Read Ыдыктыг Библия, 2011 К Евреям 5 Bible Online

К Евреям 5 - Ыдыктыг Библия, 2011 bible

К Евреям 5

¹Бурганның дээди бараалгакчызы бүрүзүн улус аразындан шилип алыр. Ол Бурганның мурнунга чонга бараан боор төлээ бооп, улустуң бачыттары дээш өргүл белектерин салыр хүлээлгелиг.

²Шак ындыг Бурганның дээди бараалгакчызы боду база кошкак кижи болгаш, бүдүүлүк-дүмбей, будулган улусче ээ көрнүүчел боор ужурлуг.

³Ол кошкак кижи болган ужурунда, чүгле чоннуң бачыттары дээш эвес, а бодунуң бачыттары дээш база өргүл кылыр ужурлуг.

⁴Кым-даа ындыг мактал-хүндүнү бодунуң туразы-биле хүлээп албас, а Аароннуң кыйгыртканы ышкаш, Бурганга кыйгырткан турар ужурлуг.

⁵Христос база Бурганның дээди бараалгакчызы боорунуң алдар-хүндүзүн Бодунга Боду хүлээп албаан. А Бурган Аңаа мынча дээн: «Сен — Мээң Оглум сен, Мен бөгүн Сээң Адаң апардым».

⁶Бижилгениң өске-бир черинде Ол: «Мелхиседек ышкаш, Сен кезээ мөңгеде Бурганның бараалгакчызы сен» — деп база чугаалаан.

⁷Бодунуң чер кырынга амыдыралының үезинде Иисус Ону өлүмден камгалап шыдаар Бурганга мөргүп, ыыткыр човууртап база карааның чажын төп, чалбарган. Иисусту Бурган Ону хүндүлээни дээш дыңнап каан-даа болза,

⁸Иисус Оглу-даа турган болза, Ол көрүп эрткен хилинчээн дамчыштыр дыңнангыр чорукка өөренип алган.

⁹Иисус болбаазыраңгай апаргаш, Ону тооп дыңнаар бүгү улуска мөңге камгалалдың үнер дөзү болу берген,

¹⁰чүге дээрге Бурган Ону, Мелхиседекти ышкаш, Бодунуң дээди бараалгакчызы кылдыр чарлаан.

¹¹Ол бүгүнүң дугайында оон-даа хөйнү чугаалап боор мен, ынчалза-даа силерге тайылбырлаары берге-дир, чүге дээрге дыңнааш, угааптар шааңар чок-тур.

¹²Шагда-ла башкылар болу бээр ужурлуг улус-тур силер, ынчалза-даа Бурганның сөстериниң кол үндезининиң эге билиглеринге база катап бир-ле кижиге башкыладыры силерге чугула-дыр. Силерге кадыг чем эвес, а сүт херек-тир!

¹³Ынчаарга сүт-биле чемненип турар кижи шын өөредигге дуржулга чок боор, чүге дээрге ол чаш төл хевээр-дир.

¹⁴А кадыг чем чедишкен улуг улуска хамааржыр. Дуржулгага даянгаш, оларның угаан-медерели буянны бузуттан ылгап чаңчыккан-дыр.