Read Twi Asante Gyenesis 24 Bible Online

Gyenesis 24 - Twi Asante bible

Gyenesis 24

¹ Na Abraham abɔ akɔkoraa, na wadi nna pii, na AWURADE ahyira no ade nyinaa mu.

² Na Abraham ka kyerɛɛ ne fie asomfoɔ mu panin a ɔhwɛ deɛ ɔwɔ nyinaa soɔ sɛ: Fa wo nsa ka m’asene mu,

³ na mɛma woaka AWURADE, ɔsoro Nyankopɔn ne asase Nyankopɔn, ntam sɛ worenware Kanaanfoɔ a mete wɔn mu yi mmammaa mu bi mma me ba.

⁴Na kɔ me kuro ne m’abusua mu kɔware yerɛ ma me ba Isak.

⁵Na ɔsomfoɔ no ka kyerɛɛ no sɛ: Ebia ɔbaa no rempɛ sɛ ɔbɛdi m’akyiri aba asase yi soɔ; ɛnneɛ memfa wo ba no mensane menkɔ asase a wofiri so baeɛ no so anaa?

⁶Na Abraham ka kyerɛɛ no sɛ: Hwɛ yie, na woamfa me ba ansane ankɔ hɔ bio.

⁷ AWURADE, ɔsoro Nyankopɔn a ɔfaa me firii m’agya fie ne asase a wɔwoo me wɔ soɔ no so, na ɔne me kasaeɛ, na ɔkaa ntam kyerɛɛ me sɛ: W’asefoɔ na mede asase yi bɛma wɔn no, ɔbɛsoma ne bɔfoɔ adi w’anim, na woakɔware yerɛ afiri hɔ abrɛ me ba.

⁸Na sɛ ɔbaa no mpɛ sɛ ɔdi w’akyiri a, ɛnneɛ wo ho afi me ntam yi mu, nanso mfa me ba nsane nkɔ hɔ bio.

⁹Na ɔsomfoɔ no de ne nsa kaa ne wura Abraham asene mu, na ɔkaa no ntam wɔ asɛm no ho.

¹⁰ Na ɔsomfoɔ no faa ne wura yoma mu du, na ɔkɔe, na ɔkura ne wura nnepa ahodoɔ nyinaa bi. Na ɔsɔre sii mu kɔɔ Mesopotamia, Nahor kuro mu.

¹¹Na ɔmaa ne yoma no butuu kuro no kurotia wɔ asubura bi ho anwummerɛ a mmaa bɛsa nsuo.

¹²Na ɔbɔɔ mpaeɛ sɛ: AWURADE, me wura Abraham Nyankopɔn, mesrɛ wo, ma no nsi me yie nnɛ, na yɛ me wura Abraham adɔeɛ.

¹³Hwɛ, meregyina asubura yi so ha; na kurom hɔfoɔ mmammaa bɛfiri abɛsa nsuo.

¹⁴Na ma no mmra sɛ ababaa a mɛse no sɛ: Soɛ w’ahina ma mennom nsuo no bi, na ɔbɛka sɛ: Nom, na mɛma wo yoma no anom bie no, ma ɔno ara nyɛ deɛ woayi no ama w’akoa Isak, na ɛno mu na mɛhunu sɛ woayɛ me wura adɔeɛ.

¹⁵ Na ɔnnya nwiee kasa no, hwɛ, Rebeka baeɛ a n’ahina si ne batiri so. Ɔyɛ Betuel a ɔyɛ Abraham ne nua Nahor yere Milka ba.

¹⁶Na ababaa no ho yɛ fɛ sɛ, ɔyɛ ɔbaabunu ɛfiri sɛ na ɔbarima biara nhunuu no da. Na ɔkɔɔ asubura no mu kɔhyɛɛ n’ahina ma, na ɔbae.

¹⁷Na ɔsomfoɔ no tuu mmirika kɔhyiaa no sɛ: Mesrɛ wo, ma mennom w’ahina yi mu nsuo kakra.

¹⁸Na ɔse: Me wura, nom bi! Na ɔyɛɛ ntɛm soɛɛ n’ahina no sii ne nsam maa no nomee.

¹⁹Na ɔmaa no nom wieeɛ no, ɔkaa sɛ: Mɛkɔ makɔsa bi mabrɛ wo yoma no nso akɔsi sɛ wɔbɛwie nom.

²⁰Na ɔyɛɛ ntɛm kɔhwiee n’ahina mu nsuo no guu anomeeɛ hɔ, na ɔtutuu mmirika kɔɔ abura no mu bio kɔsaa nsuo, na ɔsa maa ne yoma no nyinaa.

²¹Na ɔbarima no hwɛɛ no ara, na ɔyɛɛ komm sɛ ɔbɛhunu sɛ AWURADE ama ne kwankorɔ no ayɛ dwoodwoo anaasɛ ɛnte saa.

