Read Twi Asante Gyenesis 33 Bible Online

Gyenesis 33 - Twi Asante bible

Gyenesis 33

¹ Na Yakob maa n’ani so hunui, na hwɛ, Esau reba, na mmarima ahanan ka ne ho. Na ɔkyɛɛ ne mma mu maa Lea ne Rahel ne mmaawa baanu no.

²Na ɔde mmaawa no ne wɔn mma dii anim, na Lea ne ne mma dii hɔ, na Rahel ne Yosef dii akyire.

³Na ɔno ara deɛ ɔsene dii wɔn anim, na ɔbɔɔ ne mu ase kɔɔ fam mprɛnson de kɔsii sɛ ɔduruu ne nua nkyɛn.

⁴Na Esau tuu mmirika bɛhyiaa no yɛɛ no atuu, na ɔde ne tiri too ne kɔn ho, na ɔfee n’ano, na wɔsui.

⁵ Na Esau maa n’ani so hunuu mmaa no ne wɔn mma no, ɔkaa sɛ: Hwannom ne yeinom a wɔka wo ho yi? Na Yakob buaa sɛ: Ɛyɛ mma a Onyankopɔn de adom w’akoa.

⁶Na mmaawa no twe pinii, wɔn ne wɔn mma, na wɔbobɔɔ wɔn mu ase.

⁷Na Lea nso ne ne mma twe pinii bobɔɔ wɔn mu ase, na akyire yi no Yosef ne Rahel twe pinii bobɔɔ wɔn mu ase.

⁸ Na ɔkaa sɛ: Na ɛdɔm a mehyiaa wɔn yi ase ne sɛn? Na ɔse: Sɛdeɛ ɛbɛyɛ na mɛnya me wura anim adom.

⁹Na Esau kaa sɛ: Deɛ mewɔ dɔɔso, me nua, ma w’adeɛ ntena hɔ mma wo.

¹⁰ Na Yakob kaa sɛ: Dabi da, mesrɛ wo, sɛ manya w’anim adom a, gye m’ayɛyɛdeɛ a ɛwɔ me nsam yi, na w’anim a mahunu yi te sɛdeɛ obi hunu Nyankopɔn anim, ɛfiri sɛ w’ani asɔ me.

¹¹ Mesrɛ wo, gye nhyira a wɔde abrɛ woɔ yi, ɛfiri sɛ Onyankopɔn adom me, na mewɔ ade nyinaa. Na ɔhyɛɛ no, na ɔgyee.

¹²Na Esau kaa sɛ: Ma yɛnsim nkɔ, na menni w’anim.

¹³Na ɔka kyerɛɛ no sɛ: Me wura nim sɛ mma a wɔyɛ mmerɛ ne nnwan ne anantwie a wɔma nufoɔ ka me ho, na sɛ wɔpia wɔn dodo da koro a, nnwankuo no nyinaa bɛwuwu.

¹⁴Enti ma me wura nsene nni n’akoa anim, na me deɛ, mɛnante brɛoo, sɛdeɛ mmoa a wɔdi m’anim ne mma no bɛtumi de akɔsi sɛ mɛduru me wura nkyɛn wɔ Seir.

¹⁵Na Esau kaa sɛ: Ma mennya wo nnipa a wɔka me ho yi bi. Na ɔse: Na wɔnyɛ dɛn? Ma mennya me wura anim adom.

¹⁶Ɛnna Esau sanee da no ara sii kwan so kɔɔ Seir.

¹⁷Na Yakob sii mu kɔɔ Sukot, na ɔsii dan maa ne ho, na ɔbobɔɔ asese maa ne mmoa. Yei nti na wɔfrɛ hɔ Sukot.[45]

¹⁸Na Yakob firii Mesopotamia no, ɔnam bɛduruu Sekem kuro a ɛwɔ Kanaan asase soɔ no mu dwoodwoo, na ɔsisii ne ntomadan wɔ kuro no anim.

¹⁹ Na ɔtɔɔ asase a ɔsii ne ntomadan wɔ soɔ no wɔ Sekem agya Hamor mma nkyɛn nnwetɛbena ɔha.

²⁰ Na ɔsii afɔrebukyia wɔ hɔ, na ɔtoo no: El-elohe-Israel.[46]