Read Ыдыктыг Библия, 2011 Второзаконие 28 Bible Online

Второзаконие 28 - Ыдыктыг Библия, 2011 bible

Второзаконие 28

¹«Бир эвес Дээрги-Чаяакчы Бурганыңның сөзүн тооп дыңнаар база бөгүн сеңээ айтып-чагып турарым Ооң шупту айтыышкыннарын күүседирин кызыдар болзуңза, Дээрги-Чаяакчы Бурганың сени чер-делегейниң шупту чоннарындан өрү көдүрүп каар.

²Дээрги-Чаяакчы Бурганыңның сөзүн тооп дыңнаар болзуңза, бо йөрээшкин бүрүнү-биле сеңээ доктаап, сеңээ хамаарыштыр чогуп бүдер.

³Хоорайга-даа, шөлге-даа ачы-буянны алыр сен.

⁴Сээң ажы-төлүң болгаш чериңден үнер дүжүт, бода база шээр малыңның төлү хөй болур.

⁵Дүжүт чыыр аргаан хааржактарың, барба-саваң долу болур.

⁶Кылып турар бүгү чүүлүңге, бүгү үелерде ачы-буянга бүргеттирер сен.

⁷Дээрги-Чаяакчы сенче халдап турар дайзыннарыңны сээң мурнуңга чылча шаап каар: олар сеңээ удур чаңгыс орук-биле тулчуп үнүп келгеш, чеди аңгы орук-биле дезип ыңай болур.

⁸Дээрги-Чаяакчы сээң аңмаарларыңны долдуруп бээр, кылып турар кандыг-даа ажыл-херээңге чедиишкинниг болур сен; Дээрги-Чаяакчы Бурганыңның сеңээ берип турары черге ачы-буянны алыр сен.

⁹Дээрги-Чаяакчы Бурганыңның айтыышкыннарын сагып, Ооң оруктары-биле чоруур болзуңза, Дээрги-Чаяакчы, сеңээ даңгыраглааны дег, сени Бодунга хамааржыр ыдыктыг чон кылдыр тургузуп каар.

¹⁰Ынчан чер кырында шупту чоннар сээң Дээрги-Чаяакчыга хамааржырыңны дыңнап кааш, сенден корга бээр.

¹¹Дээрги-Чаяакчы сеңээ бээр бооп ада-өгбеңге даңгыраглаан черинге элбек-чаагай чорукту: бодуңга эңдерик үре-төлдү, мал-маганыңга эңмежок төлдү, чериңге элбек дүжүттү хайырлаар.

¹²Дээрги-Чаяакчы сеңээ дээрниң эжиктерин — Бодунуң ачылыг эртине шыгжамырын ажыдып, сээң чериңге чаъсты чогуур өйүнде чагдырып бээр база кылып турар шупту ажыл-херээңге ачы-буянын хайырлаар; хөй чоннарга чээлиге акша-хөреңги бээр сен, а бодуң олардан чегдинмес сен.

¹³Бир эвес мээң бөгүн сеңээ сагып, күүседир кылдыр айтып-чагып турарым Дээрги-Чаяакчы Бурганыңның айтыышкыннарын тооп дыңнаар болзуңза, Дээрги-Чаяакчы сени кудурук эвес, баш кылып каар, адаанга эвес, кырынга турар сен.

¹⁴Чүгле мээң бөгүн сеңээ айтып-чагып турарым бүгү сөстерден оң-даа, солагай-даа талаже чайлава, өске бурганнар эдербе, оларга бараан болба».

¹⁵«Ынчалза-даа Дээрги-Чаяакчы Бурганыңның сөзүн тооп дыңнавас база мээң бөгүн сеңээ айтып-чагып турарым Ооң шупту айтыышкыннар, дүрүмнерин күүседирин кызытпас болзуңза, шупту бо каргыштар сеңээ доктаап, сени хөме таварыыр.

¹⁶Хоорайга-даа, шөлге-даа каргаттырар сен.

¹⁷Дүжүт чыыр аргаан хааржактарың, барба-саваң каргаттырар.

