Read Ыдыктыг Библия, 2011 К Евреям 11 Bible Online

К Евреям 11 - Ыдыктыг Библия, 2011 bible

К Евреям 11

¹А бүзүрел идегеливисти боттандырып, каракка көзүлбес чүүлдерни бадыткап турар.

²Шак ындыг бүзүрели дээш, бурунгу өгбелеривистиң дугайында биске эки херечилел дамчып келген.

³Бүзүреливис-биле өртемчейни Бурганның айтыышкынын ёзугаар чаяаганын, көстүп турар чүүлдерниң каракка көзүлбес чүүлдерден тывылганын билип алыр бис.

⁴Бүзүрели-биле Авел Каинниң салганындан эки өргүлдү Бурганга салган. Бурган Боду ооң белектериниң дугайында херечилээрге, ол бүзүрелин дамчыштыр чөптүг-шынныг кижи деп херечилелди чедип алган. Боду өлзе-даа, бүзүрелиниң ачызында, ол ам-даа херечилеп чугаалап чоруур.

⁵Бүзүрели-биле Энох өлүм көрбейн, дээрже көжүртү берген. Бурган Энохту чанынче көжүрүп алган болгаш, улус ону тыппайн барган. Чүге дээрге бо делегейден дээрже көжер бетинде, ол Бурганның сеткилинге киргениниң херечилелин алган.

⁶А бүзүрел чок болза, Бурганның сеткилинге кирери канчап болдунарыл? Бурганче чоокшулап кел чыдар кижи бүрүзү Ол бар деп база Олче чүткүп чоруур улуска Ооң шаңналы турар деп бүзүрээр ужурлуг болгай.

⁷Бүзүрели-биле Ной ам-даа көрбээни чүве дугайында сагындырыг алгаш, бодунуң өг-бүлезин камгалаар дээш, Бурганны хүндүлээр сеткили-биле бажың-хеме тудуп алган. Ооң шак ындыг бүзүрели бо делегейни буруудаткан. Ооң бүзүрээни дээш, Бурган ону чөптүг-шынныг кижи деп чарлаан.

⁸Бүзүрели-биле Авраам, өнчүге алыр ужурлуг турганы черже Бурган кый дээрге, кайнаар бар чоруурун боду безин билбес-даа бол, дыңнангыр чоруп каан.

⁹Авраам бүзүрели-биле Бурганның аазаан черинге, хары черге дег, чурттай берген. Ол ук черге чаңгыс-ла ол аазаашкынны деңге салгап алган оглу Исаак болгаш оглунуң оглу Иаков-биле кады майгыннарга чурттап турган.

¹⁰Чүге дээрге Бурганның төлевилээш, тутканы, үндезини салдынган хоорайын ол манап турган.

¹¹Бүзүрели-биле Авраам (кадайы Сарра төл төрүвес-даа турган болза) кыраан назынында ада боор күштү алган [9]. Аазаашкын берген Бурганның шынчызын ол билип турган.

¹²Ынчангаш чаңгыс кижиден (артында-ла эът-боду өлүг чыгыы кижиден) дээрде сылдыс дег эмге-тикчок, далай эриинде элезин дег сан-түң чок салгал тывылган.

¹³Ол бүгү улус аазаан чүүлдерни албайн, оларны чүгле ырактан көргеш, өөрүп, бүзүрелин ышкынмайн, өлгүлеп калган. Олар боттарының дугайында: «Бис бо черге чүгле түр када турумчуп алган даштыкылар бис» — деп чугаалап турганнар.

¹⁴А ынча деп чугаалаар улус төрээн чуртун дилеп чоруурун көргүзер болгай.

¹⁵Боттарының каапкаш барган чуртун бодааннар болза, дедир ээп чана бээр арга оларга тургай-ла.

¹⁶А олар оон дээре, дээрде турар чуртче чүткүп турганнар. Ынчангаш оларның Бурганы деп ададырындан Бурган ыятпас, чүге дээрге хоорайны оларга Ол белеткеп берген-дир.

¹⁷[17-18] Аазаашкын алган Авраам, Бурганга шенедип тургаш, эр чаңгыс оглу Исаакты бүзүрели-биле өргүлге салырынга белен турган. Бурган аңаа: «Сээң салгалың Исаакты дамчыштыр уламчылаар-дыр» — деп чугаалаан-даа болза, ол ынчаар кылган.

¹⁹Бурган ооң оглун өлүглер аразындан безин катап диргизип шыдаар деп, Авраам бүзүреп турган. Ол Исаакты өлүглер аразындан дедир эгидип алган деп чугаалап болгу дег-дир.

