Read Ыдыктыг Библия, 2011 Руфь 3 Bible Online

Руфь 3 - Ыдыктыг Библия, 2011 bible

Руфь 3

¹Бир катап Руфтуң кунчуу Ноемин кеннинге мынча дээн: «Кызым, сен ам бодуңнуң чуртталгаң тудуп алырыңны күзээр кижи-дир мен.

²Ынчаарга ооң тараазының ажаакчылары-биле кады ажылдап турганың Вооз — бистиң өг-бүлевистиң чоок кижизи болгаш төреливис эвес-тир бе? [6] Ол бо кежээ шаңга барып, арбайын арыглаар-дыр.

³Чунуп, арыгланып-шеверленип база аянныг хептен кедип алгаш, тараа шаңынче чорувут. Ынчангаш Вооз кежээки чемин чивээнде база ижер суксунун ишпээнде, ооң караанга көзүлбе.

⁴Кажан удуур дей бээрге, удуур черин демдектей көрүп ал. Оон ооң чанынга чеде бергеш, буттарының адаа талазындан чоорганын ажыткаш, чыдып аар сен. Оон ыңай чүнү канчаарыңны ол боду сеңээ чугаалап бээр».

⁵«Чугаалаан чүвеңерниң шуптузун күүседир мен» — деп, Руф харыылаан.

⁶Руф тараа шаңынче чорупкаш, кунчуунуң чагаан бүгү чүвезин хажык чок күүседип каан.

⁷Вооз кежээки чемин чип база ижер суксунун ижип алгаш, сагыш-сеткили чазык апарып, бөлүп каан хөй тараа артынга удуп чыдыпкан. Ынчан Руф оожум чедип келгеш, ооң буттарының дужундан чоорганын ажыткаш, чыдып алган.

⁸Орай дүне Вооз сырбаш кылдыр оттуп келгеш, хенертен бодунуң буттарының адаанда чыдар херээжен кижини эскерип каан.

⁹«Кым сен?» — деп, ол айтырган. Демгизи: «Силерниң чалчаңар Руф-дур мен. Камгалакчым болгай силер. Чалгыныңар адаанга мени кызып ап көрүңер» — деп харыылаан.

¹⁰Вооз: «Дээрги-Чаяакчы сеңээ ачы-буянын көргүссүн, кызым. Бодуңга ядыы-даа, бай-шыдалдыг-даа үе-чергең дилеп чорбайн, улгады берген Воозту хүндүлеп көргениң Ноеминге көргүскен энерелиңден-даа артык-тыр — деп чугаалаан. —

¹¹Дүвүреве, кызым, сээң дилээңни күүседир мен, сени бүдүштүг херээжен дээрзин бүгү хоорай билир болгай.

¹²Ынчалза-даа сээң камгалакчың болурум шын-даа болза, менден-даа чоок төрел-камгалакчың бар болгай.

¹³Маңаа дүннү чарып ал, а эртен, бир эвес ол кижи сени камгалаарын — кадай кылып алырын күзээр болза, камгалап алгай аан. Бир эвес ол сени камгалап алырындан ойталаар чүве болза, дириг Дээрги-Чаяакчының ады-биле даңгыраглаайн: мен сеңээ өгленип алыр мен. Ынчангаш эртенге чедир уду че».

¹⁴Руф бүгү дүннү ооң буттарының адаанга удуп эрттирген, а эртенинде, кажан кижи кожазын танып шыдавас имиртиң турда, туруп келген. Вооз аңаа: «Шаңга херээжен кижи кээп чораан дээрзин кым-даа билбес болзун» — дээн.

¹⁵«Аржыылың уштуп, дыңзыг тут кай» — деп, ол улаштыр чугаалаан. Руф ынчаар кылырга, Вооз аңаа хөй-ле арбайны хемчээп, уруп бергеш, эгин ажыр чүктеп алырынга дузалашкан. Вооз оон хоорайже чорупкан.

¹⁶Кажан Руф кунчуунга чедип кээрге, Ноемин: «Чүү болдуң, кызым?» — деп айтырган. Воозтуң аңаа чүү дээнин, болган чүүлдүң дөгерезин Руф чугаалап берген.

¹⁷«„Кунчууңга хол куруг барба“ дээш, ол меңээ хөй-ле арбай уруп берди» — деп база немеп каан.

¹⁸Кунчуу аңаа: «Ам, кызым, бо херек чүнүң-биле төнери билдинмээнде, шыдамыккай мана. А Вооз бо херекти бөгүн-не албан чогудуптаан шаанда оожургавас боор» — деп чугаалаан.