Read Twi Asante Gyenesis 3 Bible Online

Gyenesis 3 - Twi Asante bible

Gyenesis 3

¹ Na ɔwɔ yɛ aniteɛ kyɛne wiram mmoadoma a AWURADE Nyankopɔn yɛɛ wɔn nyinaa. Na ɔbisaa ɔbaa no sɛ: Ampa ara sɛ Onyankopɔn aka akyerɛ mo sɛ: Monnni turom ha nnua nyinaa bi?

² Na ɔbaa no buaa ɔwɔ no sɛ: Turom ha nnua aba no, yɛdi bi;

³ nanso dua a ɛsi turo no mfimfini no aba deɛ, Onyankopɔn aka sɛ: Monnni bi, nso mommfa mo nsa nnka, na moanwu.

⁴ Na ɔwɔ no ka kyerɛɛ ɔbaa no sɛ: Ɛnyɛ wuo na mobɛwuo;

⁵na Onyankopɔn nim sɛ da a mobɛdi bie no, mo ani bɛbue, na moayɛ sɛ Onyankopɔn[4] ahunu papa ne bɔne.

⁶ Na ɔbaa no hunuu sɛ dua no yɛ sɛ wɔdie, na ɛyɛ aniwa fɛ, ɛyɛ akɔnnɔ, na ɛbɛte ani, enti ɔtee n’aba bi, na ɔdii, na ɔde bi maa ne kunu a ɔka ne ho no nso, na ɔdii.

⁷ Na wɔn baanu ani buebuee, na wɔhunuu sɛ wɔdeda adagya, enti wɔpempam borɔdɔma ahahan yɛɛ nkatanim fae.

⁸ Na wɔtee AWURADE Nyankopɔn nka sɛ ɔnam turom hɔ wɔ anwummerɛ mferɛ mu. Na Adam ne ne yere kɔhunta firii AWURADE Nyankopɔn anim wɔ turom hɔ nnua mu.

⁹Na AWURADE Nyankopɔn frɛɛ Adam, na ɔbisaa no sɛ: Wowɔ he?

¹⁰Na ɔse: Metee wo nka wɔ turom hɔ no, mesuroe, ɛfiri sɛ meda adagya, na mehuntae.

¹¹Na ɔbisaa no sɛ: Hwan na ɔka kyerɛɛ wo sɛ woda adagya? Dua a mehyɛɛ wo sɛ nni bie no na woadie yi?

¹²Na Adam kaa sɛ: Ɔbaa no a wode no bɛkaa me ho no, ɔno na ɔmaa me dua no aba no bie, na mediiɛ.

¹³ Na AWURADE Nyankopɔn ka kyerɛɛ ɔbaa no sɛ: Adɛn na woyɛɛ saa? Na ɔbaa no se: Ɔwɔ no na ɔdaadaa me, maa mediiɛ.

¹⁴ Na AWURADE Nyankopɔn ka kyerɛɛ ɔwɔ no sɛ: Ɛnam sɛ woayɛ yei nti, wɔadome wo ntɔteboa ne wiram mmoadoma nyinaa mu. Wo yafunu so na wobɛnanteɛ, na woadi dɔteɛ wo nkwa nna nyinaa.

¹⁵ Na mede ɔtan bɛto wo ne ɔbaa no ntam, ɛne w’asefoɔ ne n’asefoɔ ntam; ɔno na ɔbɛbɔ wo tire, na wo nso woaka ne nantin.

¹⁶ Ɔbaa no deɛ, ɔka kyerɛɛ no sɛ: Dɔ na mɛma wo yea ne wo nyinsɛn mu brɛ adɔɔso. Yea mu na wobɛwo mma, na w’ani bɛgyina wo kunu, na ɔno na ɔbɛdi wo soɔ.

¹⁷ Na Adam deɛ, ɔka kyerɛɛ no sɛ: Sɛ woatie wo yere nne, na woadi dua a mehyɛɛ wo sɛ nnie no bie nti, wo nti wɔadome asase. Yea mu na wobɛdidi soɔ wo nkwa nna nyinaa.

¹⁸Na nkasɛɛ ne nnɛnkyɛnse na ɛbɛfifiri ama woɔ, na woadi afuo mu ahahan.

¹⁹ W’anim fifire mu na wobɛdidie de akɔsi sɛ wobɛsane akɔ dɔteɛ mu, ɛfiri sɛ emu na wɔyii wo firiiɛ; na woyɛ dɔteɛ, na dɔteɛ mu na wobɛsane akorɔ.

²⁰Na Adam too ne yere din Hawa, ɛfiri sɛ ɔno na ɔyɛ ateasefoɔ nyinaa na.

²¹Na AWURADE Nyankopɔn yɛɛ nwoma ntadeɛ maa Adam ne ne yere de hyɛɛ wɔn.

²² Na AWURADE Nyankopɔn kaa sɛ: Hwɛ, onipa no ayɛ sɛ yɛn mu baako, ahunu papa ne bɔne. Na afei, deɛ ɛbɛyɛ na wantene ne nsa ante nkwa dua no nso bi anni antena ase daa nti,

²³AWURADE Nyankopɔn tuu no firii Eden turom hɔ sɛ ɔnkɔdɔ asase a wɔfaa no firii mu no.

²⁴ Na ɔpamm onipa no, na ɔde Kerubim[5] ne ogyaframa afena a ɛdi ahim bɛsii Eden turo no anim apueeɛ fam sɛ wɔnwɛn ɔkwan a ɛde kɔ nkwa dua no ho no.