²⁰Бүзүрели-биле Исаак Иаковтуң база Исавтың келир үезин йөрээген.

²¹Бүзүрели-биле Иаков, өлүп чыда, Иосифтиң ийи оглун йөрээгеш, даянгыыжынга даянгаш, Бурганга мөгейген.

²²Бүзүрели-биле Иосиф чуртталгазының төнчүзүнде израиль чоннуң Египеттен үнериниң дугайында чугаалаан база бодунуң мөчү-сөөгүн канчаарын айыткан.

²³Бүзүрел ачызында Моисей, төрүттүнген соонда, ада-иезинге үш ай улаштыр чажыртып келген, чүге дээрге олар ооң онза чаражын көргеш, хаанның чарлыындан кортпааннар.

²⁴Бүзүрели-биле Моисей, улуг кижи апаргаш, фараоннуң уруунуң оглу деп ададырындан ойталаан.

²⁵Ол бачыттың түр када таалалын көөрүнүң орнунга, Бурганның чону-биле кады хилинчек көөрү дээре деп санаан.

²⁶Моисей Египеттиң эртине-байлаанга бодаарга, Христос [10] дээш дорамчылал көөрү улуг үнелиг деп санаан, ооң караа алыр ужурлуг шаңналынче шыгаап турган.

²⁷Бүзүрели-биле ол, хаанның килеңинден кортпайн, Египетти каапкаш барган. Каракка көзүлбес Бурганны көрген дег, ол бүгүдени шыдажып үнген.

²⁸Бүзүрели-биле ол, израильчилерниң дун оолдарын дээрниң хыдыкчы төлээзи өлүрбезин дээш, эжик кастыңнарын хан-биле чаап кааш, Хосталыышкын байырлалын демдеглеп эрттирген.

²⁹Бүзүрели-биле израиль чон, кургаг черлеп дег, Кызыл далайны кеже берген, а египетчилер оларны сүрүп кежер дээш, дүжүп өлүп калганнар.

³⁰Бүзүрели-биле израиль чон Иерихон хоорайны чеди катап улаштыр дескинген соонда, ооң ханалары буступ кээп дүшкен.

³¹Бүзүрели-биле самыын-садар херээжен Раав, израиль хайгыылчыларны эп-найыралдыг уткуп-хүлээгеш, бүзүревээн улус-биле кады өлүртпейн, амы-тынныг арткан.

³²Оон ыңай чүнү чугаалазымза экил? Гедеон, Варак, Самсон, Иеффай, Давид, Самуил суглар база Бурганның медээчилери дугайында чугаалаар дээримге, үем чедишпес-тир.

³³Бүзүрели-биле олар өске күрүнелерни тиилээннер, чөптүг чорукту догуннатканнар, аазаашкыннарны алганнар. Олар арзылаңнар аксынче кирбээннер,

³⁴чалбыыштыг отту өжүрүпкеннер, хылышка өлүртпейн барганнар, боттарының кошкаан күш-шыдалче хуулдурупканнар, дайын-чаага күчүлүг апарганнар, өске чер чурттугларның аг-шериин сывыртап турганнар.

³⁵Херээженнер боттарының өлген улузун катап дирилген кылдыр дедир алганнар. А бир чамдык улус оон-даа эки амыдыралга катап дирлир дээш, оларга саналдаан хосталганы хүлээп албайн, эриидедип өлгеннер.

³⁶Бир өске улус кочу-шоотту, эрииделди, а бир чамдыызы кинчи-бекти, кара-бажыңны көрүп эрткеннер.

³⁷Оларны даш-биле соккулап, ийи чара хирээлеп, хылыш-биле шанчып өлүрүп турган. Олар хой база өшкү кежи кеткеш, тояап чоруп, ядарап-түрегдеп, истедип-сүрдүрүп, дора көрдүрүп келгеннер.

³⁸(Бо делегей оларга төлептиг эвес турган!) Олар ээн черлерге, дагларга, куйларга, оңгар, кызаа черлерге улчуп чорааннар.

³⁹Бүзүрелиниң ачызында бүгү ол улус дугайында биске эки херечилел дамчып келген, ынчалза-даа олар Бурганның аазаан чүүлүн албааннар.

⁴⁰Бурган биске база бир-ле эки чүүлдү баш бурунгаар бодап алган: ол улус болбаазыраңгай байдалга чедер, чүгле бис чогувуста эвес, а бис-биле кады.