Read Twi Asante Gyenesis 44 Bible Online

Gyenesis 44 - Twi Asante bible

Gyenesis 44

¹Na Yosef hyɛɛ ne fie panin no sɛ: Fa aduane dodoɔ a wɔbɛtumi asoa hyehyɛ nnipa no nkotokuo mu amaama. Fa wɔn mu biara dwetɛ hyɛ ne kotokuo ano,

²na fa me kuruwa, mekyerɛ dwetɛ kuruwa no, hyɛ akumaa no kotokuo ano ka n’aburoo dwetɛ no ho. Na ɔyɛɛ sɛdeɛ Yosef kaeɛ no.

³Adeɛ kyeeɛ ara pɛ, na wɔgyaa mmarima no ne wɔn mfunumu kwan.

⁴Wɔfirii kuro no mu kɔeɛ na wɔnnya nnuruu akyirikyiri no, Yosef ka kyerɛɛ ne fie panin no sɛ: Sɔre, ti mmarima no, na sɛ woto wɔn a, ka kyerɛ wɔn sɛ: Adɛn nti na mode bɔne tua papa ka?

⁵Ɛnyɛ yei na me wura nom mu na ɔde yɛ ne nyankomadeɛ anaa? Deɛ moayɛ yi, moayɛ bɔne.

⁶Na ɔkɔtoo wɔn no, ɔkaa nsɛm yi kyerɛɛ wɔn.

⁷Na wɔka kyerɛɛ no sɛ: Adɛn nti na me wura ka saa nsɛm yi? Ɛmpare wo nkoa sɛ wɔbɛyɛ saa adeɛ yi.

⁸ Hwɛ, dwetɛ a yɛhunuu no yɛn nkotokuo ano no, yɛde asane afiri Kanaan asase so abrɛ wo; na ɛbɛyɛ dɛn na yɛbɛwia wo wura fie dwetɛ anaa sika?

⁹Wo nkoa yi mu deɛ wobɛhunu no ne nkyɛn no, ma no nwu, na yɛn nso yɛbɛyɛ me wura nkoa.

¹⁰Na ɔse: Ɛnyɛ sɛdeɛ moseɛ no. Na deɛ wɔbɛhunu no ne nkyɛn no nyɛ m’akoa, na mo deɛ, mobɛdi bem.

¹¹Ɛnna wɔn nyinaa yɛɛ ntɛm soɛsoɛɛ wɔn nkotokuo totoo fam, na wɔsanesanee wɔn nkotokuo ano.

¹²Na ɔhwehwɛe, ɔfirii aseɛ firi ɔpanin no deɛ so de kɔsii akumaa no deɛ so. Na wɔhunuu kuruwa no wɔ Benyamin kotokuo mu.

¹³ Ɛnna wɔsunsuanee wɔn ntadeɛ mu, na wɔde wɔn nnesoa soasoaa wɔn mfunumu sane kɔɔ kuro no mu.

¹⁴Na Yuda ne ne nuanom baa Yosef fie, na ɔda so wɔ hɔ, na wɔhwehwee n’anim ase.

¹⁵Na Yosef ka kyerɛɛ wɔn sɛ: Ɛdeɛn adeɛ na moayɛ yi? Monnim sɛ onipa a ɔte sɛ me nim nkɔmhyɛ anaa?

¹⁶ Na Yuda kaa sɛ: Ɛdeɛn na yɛnse me wura? Na ɛdeɛn na yɛnka? Na yɛnyi yɛn ano sɛn? Onyankopɔn ahunu wo nkoa amumuyɛ. Hwɛ, yɛyɛ me wura nkoa, yɛne deɛ wɔhunuu ne nsam kuruwa no.

¹⁷Na ɔse: Ɛmpare me sɛ meyɛ saa. Na deɛ wɔhunuu kuruwa no wɔ ne nsa mu no, ɔno ara na ɔbɛyɛ m’akoa, na mo deɛ, monsim mfa asomdwoeɛ nkɔ mo agya nkyɛn.

¹⁸Ɛnna Yuda twe pinii no kaa sɛ: Me wura, mesrɛ wo, ma w’akoa nkasa me wura aso mu, na mma wo bo mmfu w’akoa, na wote sɛ Farao ara.

¹⁹ Me wura bisaa ne nkoa sɛ: Mowɔ agya anaa nua bi?

²⁰Na yɛka kyerɛɛ me wura sɛ: Yɛwɔ agya akɔkoraa ne ne nkɔkoraa ba kumaa bi. Ne nua awu, na ne na ba a aka ara ne no, na n’agya dɔ no.

²¹Na woka kyerɛɛ wo nkoa sɛ: Momfa no mmrɛ me, na memfa m’ani menhwɛ no.

²²Na yɛsee me wura sɛ: Abɔfra no ntumi nnya n’agya hɔ, na sɛ ɔgya n’agya hɔ a, n’agya bɛwu.

²³ Na wosee wo nkoa sɛ: Sɛ mo nua kumaa no anka mo ho amma a, monnsi m’anim bio.

²⁴Na yɛkɔɔ w’akoa, m’agya, nkyɛn no, yɛkaa me wura nsɛm no kyerɛɛ no.

²⁵Na yɛn agya ka kyerɛɛ yɛn sɛ: Monsane nkɔtɔ aduane kakra mmrɛ yɛn.

²⁶Na yɛse: Yɛrentumi nsiane nkɔ. Sɛ yɛn nua kumaa no ka yɛn ho a, yɛbɛsiane akɔ. Yɛrentumi nkɔ ɔbarima no anim, gye sɛ yɛn nua kumaa no ka yɛn ho.

²⁷Ɛnna w’akoa, yɛn agya, ka kyerɛɛ yɛn sɛ: Mo ara monim sɛ mma baanu na me yere wo maa me.

²⁸ Na ɔbaako firii me nkyɛn kɔe, na mese: Ampa ara teteɛ na wɔatete no mu, na ɛfiri hɔ no, menhunuu no.

²⁹ Na sɛ mofa oyi nso firi me nkyɛn na mmusuo bi kɔto no a, mode me tiri dwono nam awerɛhoɔ mu na ɛbɛkɔ Asamando.

³⁰Na afei sɛ mekɔ w’akoa, m’agya, nkyɛn na abɔfra yi nka yɛn ho a, — nso n’akoma da abɔfra yi ho, —

³¹ɛbɛba sɛ, sɛ ɔhunu sɛ abɔfra yi nka yɛn ho a, ɔbɛwu, na wo nkoa de w’akoa, yɛn agya, dwono nam awerɛhoɔ mu na ɛbɛkɔ Asamando.

³² Na w’akoa dii abɔfra yi ho agyinamu wɔ m’agya anim sɛ: Sɛ mamfa no mammrɛ wo a, ɛnneɛ na mayɛ m’agya bɔne daa nyinaa.

³³Na afei mesrɛ wo, ma w’akoa ntena ha nsi abɔfra no ananmu nyɛ me wura akoa, na ma abɔfra no ne ne nuanom nkɔ.

³⁴Na sɛ abɔfra no nka me ho a, mɛkɔ m’agya anim sɛn? Ɛnneɛ na merekɔhunu bɔne a ɛbɛto m’agya no.