¹⁸Үре-төлүң, чериңден үнер дүжүдүң, бода база шээр малыңның төлү каргаттырар.

¹⁹Кылып турар бүгү чүүлүң бүгү үелерде каргаттырар.

²⁰Дээрги-Чаяакчы сенче, узуткаттырып каггыжеңге чедир, кылып турар кандыг-даа ажыл-херээңче каргышты, мөгүдээшкинни болгаш хайны салыр — Дээрги-Чаяакчыдан ойталааның дээш, бузуттуг херектериң уржуу-биле удавайн өлүп каар сен.

²¹Ээлеп чурттаар дээш кирип турарың черге Дээрги-Чаяакчы сенче, амы-тыныңны үзүп каггыжеге чедир, хамчык аарыгны салып кээр.

²²Оон Дээрги-Чаяакчы сенче харыксырадыр аарыгны, халыынны, дегдирер аарыгны халдадыр; сээң дүжүдүңче каңдаашкынны, өрттендир чип турар изиг хатты болгаш дүдүктү салыр — ол бүгү айыыл-халап өлгүжеңге чедир сени истеп-сүрер.

²³Сээң бажың кырында дээр демир дег, будуң адаанда чер чес дег апаар [25].

²⁴Дээрги-Чаяакчы сээң чериңче чаъс-чаашкын орнунга дээрден элезин-довурак бадырар — ол бүгү сенче амы-тының үзүлгүжеге чедир бадып кээр.

²⁵Дээрги-Чаяакчы сени дайзыннарыңга аштырып аар кылдыр хүлээдип бээр: оларга удур чаңгыс орук-биле тулчуп үнгеш, олардан чеди аңгы орук-биле дезип ыңай боор сен, бүгү чер-делегейниң күрүнелери сээң айыыл-халавыңны көргеш, „Дадайым!“ дээр.

²⁶Улузуңнуң мөчү-сөөгү дээрниң хамык куштарынга, черниң аң-араатанынга чемиш болур, оларны ойладып-хойзур кижи тывылбас.

²⁷Дээрги-Чаяакчы сенче, египетчилерже дег, ириңниг балыгларны, оюлганнаар кеш аарыын база янзы-бүрү хевирлиг кодурларны халдадыр — ол дээрге эмнеттинмес аарыглар болур.

²⁸Дээрги-Чаяакчы сени солуудадыр, согурартыр болгаш аңгададыр;

²⁹сен ынчан дал дүъште, караңгыда согур кижи дег, база суйбанып кылаштаар сен; бүгү оруктарыңга чедимче чок болур сен, дайзыннар сени хүннүң-не кызып-кыйып, үптээр — сени кым-даа камгалавас.

³⁰Херээжен кижи-биле дүгдежип аарыңга, өске эр кижи ооң-биле хойгажыр; бажың тудуп алгаш, аңаа чурттап шыдавас сен; виноград тарып алгаш, ону ажыглап шыдавас сен;

³¹сен көрүп туруңда, бугаңны соп каарга, ооң эъдин чивес сен; элчигениңни хунаап аппаргаш, сеңээ дедир эгитпес; шээр малыңны дайзыннарыңга хүлээдип бээр — сени кым-даа камгалавас.

³²Сээң оглу-кызыңны өске чоннар тудуп аппаар, карактарың хүннү бадыр оларны дилегзинип көрдүнгеш, турлур деп баар, холдарың сула салдына бээр.

³³Чериңге үнер дүжүттү, ажыл-ижиңниң бүгү үре-түңнелин сээң билбезиң чон былаап чиир, үргүлчү кыстыртып, хилинчектенир сен.

³⁴Карааң-биле көрүп турарың бүгү чүведен угааның солуудай бээр.

³⁵Дээрги-Чаяакчы дискектериң биле чодаларыңче коргунчуг аарыг халдадыр — ол таваңгайыңдан тейиңге чедир бүгү бодуңну шыва аптар.

