Read Ыдыктыг Библия, 2011 К Евреям 3 Bible Online

К Евреям 3 - Ыдыктыг Библия, 2011 bible

К Евреям 3

¹Ынчангаш, Бурганның дээрже кый деп алганы ыдыктыг чон боор ха-дуңма, Бурганның Төлээлекчизи болгаш шуптувустуң хүлээп көөрүвүс дээди бараалгакчызынче — Иисусче кичээнгейден салып көрүңер.

²Иисус Ону дээди бараалгакчы кылдыр салып каан Бурганга, Моисейниң Бурганның бүгү өг-бүлезиниң аразында [3] бүзүрелдии дег, бүзүрелдиг бараан бооп келген.

³Ындыг-даа болза, оран-савага{*} көөрде, ооң тудукчузунуң мактал-хүндүзү артык боору дег, Иисус Моисейден артык алдар-хүндүге төлептиг.

⁴Оран-сава бүрүзүн бир-ле кижи туткан, а бүгү бар чүүлдү Бурган туткан болгай.

⁵Моисей Бурганның бүгү өг-бүлезиниң аразынга бүзүрелдиг бараан болукчу дег болган, ооң бараан болуушкуну келир үеде медеглээр ужурлуг чүүлдү айтып турган.

⁶А Христос Бурганның өг-бүлезин башкарган Оглу дег бүзүрелдиг! Чоргаараарывыс идегелди эчизинге чедир коргуш чок сагыыр болзувусса, Бурганның ол өг-бүлези — бис бис.

⁷Ынчангаш Ыдыктыг Сүлдениң чугаалап турары дег: «Бөгүн, Бурганның үнүн дыңнап каан болзуңарза,

⁸ээн ховуга шенелде хүнүнде үймээн үндүрген үеңерде дег, чүректериңер дашталдырбаңар.

⁹Аңаа силерниң ада-өгбеңер Мени шенеп, хынап турганнар, дөртен чыл дургузунда Мээң ажыл-херээм көрүп келгеннер.

¹⁰Ынчангаш Мен ол салгалга килеңней бергеш: „Бо дээрге чүректери үргүлчү будулуп чоруур, Мээң оруктарымны билип албаан улус-тур“ — деп чугаалаан мен.

¹¹Ынчангаш Мен килеңнээштиң: „Олар Мээң амыр-дыжым черинче кирбестер“ — деп даңгыраглаан мен».

¹²Ха-дуңма, силерниң кайыңар-даа дириг Бургандан хая көрүнген, бачыттыг, бүзүревес чүректиг болбазын дээш, кичээниңер.

¹³Харын «бөгүн» деп үе ам-даа барда, бачытка дуурайлатканындан кайыңарның-даа чүрээ дашталбазын дээш, бот-бодуңарны хүннүң-не деткип, сургаңар.

¹⁴Эгезинде бар турган бүзүреливисти эчизинге чедир сагыыр болзувусса, Христос-биле кады чаңгыс баг апарганывыс ол-дур.

¹⁵Ол дугайында Бижилгеде мынча дээн болгай: «Бөгүн, Бурганның үнүн дыңнап кагзыңарза, үймээн үндүрген үеңерде дег, чүректериңер дашталдырбаңар».

¹⁶Бурганның үнүн дыңнааш, Аңаа удур үймээн үндүрген кымнарыл ол? Моисейниң Египеттен үндүрүп эккелген улузу шупту эвес ийикпе?

¹⁷Дөртен чыл дургузунда Бурган кымга килеңнеп келгенил? Бачыт үүлгеткени дээш, ээн ховуга мөчү-сөөгүн салган улуска эвес ийикпе?

¹⁸Олар Ооң амыр-дыжының черинче кажан-даа кирбес деп, Бурган кымга даңгыраглааныл? Ону дыңнавайн барган улуска эвес ийикпе?

¹⁹Ынчангаш Аңаа бүзүревээн болгаш, олар Ооң амыр-дыжының черинче кирип шыдаваанын көрүп тур бис.