Read Twi Asante Gyenesis 45 Bible Online

Gyenesis 45 - Twi Asante bible

Gyenesis 45

¹Afei na Yosef ntumi nhyɛ ne ho so wɔ wɔn a wɔgyinagyina ne ho no nyinaa anim, na ɔteaa mu sɛ: Momma nnipa nyinaa mfiri me ho mfiri adi. Na Yosef reyi ne ho adie akyerɛ ne nuanom no, na onipa biara nnyina ne nkyɛn.

²Na ɔmaa ne nne so sui, na Misraimfoɔ no ne Farao fiefoɔ tee.

³Na Yosef ka kyerɛɛ ne nuanom sɛ: Mene Yosef, m’agya da so te ase anaa? Na ne nuanom antumi ammua no, na mmom wɔn ho dwirii wɔn wɔ n’anim.

⁴ Na Yosef ka kyerɛɛ ne nuanom sɛ: Montwe mpini me. Na wɔtwe pinii no. Na ɔse: Mene mo nua Yosef a motɔn no baa Misraim no.

⁵ Na afei mommma no nnyɛ mo ya, nso mo bo mmfu mo ho mo ho sɛ motɔn me baa ha, ɛfiri sɛ nkwagyeɛ nti na Onyankopɔn somaa me dii mo anim.

⁶Na mfeɛ mmienu ni a ɛkɔm aba asase yi soɔ, na aka mfeɛ nnum bio a funtum ne otwa nni mu.

⁷Na Onyankopɔn somaa me dii mo anim sɛ memma monnya nkaeɛ wɔ asase so, na mennye mo nkwa a ɛbɛma dodoɔ no ara afiri mu afire.

⁸ Na afei ɛnyɛ mo na mosomaa me baa ha, na mmom Onyankopɔn na ɔde me abɛyɛ sɛ Farao n’agya ne ne fie nyinaa wura ne Misraim asase nyinaa sodifoɔ.

⁹Monyɛ ntɛm nkɔ m’agya nkyɛn nkɔka nkyerɛ no sɛ: Sɛ wo ba Yosef seɛ nie: Onyankopɔn de me ayɛ Misraim nyinaa so wura. Siane bra me nkyɛn. Nkyɛ!

¹⁰Na bɛtena Gosen asase so, na woabɛn me, wo ne wo mma ne wo nananom ne wo nnwan ne w’anantwie ne deɛ wowɔ nyinaa,

¹¹na mɛhwɛ wo wɔ hɔ, ɛfiri sɛ mfeɛ nnum kɔm da so reba, na ohia anhia wo ne wo fiefoɔ ne deɛ wowɔ nyinaa.

¹²Na hwɛ, mo ani ahunu, na me nua Benyamin nso ani ahunu sɛ m’ano na mede mekasa mekyerɛ mo yi.

¹³Na monka m’animuonyam a mewɔ wɔ Misraim nyinaa nkyerɛ m’agya ne deɛ moahunu nyinaa, na monyɛ ntɛm mfa m’agya nsiane mmra ha.

¹⁴Ɛnna ɔsɔɔ ne nua Benyamin kɔn mu na ɔsuiɛ; na Benyamin nso sui wɔ ne kɔn ho.

¹⁵Na ɔfefee ne nuanom nyinaa ano, na ɔsuu wɔ wɔn so, na ɛno akyiri no ne nuanom no ne no kasae.

¹⁶Na wɔtee nka wɔ Farao fie sɛ: Yosef nuanom aba. Na ɛsɔɔ Farao ne ne nkoa ani.

¹⁷Na Farao ka kyerɛɛ Yosef sɛ: Ka kyerɛ wo nuanom sɛ: Yei na monyɛ: Momfa nnoɔma nsoasoa mo mmoa no, na monkɔ Kanaan asase so

¹⁸nkɔfa mo agya ne mo fiefoɔ mmra me nkyɛn, na mɛma mo Misraim asase so deɛ ɛyɛ, na moadi asase no sradeɛ.

¹⁹Ka kyerɛ wɔn sɛ: Yei na monyɛ. Momfa nteaseɛnam mfiri Misraim asase so nkɔma mo mma ne mo yerenom, na monkɔfa mo agya mmra.

²⁰Na mo nso monnwennwene mo nnoɔma ho, na Misraim asase nyinaa so deɛ ɛyɛ yɛ mo dea.

²¹Na Israel mma no yɛɛ saa. Na Yosef maa wɔn nteaseɛnam sɛdeɛ Farao anomu asɛm seɛ, na ɔmaa wɔn akwansoduane.

²²Ɔmaa wɔn nyinaa ntadeɛ nsakyeraho mmaako mmaako, na Benyamin deɛ, ɔmaa no nnwetɛbena ahasa ne ntadeɛ nsakyeraho nnum.

²³Na deɛ ɔde kɔmaa n’agya nso nie: Mfunumu du a wɔsoso Misraim nnepa no bie ne mfunumubereɛ du a wɔsoso aburoo ne paanoo ne akwansoduane a ɛbɛyɛ n’agya dea.

²⁴ Na ɔgyaa ne nuanom kwan maa wɔkɔe. Na ɔka kyerɛɛ wɔn sɛ: Mo bo nnkɔfu mo ho mo ho wɔ ɔkwan so oo!

²⁵Ɛnna wɔfirii Misraim foro kɔɔ Kanaan asase so wɔn agya Yakob nkyɛn,

²⁶na wɔka kyerɛɛ no sɛ: Yosef da so te ase, na ɔdi Misraim asase nyinaa so. Na ne tirim yɛɛ no naa, ɛfiri sɛ na ɔnnye wɔn nni.

²⁷Na wɔkaa nsɛm a Yosef aka akyerɛ wɔn no nyinaa kyerɛɛ no, na ɔhunuu nteaseɛnam a Yosef asoma de rebɛfa no no, wɔn agya Yakob ho sanee no.

²⁸ Na Israel kaa sɛ: Ɛdɔɔso, me ba Yosef da so te ase. Mɛkɔ makɔhu no ansa na mawu.