Read Ыдыктыг Библия, 2011 К Филиппийцам 2 Bible Online

К Филиппийцам 2 - Ыдыктыг Библия, 2011 bible

К Филиппийцам 2

¹Ынчангаш Христоска башкарткан амыдырал силерни канчаар-даа сорук киирер болза, Ооң ынакшылы силерге кандыг-даа аргалалды хайырлаар болза, Сүлде-биле кандыг-даа харылзаалыг болзуңарза, кандыг-даа энерел болгаш кээргээр сеткил силерде бар болза,

²мени мынчалдыр бүрүн аас-кежиктиг кылып каар силер: чаңгыс бодалдыг, чаңгыс ынакшылдыг болуңар, сеткил-сагыжыңар эвин кадып, чаңгыс эчис сорулгалыг болуңар.

³Чүгле кандыг-даа чүвени бот тогдунгаш база адыыргааш, кылбайн көрүңер. Харын томаарып, куду көрдүнгеш, өскелерни боттарыңардан өрү көрүңер.

⁴Силерниң кижи бүрүзү чүгле бодунуң эвес, а өскелерниң эрге-ажыының дугайында сагыш човаар ужурлуг.

⁵Бот-боттарыңар дугайында Христос Иисустуң бодаары дег бодап чоруңар.

⁶Ол алыс бүдүжү-биле Бурган-даа чораан болза, Бодунуң Бурган-биле дең байдалындан салдынмайн туттунарын кыспаан.

⁷Ооң орнунга Ол эки туразы-биле Бодунда бар турган бүгү туруш-байдалдан ойталааш, чалчаның бүдүжүн хүлээп ап, кижи болу бергеш, кижинии дег хевир-шырайлыг чедип келген.

⁸Христос Бурганга дыңнангырын көргүзүп, өлүмнү, белдир-ыяшка өлүмнү безин, хүлээп ап, Бодун ындыг куду деңнелче бадырган!

⁹Ооң ужурунда Бурган Ону эң бедик туруш-байдалче көдүргеш, өске кандыг-даа ат-дужаалдардан артык ат-дужаалды тывыскан.

¹⁰Ынчангаш Иисустуң адынга хүндүлел кылдыр дээрде, черде болгаш алдыы оранда дискек бүрүзү сөгүрүп олурар,

¹¹Бурган Аданы алдаржыдары-биле Иисус Христос — Дээрги деп дыл бүрүзү хүлээп көөр.

¹²Ынчангаш, ханы ынак эш-өөрүм, чүгле араңарга турган үемде эвес, харын оон-даа чугула — мен чок турумда, меңээ дыңнангыр болуп келгениңер дег, боттарыңарның камгалалыңарны Бурганга бүрүн хүндүткел-биле болбаазырадырын уламчылаңар-ла.

¹³Чүге дээрге Бурган Боду силерниң араңарга Ооң соругдаан сорулгазынче чүткүүрүн-даа, ону күүседирин-даа боттандырып турар.

¹⁴Шупту чүвени хыйланмайн база кырышпайн кылыңар.

¹⁵Ынчан бо үениң бачыттыг, самыыраан улузунуң аразында чурттап турар-даа болзуңарза, Бурганның бузутка борашпаан ажы-төлү дег, кем-буруу чок, арыг боор силер. Оларның аразынга, октаргайда сылдыстар дег, чайынналдыр чырыыр силер.

¹⁶Мөңге амыдырал бээр медээден салдынмайн туттунуңар [1]. Силерниң ынчаар кылганыңар ачызында, мээң бо чарышка киришкеним база үндүрген күжениим хилис барбаан-дыр деп, Христостуң ээп кээр хүнүнде амыраар ийик мен.

¹⁷Силерниң бүзүрелиңер — Бурганга салган өргүлүм дег; ам аңаа немей амы-тынымны өргүл кылдыр салыр апаар-даа болзумза, ынчан безин өөрүп, ол өөрүшкүмнү силер-биле үлежир мен.

¹⁸Ооң ужурунда силер база өөрүп-байырлаңар, мээң-биле өөрүшкүңер үлежиңер!

¹⁹Дээрги Иисустуң күзел-соруу ындыг болза, удавас Тимофейни силерже чорудуптарымга идегеп тур мен. Силерниң дугайыңарда ооң эккээр медээлери сеткилимни өөртүптер боор.

²⁰Силер дээш, ынчалдыр ёзулуг сагыш човаар, сеткил-хөңнүмнү үлежип чоруур өске ындыг кижи менде чок.

²¹Чүге дээрге өске арткан улус Иисус Христоска күзенчиг чүүл дээш эвес, а чүгле боттарының эрге-ажыы дээш сагыш човаар-дыр.

²²А Тимофейниң ажыл-херекке шылгаттынганын, мээң-биле кады, адазы биле оглу ышкаш, Буянныг Медээге бараан болуп келгенин билир силер.

²³Ынчангаш, мээң херектерим кандыг байдалдыын билген дораан-на, ону силерже чорудуптарымга идегеп тур мен.

²⁴Дээрги-Чаяакчы-ла ону күзээр болза, силерге бодум база удавас чеде бээримге ыяк бүзүрээр мен.

²⁵Ол ышкаш мээң хереглелдеримче сагыш салзын дээш чорутканыңар эргелиг эживис, мээң ажыл-үүлемни эгин кожа кылчып, кады дайылдажып чоруур дуңмам Эпафродитти силерже дедир чорударын эргежок чугула кылдыр көрдүм.

²⁶Чүге дээрге ол силерни дыка көрүксеп турар база ооң аараанының дугайында медээ силерге чеде берген дээрге, муңгарап турар.

²⁷Ол, шынап-ла, аажок аарааш, өлүр чазып турду, ынчалза-даа мээң муңгаралымга оон-даа улуг муңгарал немешпезин дээш, Бурган ону кээргеди (чүгле ону эвес, а мени база).

²⁸Ону көргеш, аажок өөрүүрүңерни билир мен, мээң муңгаралымны ол-ла харын чавырып тур. Ынчангаш ону силерже чорудар дээн күзелим күштелип кел чор.

²⁹Дээрги-Чаяакчыга башкарткаш, ону улуг өөрүшкү-биле уткуп хүлээп алыңар база ындыг улусту кедергей хүндүлеп чоруңар.

³⁰Чүге дээрге ол Христостуң ажыл-херээ дээш өлүр чазып, силерниң меңээ чедирип шыдаваан дузаңарны көргүзүп чедирип, меңээ бараан болур дээш, амы-тынын артынга каап чорду.