Read Twi Asante Gyenesis 20 Bible Online

Gyenesis 20 - Twi Asante bible

Gyenesis 20

¹ Na Abraham tutu firii hɔ kɔɔ Negeb asase so, na ɔkɔtenaa Kades ne Sur ntam. Na ɔkɔtenaa Gerar nso.

²Ɛhɔ Abraham kaa ne yere Sara ho sɛ: Ɔyɛ me nuabaa. Na Gerar hene Abimelek soma maa wɔbɛfaa Sara.

³Na Onyankopɔn baa Abimelek nkyɛn anadwo daeɛ mu, na ɔka kyerɛɛ no sɛ: Hwɛ, ɔbaa a woakɔfa no no nti, woawu awie, ɛfiri sɛ ɔyɛ ɔbarima bi yere.

⁴Nso na Abimelek nnya mfaa ne ho nkaa no. Na ɔkaa sɛ: AWURADE, wobɛkum ɔman tenenee nso?

⁵Ɛnyɛ ɔno na ɔka kyerɛɛ me sɛ: Me nua ne no? Na ɔbaa no nso kaa sɛ: Me nua ne no. M’akomam kann ne me tirim fitaa na mede meyɛɛ yei.

⁶Na Onyankopɔn ka kyerɛɛ no daeɛ mu sɛ: Me nso menim sɛ w’akomam kann na wode yɛɛ yei, na me nso mesɔɔ wo mu, na woanyɛ bɔne, ɛno nti na mamma woamfa wo ho anka no no.

⁷ Na afei dane ɔbarima no yere kɔma no, ɛfiri sɛ ɔyɛ odiyifoɔ, na wapa kyɛw ama wo, na woanya nkwa; na sɛ woannane no ankɔma no a, ɛnneɛ, hunu sɛ wuo na wobɛwuo, wo ne deɛ ɛwɔ woɔ nyinaa.

⁸Na Abimelek sɔree anɔpatutu frɛɛ ne nkoa nyinaa, na ɔkaa nsɛm yi nyinaa guu wɔn aso mu, na nnipa no suroo pii.

⁹Na Abimelek frɛɛ Abraham ka kyerɛɛ no sɛ: Ɛdeɛn na woayɛ yɛn yi, na bɔne bɛn na mayɛ woɔ, na wode bɔne kɛseɛ yi aba me ne m’ahennie soɔ? Adeɛ a wɔnyɛ na woayɛ me yi.

¹⁰Na Abimelek ka kyerɛɛ Abraham sɛ: Ɛdeɛn na wohunuiɛ na wodii saa asɛm yi?

¹¹Na Abraham kaa sɛ: Ɛfiri sɛ mesusuu sɛ, ampa Onyankopɔn ho suro nni ha yi, na me yere nti wɔbɛku me.

¹²Nanso ɛwom ampa sɛ ɔyɛ me nua; m’agya ba ne no, na ɛnyɛ me na ba a; na wayɛ me yere.

¹³Na Onyankopɔn maa mefirii m’agya fie mebɛkyiniiɛ no, mesee ɔbaa no sɛ: W’adɔeɛ a wobɛyɛ me ne sɛ, baabiara a yɛbɛduro no, ka no me ho sɛ: Ɔyɛ me nua.

¹⁴Ɛnna Abimelek faa nnwan ne anantwie ne nkoa ne mfenaa de maa Abraham, na ɔdanee ne yere Sara maa no.

¹⁵Na Abimelek kaa sɛ: Hwɛ, m’asase na ɛda w’anim yi, baabiara a ɛyɛ wɔ w’ani soɔ no, tena.

¹⁶Na Sara deɛ, ɔka kyerɛɛ no sɛ: Hwɛ, mama wo nua nnwetɛbena apem, hwɛ, ɛno na wɔn a wɔka wo ho nyinaa de bɛhunu wo tirim, na wo ho afi nnipa nyinaa anim.

¹⁷Na Abraham bɔɔ Onyankopɔn mpaeɛ, na Onyankopɔn saa Abimelek ne ne yere ne ne mfenaa yadeɛ maa wɔwowoe.

¹⁸Ɛsiane Abraham yere Sara ho asɛm no nti, na AWURADE ato Abimelek fiefoɔ mmaa nyinaa yafunu mu.