Read Ыдыктыг Библия, 2011 К Колоссянам 4 Bible Online

К Колоссянам 4 - Ыдыктыг Библия, 2011 bible

К Колоссянам 4

¹Ээлер, силер база кулдарыңарны ак сеткилдиг болгаш чөптүг аажылаңар. Силерниң база дээрде Ээңер барын утпаңар.

²Чүткүлдүг мөргүңер, мөргүп тура, сергек болуңар база өөрүп четтириңер!

³Бис дээш база Бурган медээвиске орукту ажыдып берип, Христостуң чажыдын суртаалдаар арганы биске берзин дээш, мөргүңер. Ол суртаал ужун мен ам хоругдал адаанда тур мен.

⁴Улуска ол чажытты болур-чогууру-биле, мээ-медерелче сиңниктир медеглээрим дээш, мөргүңер.

⁵Бурганга бүзүревээн улус-биле боттарыңарны сарыылдыг ап, үени шын ажыглаңар.

⁶Кижи бүрүзүнге херектиг харыы тудуп шыдаар кылдыр, чугааңар үргүлчү чедингир болгаш чечен-мерген болзун.

⁷Силерге мээң дугайымда бүгү чүвени ханы ынак дуңмам Тихик чугаалап чедер. Ол Дээрги-Чаяакчыга шынчы бараан болуп, кады ажылдап турарым кижи-дир.

⁸Ону силерже чорудуп турар сорулгам мындыг: ол бистиң канчаар амыдырап-ажылдап турарывысты силерге дыңнаткаш [5], сеткил-сагыжыңарны сорук киирзин.

⁹Тихикти мен бүзүрелдиг база ханы ынак дуңмам Онисим-биле кады силерже чоруттум. Ол силерниң чаңгыс чер чурттугларыңарның бирээзи боор кижи. Мында чүү болуп турарын олар силерге бирден-бирээ чок чугаалап чедерлер.

¹⁰Мээң хоругдал адаанда кады турар эжим Аристарх биле Варнаваның төрел дуңмазы Марк олар силерге байыр чедирди. (Маркка хамаарыштыр айтыышкын алган силер: ол силерге чеде бээрге, ону хүндүткел ёзузу-биле уткуңар.)

¹¹Иуст деп адаткан Иисус база силерге байыр чедирип тур. Бурганның Чагыргазы дээш, мээң-биле кады ажылдап турар улустуң аразында чүгле олар иудейлер чүве. Олар меңээ улуг деткимче бооп келди.

¹²Эпафрас база силерге байыр чедирип тур. Ол силерниң бирээңер-дир база Христос Иисустуң чалчазы боор кижи-дир. Силер дээш, ол үргүлчү аажок чүткүлдүг мөргүп, Бурганның күзел-соруунга бүрүнү-биле чагырткан, четчип-бышкан болуруңар дээш, Бургандан дилеп турар-дыр.

¹³Ооң силер дээш база Лаодикияда, Иерапольда чурттаан бүзүрээн улус дээш, кайы хире карак кызыл ажылдап турарын бодум херечилеп тур мен.

¹⁴Бистиң ханы ынаавыс эмчи Лука биле Димас олар база силерге байыр чедирип турлар.

¹⁵Лаодикияда бүзүрээн ха-дуңмага, а ол ышкаш Нимфага [6] база ооң бажыңында чыглып турар христианнарга мээң байырым чедириңер.

¹⁶Бо чагааны араңарга номчуп дооскаш, ону Лаодикияда христиан ниитилелге база номчуур кылдыр дамчыдып бериңер. А силер Лаодикиядан чедип кээр чагааны база номчуңар.

¹⁷Архиппке мынча деп чугаалаңар: «Дээрги-Чаяакчыга бараан боор дээш хүлээнген ажыл-херээңни албан күүседиринге бүзүрелдиг бол».

¹⁸Бодумнуң холум-биле бижип олур мен: Павелден байыр. Хоругдал адаанда турарымны утпаңар. Бурганның авыралы шуптуңарга доктаазын! [7]