биле адаарлар» — деп чугаалаан чүүлү ынчаар боттанган-дыр. А Эммануил деп ат «Бурган бистиң-биле» дээн уткалыг.)

²⁴Иосиф оттуп келгеш, Дээрги-Чаяакчының төлээзиниң дужааганын ёзугаар, Марияны кадай кылып алган.

²⁵Ынчалза-даа Иосиф, кадайы оглун [5] божуваан шаанда, ооң-биле эр, херээжен харылзаа кылып көрбээн. Иосиф оолду Иисус деп адап алган.