Read Ыдыктыг Библия, 2011 Руфь 4 Bible Online

Руфь 4 - Ыдыктыг Библия, 2011 bible

Руфь 4

¹А Вооз хоорайже кирер хаалга чанынга чеде бергеш, аңаа олуруп алган. Ол өйде ооң дугайында чугаалап турган төрели бо эртип бар чыткан. Вооз ооң адын адап: «Бээр келем, тала, олурам!» — деп кый дээн. Демги кижи чедип келгеш, олуруп алган.

²Ынчан Вооз хоорайның улуг назылыгларындан он эр кижини кый деп алгаш: «Олуруп көрүңер» — деп оларга чугаалаан. Кырганнар олуруп алган.

³А Вооз төрелинге чугаалап-тыр: «Бистиң акывыс Элимелехтиң черин моав черден ээп чанып келген Ноемин садар деп барган-дыр.

⁴Ол дугайын хоорайның бо орар улуг назылыгларының мурнунга база мында олурар херечилерниң мурнунга сеңээ дыңнадып тур мен. Бир эвес садып алырын күзезиңзе, садып ал, а бир эвес садып албас болзуңза, ойталааның дугайында чугаала, мен ону билип алыйн. Сенден аңгы кым-даа бир дугаарында садып албас ужурлуг, а дараазында ээлчегде мен бар-дыр мен». «Садып алыр мен» — деп, ол кижи харыылаан.

⁵Ынчан Вооз: «Бир эвес сен Ноеминден черни садып алыр апарзыңза, калган төрелиңниң үре-салгалы үзүлбезин дээш, ооң моав кадайы Руфту база кадай кылып алыр апаар сен» — дээн.

⁶А демгизи: «Бодумнуң ажы-төлүмге өнчү чедишпейн баар ирги бе деп сезингеш, Руфту алырындан ойталап тур мен. Мээң бо эргемни сен-не харын ажыглап көр, чүге дээрге мен ону ажыглап шыдавас-тыр мен» — деп чугаалаан.

⁷(Ол үе-шагда израиль чонга садыглажыышкын болгаш орнажыышкынга хамаарышкан айтырыгны быжыглаарда, ооң киржикчилериниң бирээзи идиин ужулгаш, өскезинге тутсур ужурлуг турган. Дугуржулга күштүг деп Израильге шак ынчаар бадыткаттынар чүве-дир.)

⁸Ынчангаш Воозка садып алыышкын эргезин дүжүп берип тура, ол кижи идиин уштуп сунган.

⁹А Вооз аңаа олурган улуг назылыгларга болгаш бүгү чонга чугаалаан: «Көрдүңер бе, силер ам Элимелехтиң бүгү хуу өнчүзүн болгаш Хилеон биле Махлоннуң бүгү хуу өнчүзүн Ноеминден ап турарымның херечилери силер.

¹⁰Ол ышкаш, Махлоннуң ат-сывын дөргүл-төрелиниң, ха-дуңмазының аразынга уламчылаары-биле, ооң үре-салгалын болгаш ат-сывын бо черге арттырары-биле, ооң ээлел черин болгаш өнчү-хөреңгизин өске кижилер холунга киирбези-биле, моав херээжен Руфту кадай кылдыр ап тур мен. Силер ам ооң херечилери силер».

¹¹«Ийе, бис ам — херечилер бис. Израиль чоннуң чаяакчылары — Рахил болгаш Лия оларга ышкаш, бажыңың эргинин артап кирер кадайыңга Дээрги-Чаяакчы ачы-буянын хайырлазын, а сен Эфратка бай-шыырак чуртта, Вифлеемге ат-сураглыг бол — деп, аңаа турган чон болгаш улуг назылыглар харыылаан. —

¹²Аныяк кадайыңның сеңээ божуп бээри, Дээрги-Чаяакчының хайырлаары үре-салгал, Иуда биле Фамарның оглу Фарестиң салгалы дег, өөр-өнер болзун».

¹³Ынчангаш Вооз Руфту бодунга кадай кылдыр ап алгаш, ооң-биле чоок холбажы берген. Дээрги-Чаяакчы Руфту иштелип-саатталы берген кылып каарга, ол оол уруг божуп алган.

¹⁴Ноеминге херээженнер мынча деп турган: «Дээрги-Чаяакчыга алдар! Ол сени ам камгалакчы салгал чок арттырбаан-дыр, Израильге бо чаш төл алдаржызын.

¹⁵Ол сээң амыдыралыңга өөрүшкү-маңнайны эгидип, кыраан назыныңда сеңээ өмек-дөмек болур. А ону божуп берген сеңээ ынак кенниң Руф чеди оолдан-даа артык эки болгай».

¹⁶А Ноемин ам хойнунга олуртур оолдуг болуп, ону ажаап-тежээп эгелээн болгаш бичии оолдуң кижизидикчизи апарган.

¹⁷Кожалары аңаа байыр чедирип, «Ноемин ам оолдуг болду» деп чугаалажып, бичии чашты Овид [7] деп адап кааннар. Ол оол Иессейниң адазы болгаш Давидтиң кырган-ачазы болган.

¹⁸Фарестиң үре-салгалының даңзызы бо-дур: Фарестен Хецрон төрүттүнген.

¹⁹Хецрондан Рам, Рамдан Аминадав төрүттүнген.

²⁰Аминадавтан Наассон, Наассондан Салмон төрүттүнген.

²¹Салмондан Вооз, Воозтан Овид төрүттүнген.

²²Овидтен Иессей, Иессейден Давид төрүттүнген.