³⁶Дээрги-Чаяакчы сени база аңаа башкартыр дээш дүжүлгеге олуртуп алган хааныңны сээң-даа, ада-өгбеңниң-даа билбези черже аппаар, аңаа баргаш, ыяш биле даштан кылган хары бурганнарга бараан болур сен.

³⁷Дээрги-Чаяакчының сени аппарып кааны черде бүгү чоннар сээң байдалыңны көргеш, коргуп-сестир, адыңны бужар үлегер-чижек кылдыр ажыглап, кочулап-шоодар.

³⁸Шөлүңге хөй үрезин тарып аар сен, а дүжүдүң эвээш болур, чүге дээрге шартылаа чиптер.

³⁹Виноград шөлдериңге виноград тарып, болбаазырадыр сен, а арага ишпес сен, чимис чыып албас сен, чүге дээрге виноградты курт чиптер.

⁴⁰Олива ыяштары сээң чериңге каяа-даа үнер, а ооң үзүн ажыглап шыдавас сен, чүге дээрге чимизи тоглап дүже бээр.

⁴¹Оглу-кызың төрүттүнер, ынчалза-даа чаныңга арттырып ап шыдавас сен, чүге дээрге оларны тудуп аппаар.

⁴²Сээң хамык ыяштарың биле чериңде үнген бүгү дүжүдүңнү шерги узуткап каар.

⁴³Чон аразында чурттап турар даштыкы кижи сенден арттыр депшип, улам-на өрү көдүрлүр, а сен улам-на куду бадар сен.

⁴⁴Ол кижи сеңээ чээли бээр, а сен аңаа чээли бээр харык чок боор сен, ол — баш, а сен — кудурук болур сен.

⁴⁵Сени узуткап каггыжеге чедир, шупту ол каргыштар сеңээ доктаап, сени таварыыр база истеп-сүрер, чүге дээрге Дээрги-Чаяакчы Бурганыңның сөзүн тооп дыңнавайн, Ооң сеңээ айтып-чагаан айтыышкын, дүрүмнерин сагывайн турган болгай сен.

⁴⁶Ол каргыштар сеңээ база сээң үре-салгалыңга кезээ мөңгеде бадыткал демдээ база барымдаа болур.

⁴⁷Дээрги-Чаяакчы Бурганыңга, бүгү чүве элбекшилдиг турда, эки тура-биле бараан болбааның дээш,

⁴⁸Дээрги-Чаяакчының сеңээ удур салганы дайзыныңга бараан болуп, аштап-суксаар сен, кедер хеви чок, чүү-даа чүвези чок кижи болур сен; Дээрги-Чаяакчы, сээң амы-тыныңны үзүп каггыжеге чедир, мойнуңга демир хомут кедирип каар.

⁴⁹Дээрги-Чаяакчы ырактан — чер-делегейниң кыдыындан — сеңээ удур чон көдүрүп эккээр, дылын билбезиң чон сенче эзир ышкаш шүүргедеп ужуп кээр.

⁵⁰Олар дээрге кадыг-дошкун шырайлыг, кырганнарны хүндүлевес, аныяктарны өршээвес улус болур.

⁵¹Ол чон сени хоозурадып каггыжеге чедир, мал-маганыңның төлүн база чериңге үнер дүжүттү чип кээр; сеңээ далган-тараа, арага, олива үзүн база бода-даа, шээр-даа малыңның төлүн арттырбас, сээң амы-тыныңны үзүп каггыжеге чедир, былаап ап кээр.

⁵²Ол чон сээң идегеп турар бедик быжыг ханаларыңны бүгү чериңге үреп бузуп каггыжеге чедир, сени шупту хоорайларыңга кызып-кыйып, бүзээлеп кээр; Дээрги-Чаяакчы Бурганыңның сеңээ бергени бүгү черге, шупту хоорайларыңга дайзын сени кызып-кыйып, бүзээлээр.

⁵³Сен ынчан дайзыныңга бүзээледип, кыстыргаш, бодуңнуң үре-төлүңнү, Дээрги-Чаяакчы Бурганыңның сеңээ бергени оглу-кызыңның эът-бодун чиир сен.