²² Na yoma no wiee nsuo nom no, ɔbarima no yii sika hwenemkaa a ano si dwetɛbena fa ne nsa so nkapo mmienu a ano si sikabena du de hyɛɛ no.

²³Na ɔbisaa no sɛ: Hwan ba ne wo? Mesrɛ wo, kyerɛ me! Yɛbɛnya daberɛ wɔ w’agya fie anaa?

²⁴Na ɔbuaa no sɛ: M’agya ne Betuel a ɔyɛ Nahor ne Milka ba no.

²⁵Na ɔtoaa so sɛ: Yɛwɔ ɛserɛ ne mmoa aduane pii ne deɛ mobɛda.

²⁶Na ɔbarima no bɔɔ ne mu ase sɔree AWURADE.

²⁷Na ɔkaa sɛ: Nhyira nka AWURADE, me wura Abraham Nyankopɔn a wamma n’adɔeɛ ne ne nokorɛ ammɔ me wura. Na me nso, AWURADE akyerɛ me me wura nuanom fie kwan.

²⁸Na ababaa no tuu mmirika kɔkaa saa nsɛm yi kyerɛɛ ne na fiefoɔ.

²⁹Na Rebeka wɔ nuabarima bi a ne din de Laban. Na Laban de mmirika firii adi kɔɔ ɔbarima no nkyɛn wɔ asubura no ho.

³⁰Na ɔhunuu hwenemkaa ne ne nsa so nkapo no, na ɔtee ne nua Rebeka nsɛm no sɛ: Sɛdeɛ ɔbarima no kasa kyerɛɛ me nie no, ɔbaa ɔbarima no nkyɛn. Na hwɛ, na ɔgyina yoma no nkyɛn, asubura no ho.

³¹Na ɔkaa sɛ: Wo a AWURADE ahyira woɔ, bra, adɛn nti na wogyina kurotia? Na masiesie ɛdan mu, ne baabi nso mama yoma no.

³²Na ɔbarima no kɔɔ fie, na ɔyii yoma no so nnoɔma maa no ɛserɛ ne aduane, na ɔmaa ɔno ne nnipa a wɔka ne ho no nsuo sɛ wɔnhohoro wɔn nan ase.

³³Na wɔde aduane bɛsii n’anim sɛ ɔnni. Nanso ɔkaa sɛ: Merennidi gye sɛ mabɔ m’amanneɛ ansa. Na ɔse: Bɔ na yɛn ntie ɛ!

³⁴Na ɔse: Abraham somfoɔ ne me.

³⁵Na AWURADE ahyira me wura pii na wayɛ ɔkɛseɛ. Na wama no nnwan ne anantwie, dwetɛ ne sika kɔkɔɔ, nkoa ne mfenaa, ne yoma ne mfunumu.

³⁶Na me wura yere Sara awo ba wɔ ne mmerewaberɛ mu ama me wura, na ɔde deɛ ɔwɔ nyinaa ama no.

³⁷Na me wura ama maka ntam sɛ: Nware Kanaanfoɔ a mete wɔn asase soɔ yi mmammaa mu bi mma me ba.

³⁸Na mmom kɔ m’agya fie ne m’abusua mu kɔware yerɛ brɛ no.

³⁹Na mebisaa me wura sɛ: Na sɛ ɔbaa no anni m’akyi ɛ?

⁴⁰ Na ɔka kyerɛɛ me sɛ: AWURADE a menam n’anim no bɛsoma ne bɔfoɔ aka wo ho, na wama wo kwan so ayɛ dwoodwoo, na woakɔware yerɛ wɔ m’abusua mu ne m’agya fie abrɛ me ba;

⁴¹Ɛno na sɛ wokɔ m’abusua mu, na wɔamma wo bi a, ɛnneɛ na wo ho afi me ntam no mu.

⁴²Na mebaa asubura no ho nnɛ kaa sɛ: AWURADE, me wura Abraham Nyankopɔn, sɛ wo ara worema me kwan a meretuo yi ayɛ dwoodwoo a,

⁴³hwɛ, megyina asubura yi ho, na ma no mmra sɛ ababaa a ɔbɛfiri abɛsa nsuo no, na mɛse no sɛ: Mesrɛ wo, ma me w’ahina yi mu nsuo kakra mennom,

⁴⁴na ɔbɛka akyerɛ me sɛ: Nom, na menkɔsa bi memmrɛ wo yoma no nso no, ma ɔno ara nyɛ ɔbaa a AWURADE ayi no ama me wura ba.

