Read Ыдыктыг Библия, 2011 От Луки 17 Bible Online

От Луки 17 - Ыдыктыг Библия, 2011 bible

От Луки 17

¹А Бодунуң өөреникчилеринге Иисус мынча дээн: «Күткүлгелерниң кээри чайлаш чок, ынчалза-даа оларның кээриниң чылдагааны болган кижи ат болур!

²Бо бичии улустуң кайы-бирээзин бачытче чыгапкан кижи бар болза, ооң мойнунга дээрбе дажы баглааш, далайже киир октаптары безин ол кижиге оон дээре салым болур ийик.

³Кичээнгейлиг болуңар! Бир эвес эжиң бачыт үүлгедипсе, ону чемелеп чугаала, а бир эвес бачыдын миннир болза, ону өршээ.

⁴А бир эвес ол сеңээ удур хүнде чеди катап буруулуг херек үүлгеткеш, чеди катап дедир келгеш: „Буруулуг-дур мен“ — дээр болза, ону өршээ».

⁵Дээрги Иисустуң элчиннери бир-ле катап Аңаа: «Бүзүреливисти өстүрүп көрүңер» — дээннер.

⁶Дээрги мынча деп харыылаан: «Бир эвес силерде оода-ла горчица үрезини хире бүзүрел бар болза, силер ынчан бо фига ыяжынга: „Дазылыңдан тура тырттылгаш, бодуңну далайга солуй олуртувут“ — дээр болзуңарза, ол силерге чагыртыр ийик.

⁷Силерниң бирээңер чер чарып азы хой кадарып хүнзээр чалчалыг дижик. Ол шөлден чанып кээрге, аңаа: „Дүрген кирем, олургаш, чемненип көрем“ — деп чугаалавас болгай сен.

⁸Оон байтыгай, мынча дээр болгай сен: „Меңээ чемден белетке, оон эде кеттингеш, ижип-чип олурумда, меңээ бараан бол, а ооң соонда бодуң ижип-чип боор сен“.

⁹Айыткан аайыңар-биле бараалгааны дээш, чалчаңарга ооң соонда өөрүп четтиргениң илеретпес-ле болгай сен.

¹⁰Силер база шак ындыг болуңар, „кылыңар“ деп айыткан бүгү чүүлдү кылып каапкаш: „Бис дээрге төлеп чок чалчалар-дыр бис, чүгле хүлээлгевис күүсеткенивис ол-дур“ — деп чугаалаңар».

¹¹Иисус Иерусалимче углап, Самария биле Галилеяның аразында кызыгаарны дургаар чоруп олурган.

¹²Ол бир-ле суурже кирип кел чыдырда, Ону кеш аарыглыг он кижи уткуп алган. Олар элээн ырадыр туруп алгаш,

¹³ыыткыр үн-биле кый дей бергеннер: «Иисус, Хайырааты, бисти кээргеп көрүңер!»

¹⁴Оларны көрүп кааш, Ол: «Баргаш, Бурганның бараалгакчыларынга көстүп калыңар» — дээн. Олар чорупкаш, орук ара арыгланып, экирий бергеннер.

¹⁵Оларның бирээзи экирий бергенин көрүп кааш-ла, Иисусче эглип келгеш, ыыткыр үн-биле Бурганны алдаржыдып эгелээн.

¹⁶Ол Иисустуң мурнунче кээп дүшкеш, Аңаа өөрүп четтиргенин илереткен. Ол болза Самария чурттуг кижи болган.

¹⁷Иисус мынча деп айтырган: «Арыгланган он кижи турган эвес чүве бе? А арткан тозу кайыл?

¹⁸Бо даштыкы кижиден аңгыда, оларның чаңгызы-даа Бурганны алдаржыдып, ээп келбээни ол бе?»

¹⁹Оон демги кижиге: «Че, чорувут, бүзүрелиң сени экиртип-камгалап каан-дыр» — дээн.

²⁰Бир-ле катап фарисейлер Иисустан Бурганның Чагыргазы кажан кээрин айтырарга, Ол мынча деп харыылаан: «Бурганның Чагыргазы көскү кылдыр чедип келбес.

²¹Кым-даа: „Ол мында-дыр“ азы: „Ол дуу ында-дыр“ — деп шыдавас, чүге дээрге Бурганның Чагыргазы силерниң араңарда-дыр [26]».

²²Оон Ол Бодунуң өөреникчилеринге мынча дээн: «Кижи амытан Оглунуң оода чаңгыс хүнүн-даа болза аажок көрүксей бээриңер үе чедип кээр, ынчалза-даа көрүп шыдавас силер.

²³Улус силерге: „Ол мында-дыр“ азы „Дуу ында-дыр“ — дижир, ынчалза-даа ынаар барбаңар база сүрүп маңнаваңар.

²⁴Чүге дээрге Кижи амытан Оглу Бодунуң чедип кээр хүнүнде, кызаш кынгаш, дээрни бир кыдыындан өске кыдыынга чедир чайынналдыр чырыдыпкан чаңнык дег болур.

²⁵Ынчалза-даа мурнунда Ол хөй хилинчекти көрүп эртер база бо салгалдың улузунга тооп көрдүрбес ужурлуг.

²⁶Нойнуң үезинде ынчаар болуп турганы дег, Кижи амытан Оглунуң чедип кээр хүннеринде база-ла ындыг болур.

²⁷Бажың-хемезинче Нойнуң кире бергени хүнге чедир улус-чон ижип-чип, кадай ап база ашакка барып келген болгай. Оон суг халавы хөме алгаш, оларның шуптузун чок кылып каан ийик чоп.

²⁸Лоттуң үезинде база-ла шак ындыг болган. Кижилер ижип-чип, садыглап-даа, боттары-даа садыг кылып, тарып-олуртуп база тудуг кылып турганнар.

²⁹Ынчалза-даа Лоттуң Содом хоорайны каггаш үнүпкен хүнүнде дээрден оттуг күгүрден бүткен чаъс чаггаш, оларның шуптузун чок кылып каан ийик чоп.

³⁰Кижи амытан Оглу чедип кээрге, база шак ындыг болур.

³¹Ол хүн боду бажыңының кырында турар, а эт-севи бажың иштинде чыдар кижи оозун алыры-биле дүшпезин; а шөлге чораан кижи база ээп чанмазын.

³²Лоттуң кадайын сактып келиңер!

³³Амы-тынын арттырып алыр дээш чүткээн кижи — амы-тынындан чарлыр, а амы-тынындан чарылган кижи — амы-тынын кадагалап алыр.

³⁴Силерге чугаалап тур мен: ол дүне ийи кижи кады удуп чыдырда, оларның бирээзин алгаш баар, а өскезин арттырып каар.

³⁵[35-36] Ийи херээжен кады тараа дээрбелеп турар болза, бирээзин алгаш баар, а өскезин арттырып каар» [27].

³⁷Өөреникчилери Иисустан: «Ол каяа болурул, Дээрги?» — деп айтырганнар. «Кайда сек барыл, аңаа сек чиир куштар чыглып кээр» — деп, Иисус харыылаан.