Read Twi Asante Gyenesis 34 Bible Online

Gyenesis 34 - Twi Asante bible

Gyenesis 34

¹ Na Lea ne Yakob babaa Dina firii adi sɛ ɔrekɔhwɛ asase no so mmaa.

²Na asase no so otitire Hewini Hamor ba Sekem hunuu no, na ɔkyeree no too no mmɔnaa guu ne ho fi.

³Na Yakob ba Dina sɔɔ Sekem ani, na ɔdɔɔ ababaa no, na ɔkorɔkorɔɔ no.

⁴Na Sekem ka kyerɛɛ n’agya Hamor sɛ: Kɔgye ababaa yi awareɛ ma me.

⁵Na Yakob tee sɛ wagu ne babaa Dina ho fi. Nanso ɛnam sɛ na ne mmammarima no wɔ ne mmoa nkyɛn wɔ wiram no, enti ɔyɛɛ komm de kɔsii sɛ wɔbaa fie.

⁶Na Sekem agya Hamor firii adi kɔɔ Yakob nkyɛn sɛ ɔne no rekɔkasa.

⁷ Na Yakob mmammarima teeɛ no, wɔfirii wiram bae. Na ɛyɛɛ mmarima no ya, na wɔn bo fuu pa ara, sɛ Sekem adi Israel ho nkwaseasɛm sɛ ɔne Yakob babaa akɔda; adeɛ a ɛnsɛ sɛ wɔyɛ.

⁸Na Hamor ne wɔn kasaa sɛ: Me ba Sekem akoma fam mo babaa no ho; mesrɛ mo, momfa no mma no aware.

⁹Na mo ne yɛn nni ayewareɛ, na momfa mo mmammaa mma yɛn, na mo nso monware yɛn mmammaa.

¹⁰Na mo ne yɛn ntena, na asase na ɛda mo anim yi, montena so nyɛ so adwuma nnya so adeɛ.

¹¹Na Sekem ka kyerɛɛ Dina n’agya ne ne nuanom sɛ: Momma mennya mo anim adom, na biribiara a mobɛse me no, mɛma.

¹² Monnye me etire adeɛ dodoɔ ne akyɛdeɛ biara, na biribiara a mobɛse me no, mɛma; na momfa ababaa no mma me awareɛ.

¹³Na Yakob mmammarima no kasa de nnaadaa buaa Sekem n’agya Hamor ɛfiri sɛ wagu wɔn nuabaa Dina ho fi.

¹⁴Na wɔka kyerɛɛ wɔn sɛ: Yɛntumi saa adeɛ yi yɛ, sɛ yɛde yɛn nua bɛma ɔbarima a ɔyɛ momonoto, ɛfiri sɛ ɛno yɛ ahohora ma yɛn.

¹⁵Na yei mu nko na yɛbɛpene mo sɛ mobɛdane ayɛ sɛ yɛn, na wɔatwitwa mo mu mmarima nyinaa twetia.

¹⁶Ɛno na yɛde yɛn mmammaa bɛma mo, na yɛabɛfa mo mmammaa nso aware, na yɛne mo atena, na yɛayɛ ɔman korɔ.

¹⁷Na sɛ moantie yɛn, na moantwitwa twetia a, ɛnneɛ yɛbɛfa yɛn babaa akɔ.

¹⁸Na wɔn nsɛm no sɔɔ Hamor ne ne ba Sekem ani.

¹⁹Enti Sekem antwetwe ne ho sɛ ɔbɛyɛ saa adeɛ no, ɛfiri sɛ na Yakob babaa no sɔ n’ani, na aberanteɛ no animuonyam sene n’agya fiefoɔ nyinaa.

²⁰Na Hamor ne ne ba Sekem kɔɔ wɔn kuro aboboano, na wɔne wɔn kurom mmarima kɔkasaa sɛ:

²¹Nnipa yi, wɔne yɛn te asomdwoeɛ mu, enti momma wɔntena asase yi so, na wɔnyɛ so adwuma. Na asase yi, hwɛ, ɛda wɔn anim kakraa. Momma yɛmfa wɔn mmammaa nware, na yɛmfa yɛn mmammaa nso mma wɔn.

²²Na yei nko mu na nnipa no bɛpene sɛ wɔne yɛn bɛtena, na yɛayɛ ɔman korɔ; sɛ yɛn mu mmarima nyinaa bɛtwitwa twetia, sɛdeɛ wɔatwitwa no.

²³Wɔn mmoa ne wɔn ahonyadeɛ ne wɔn afieboa nyinaa renyɛ yɛn dea anaa? Momma yɛmpene so ma wɔn, na wɔne yɛn ntena.

²⁴Na wɔn a wɔnam Hamor kuro pono ano firi adie nyinaa tiee no ne ne ba Sekem, na mmarima nyinaa, wɔn a wɔnam ne kuro pono ano firi adie nyinaa twitwaa twetia.

²⁵ Na da a ɛtɔ so mmiɛnsa a ne yea kaa wɔn no, Yakob mmammarima baanu, Simeon ne Lewi a wɔyɛ Dina nuanom, fefaa wɔn nkrantɛ kɔɔ kuro no so mpofirim kɔkunkumm mmarima nyinaa.

²⁶Na wɔde nkrantɛ kumm Hamor ne ne ba Sekem; na wɔde Dina firii Sekem fie hɔ bae.

²⁷Yakob mmammarima no baa atɔfoɔ no so bɛfom kuro no mu nnoɔma fae, ɛfiri sɛ wɔagu wɔn nua no ho fi.

²⁸Wɔn nnwan, wɔn anantwie, wɔn mfunumu ne deɛ ɛwɔ kuro no mu ne deɛ ɛwɔ mfuo mu no, wɔfae.

²⁹Na wɔn ade nyinaa ne wɔn mma nyinaa ne wɔn yerenom, wɔfaa wɔn nnommum fom deɛ ɛwɔ fie nyinaa.

³⁰ Na Yakob ka kyerɛɛ Simeon ne Lewi sɛ: Moaha me ama me ho abɔn wɔn a wɔte asase yi soɔ, Kanaanfoɔ ne Perisifoɔ. Na me deɛ, meyɛ asafo a mesua yi, wɔbɛboaboa wɔn ano aba me so abɛku me, na wɔasɛe me ne me fie.

³¹Na wɔse: Ɔnyɛ yɛn nuabaa sɛ odwamamfoɔ anaa?