⁴⁵Na mennya menwiee m’akoma mu kasa no, hwɛ, Rebeka firii adi bae a ahina si ne mmatiri soɔ, na ɔkɔɔ abura no mu kɔsaa nsuo. Na mesee no sɛ: Mesrɛ wo, ma me bi mennom.

⁴⁶Na ɔyɛɛ ntɛm soɛɛ n’ahina no kaa sɛ: Nom, na mɛma wo yoma no nso bi anom. Na menomee, na ɔmaa yoma no nso bi nomee.

⁴⁷ Na mebisaa no sɛ: Hwan ba ne wo? Na ɔse: M’agya ne Betuel a ɔyɛ Nahor ne Milka ba no. Na mede ɛhwenemkaa no mesɛnee ne hwenem, na mede nkapo no mehyehyɛɛ ne nsa,

⁴⁸na mebɔɔ me mu ase mesɔree AWURADE, na mehyiraa AWURADE, me wura Abraham Nyankopɔn a ɔkyerɛɛ me nokorɛ kwan sɛ menkɔware me wura nua ba memma ne ba no.

⁴⁹Na afei sɛ mo ara moreyɛ me wura adɔeɛ adi no nokorɛ a, monka nkyerɛ me; na sɛ ɛnte saa a, monka nkyerɛ me, na mennane memfa nifa anaa benkum.

⁵⁰Ɛnna Laban ne Betuel buaa sɛ: AWURADE na asɛm yi firi no, yɛrentumi nka no papa anaa bɔne nkyerɛ wo.

⁵¹Hwɛ, Rebeka na ɔgyina w’anim yi, fa no kɔ ma no nkɔyɛ wo wura ba yere, sɛdeɛ AWURADE aka no.

⁵²Na Abraham somfoɔ no tee wɔn nsɛm no, ɔkotoo fam sɔree AWURADE.

⁵³Na ɔsomfoɔ no yii dwetɛ nnwinneɛ ne sika kɔkɔɔ nnwinneɛ ne ntadeɛ de maa Rebeka; na ɔde nnoɔma a ɛsom boɔ maa ne nuabarima ne ne na.

⁵⁴Na ɔne nnipa a wɔka ne ho no didii na wɔnomeeɛ no, wɔdaa hɔ anadwo no. Na wɔsɔree anɔpa no, ɔkaa sɛ: Monnya me kwan, na menkɔ me wura nkyɛn.

⁵⁵Na ne nua ne ne na kaa sɛ: Ma ababaa no ntena yɛn nkyɛn nna tiaa bi sɛ dadu ansa na woakɔ.

⁵⁶Na ɔka kyerɛɛ wɔn sɛ: Monnsi me kwan, ɛfiri sɛ AWURADE ama m’akwantuo no asi me yie. Monnya me kwan mma menkɔ me wura nkyɛn.

⁵⁷Na wɔse: Ma yɛmfrɛ ababaa no mmisa ɔno ara.

⁵⁸Na wɔfrɛɛ Rebeka ka kyerɛɛ no sɛ: Wo ne ɔbarima yi bɛkɔ anaa? Na ɔse: Mɛkɔ.

⁵⁹Na wɔgyaa wɔn nua Rebeka ne n’abaawa panin ne Abraham somfoɔ no ne ne nnipa no kwan.

⁶⁰ Na wɔhyiraa Rebeka see no sɛ: Yɛn nuabaa, dane mpem du ahodoɔ mpem mpem, na w’asefoɔ mfa wɔn atamfoɔ apono nni.

⁶¹Na Rebeka ne ne mmaawa sɔree, na wɔtenatenaa yoma so dii ɔbarima no akyi, na ɔsomfoɔ no de Rebeka sii mu kɔe.

⁶² Na Isak firi Lahai-roi abura ho bae, ɛfiri sɛ na ɔte Negeb asase no so.

⁶³Na Isak firii adi kɔɔ wiram anwummerɛ kɔdwennwenee ne nsɛm ho. Na ɔmaa n’ani so hwɛe, na hwɛ, yoma reba.

⁶⁴Na Rebeka maa n’ani so, na ɔhunuu Isak no, ɔfirii yoma no so sii fam.

⁶⁵Na ɔka kyerɛɛ ɔsomfoɔ no sɛ: Ɔbarima bɛn na ɔnam wira mu rebɛhyia yɛn yi? Na ɔsomfoɔ no se: Ɛyɛ me wura. Na ɔfaa ne nkatanimu de kataa n’anim.

⁶⁶Na ɔsomfoɔ no kaa deɛ ɔyɛeɛ no nyinaa kyerɛɛ Isak.

⁶⁷ Na Isak de no kɔɔ ne na Sara ntomadan mu, na ɔwaree Rebeka, na ɔyɛɛ no ɛyerɛ, na ɔdɔ no. Na Isak werɛ kyekyeree, ne na wuo no akyi.