⁵⁴Чон аразынга туразында, таалап чыргап чурттап чораан эр кижи ха-дуңмазы кижиже, эргим ынак кадайынче, артып алган ажы-төлүнче кам-хайыра чок көөр;

⁵⁵бодунуң чип турары ажы-төлүнүң эът-бодун чоок улузунуң кайызынга-даа бербес, чүге дээрге дайзының сени шупту хоорайларыңга бүзээлеп, кызагдап кээрге, ол эр кижиниң чиир өске аъш-чеми чок болур.

⁵⁶Чон аразынга туразында, таалап-чыргап чурттап чораан болгаш, будун безин черге дээспейн чораан херээжен кижи бодунуң эргим ынак ашаанче, оглу-кызынче кам-хайыра чок көөр;

⁵⁷дайзының сени шупту хоорайларыңга бүзээлеп, кызагдап кээрге, чиир өске аъш-чем чогундан ол херээжен божуп алган чаш төлүн уруг сыртыы-биле кады бүдүү чип амыдыраар.

⁵⁸Бо дүрүг номда бижиттинген бо хоойлунуң шупту сөстерин күүседирин кызытпас, Дээрги-Чаяакчы Бурганыңның алдарлыг болгаш сүрээденчиг адындан кортпас болзуңза,

⁵⁹Дээрги-Чаяакчы сени база үре-салгалыңны анаа эвес айыыл-халап-биле үскүлештирер; Ооң сеңээ таварыштырар айыыл-халавы доктаамал база күчүлүг, аарыглары — хоралыг база доктаамал болур.

⁶⁰Ол сенче Египетке көргениң, коргуп турарың шупту аарыг-аржыкты халдадыр, олар сеңээ чыпшына бээр.

⁶¹Дээрги-Чаяакчы сенче бо хоойлу номунда бижиттинмээн-даа янзы-бүрү аарыгларны, айыыл-халапты, амы-тыныңны үзүп каггыжеге чедир, халдадып кээр.

⁶²Дээрде сылдыстар ышкаш хөй-даа болзуңарза, дыка эвээжиңер дириг артып каар, чүге дээрге Дээрги-Чаяакчы Бурганыңарның сөзүн дыңнавайн турган болгай силер.

⁶³Силерге буян көргүзүп, силерни өстүрүп-көвүдедип тура, Дээрги-Чаяакчының өөрүп турганы дег, силерни узуткап, кырып тура, Ол база өөрүүр;

⁶⁴Дээрги-Чаяакчы сени бүгү чоннар аразынга, чер-делегейниң бир кыдыындан өске кыдыынга чедир тарадып кааптар, аңаа бодуңнуң-даа, өгбеңниң-даа билбес чорааны, ыяш биле даштан кылган хары бурганнарга бараан болур сен.

⁶⁵Ол чоннар аразынга оожургал көрбес сен, будуң дыштандырар чер тыппас сен. Дээрги-Чаяакчы аңаа чүрээңни хөлзедип, дүвүредир, карааңны шыладып, баксырадыр, сеткил-хөңнүңнү муңгарадып, хилинчектээр;

⁶⁶амы-тыныңга үргүлчү айыыл кыжаныр, дүне-даа, хүндүс-даа коргуп-дүвүрээр сен, „Амы-тынныг артар мен“ деп бүзүрел чок болур сен.

⁶⁷Коргуушкунга алыскаш, көрүп турар чүвеңден мөгүдээш, эртен: „Дүрген-не кежээ дүшкен болза!“, а кежээ: „Дүрген-не даң аткан болза!“ — дээр сен.

⁶⁸Мээң сеңээ: „Ону моон соңгаар көрбес сен“ — дээним орук-биле Дээрги-Чаяакчы сени Египетче, корабльдарга олурткаш, дедир эккээр, аңаа бодуңарны эр, херээжен кулдар кылдыр дайзыннарыңарга садар дээриңерге, садып алыкчы тывылбас».