Read Twi Asante Gyenesis 16 Bible Online

Gyenesis 16 - Twi Asante bible

Gyenesis 16

¹Na Abram yere Sarai nwo mma no. Na ɔwɔ afenaa bi a ɔyɛ Misraimni a ne din de Hagar.

² Na Sarai ka kyerɛɛ Abram sɛ: Hwɛ, AWURADE asi m’awoɔ ho kwan, enti kɔ m’afenaa nkyɛn, ebia mɛnya ne ho mma. Na Abram tiee Sarai.

³Na Abram tenaa Kanaan asase so mfirinhyia du no, ne yere Sarai faa n’afenaa Hagar a ɔyɛ Misraimni no de no maa ne kunu awareɛ.

⁴Na ɔkɔɔ Hagar ho, na ɔnyinsɛnee. Na ɔhunuu sɛ wanyinsɛn no, ɔbuu n’awuraa animtia.

⁵Na Sarai ka kyerɛɛ Abram sɛ: Asɛmmɔne a wadi me da wo so. Me na mede m’afenaa mato wo kokom, na ɔhunuu sɛ wanyinsɛn nti, ɔbu me animtia. AWURADE mmu me ne wo ntam atɛn.

⁶Ɛnna Abram ka kyerɛɛ Sarai sɛ: Hwɛ, w’afenaa wɔ wo nsam, yɛ no sɛdeɛ ɛyɛ w’ani soɔ. Na Sarai tanee n’ani maa no dwane firii ne nkyɛn.

⁷Na AWURADE bɔfoɔ hunuu no nsuo aniwa bi ho wɔ ɛserɛ so wɔ Sur kwan so nsuo aniwa no ho.

⁸Na ɔbisaa sɛ: Hagar, Sarai afenaa, wofiri he na woreba, na worekɔ he ni? Na ɔse: Mefiri m’awuraa Sarai anim na meredwane.

⁹Na AWURADE bɔfoɔ no ka kyerɛɛ no sɛ: Sane kɔ w’awuraa nkyɛn, na kɔbrɛ wo ho ase ma no.

¹⁰ Na AWURADE bɔfoɔ no ka kyerɛɛ no sɛ: Dɔ na mɛma w’asefoɔ adɔ, na wɔn dodoɔ nti wɔrentumi nkan wɔn.

¹¹Na AWURADE bɔfoɔ no ka kyerɛɛ no sɛ: Hwɛ, woanyinsɛn, na wobɛwo ɔba, na wobɛto ne din Ismael,[9] sɛ AWURADE ate w’amanehunu.

¹² Na ɔbɛyɛ onipa a ɔte sɛ ɛserɛ so afunumu. Ne nsa bɛtia nnipa nyinaa, na nnipa nyinaa nsa atia no, na ɔbɛsɔre atia ne nuanom nyinaa.

¹³Na ɔfrɛɛ AWURADE a ɔne no kasaeɛ no din sɛ: Wone El-roi,[10] na ɔse: Mahunu deɛ ɔhu me no ampa anaa?

¹⁴ Enti wɔfrɛ asubura no sɛ: Beer-lahai-roi,[11] na hwɛ, ɛwɔ Kades ne Bared ntam.

¹⁵Na Hagar woo ɔba maa Abram. Abram frɛɛ ne ba a Hagar woo no no Ismael.

¹⁶Na Hagar woo Ismael maa Abram no, na Abram adi mfeɛ aduɔwɔtwe nsia.