Read Twi Asante Gyenesis 5 Bible Online

Gyenesis 5 - Twi Asante bible

Gyenesis 5

¹ Adam awoɔ ntoatoasoɔ nie: Da a Onyankopɔn bɔɔ onipa no, ɔbɔɔ no ne suban so.

²Na ɔbɔɔ ɔbarima ne ɔbaa, na ɔhyiraa wɔn. Na ɔtoo wɔn din onipa.

³ Na Adam dii mfirinhyia ɔha aduasa no, ɔwoo ɔbabarima wɔ ne nsɛsoɔ ne ne suban so, na ɔtoo no din Set.

⁴Na Adam woo Set no akyiri no, ɔdii mfirinhyia ahanwɔtwe, na emu no ɔsane woo mmammarima ne mmammaa.

⁵Na Adam nna a ɔdiiɛ ansa na ɔrewuo nyinaa yɛ mfeɛ ahankron aduasa.

⁶Na Set dii mfirinhyia ɔha ne nnum na ɔwoo Enos.

⁷Na Set woo Enos no akyiri no, ɔdii mfeɛ ahanwɔtwe ne nson, na emu no ɔsane woo mmammarima ne mmammaa.

⁸Na Set nna a ɔdiiɛ ansa na ɔrewuo nyinaa yɛ mfeɛ ahankron ne dummienu.

⁹Na Enos dii mfirinhyia aduɔkron na ɔwoo Kenan.

¹⁰Na Enos woo Kenan no akyiri no, ɔdii mfeɛ ahanwɔtwe ne dunum, na emu no ɔsane woo mmammarima ne mmammaa.

¹¹Na Enos nna a ɔdiiɛ ansa na ɔrewuo nyinaa yɛ mfeɛ ahankron ne nnum.

¹²Na Kenan dii mfirinhyia aduɔson na ɔwoo Ma-halalel.

¹³Na Kenan woo Ma-halalel no akyiri no, ɔdii mfeɛ ahanwɔtwe aduanan, na emu no ɔsane woo mmammarima ne mmammaa.

¹⁴Na Kenan nna a ɔdiiɛ ansa na ɔrewuo nyinaa yɛ mfeɛ ahankron ne du.

¹⁵Na Ma-halalel dii mfirinhyia aduosia nnum na ɔwoo Yared.

¹⁶Na Ma-halalel woo Yared no akyiri no, ɔdii mfeɛ ahanwɔtwe aduasa, na emu no ɔsane woo mmammarima ne mmammaa.

¹⁷Na Ma-halalel nna a ɔdiiɛ ansa na ɔrewuo nyinaa yɛ mfeɛ ahanwɔtwe aduɔkron nnum.

¹⁸Na Yared dii mfirinhyia ɔha aduosia mmienu na ɔwoo Henok.

¹⁹Na Yared woo Henok akyiri no, ɔdii mfeɛ ahanwɔtwe, na emu no ɔsane woo mmammarima ne mmammaa.

²⁰Na Yared nna a ɔdiiɛ ansa na ɔrewuo nyinaa yɛ mfeɛ ahankron aduosia mmienu.

²¹Na Henok dii mfirinhyia aduosia nnum na ɔwoo Metusela.

²² Na Henok woo Metusela no akyiri no, ɔne Onyankopɔn nantee mfirinhyia ahasa, na emu no ɔsane woo mmammarima ne mmammaa.

²³Na Henok nna nyinaa yɛ mfeɛ ahasa aduosia nnum.

²⁴ Na Henok ne Onyankopɔn nantee, na wɔanhunu no bio, ɛfiri sɛ Onyankopɔn faa no kɔe.

²⁵Na Metusela dii mfirinhyia ɔha aduɔwɔtwe nson na ɔwoo Lamek.

²⁶Na Metusela woo Lamek no akyiri no, ɔdii mfeɛ ahanson aduɔwɔtwe mmienu, na emu no ɔsane woo mmammarima ne mmammaa.

²⁷Na Metusela nna a ɔdiiɛ ansa na ɔrewuo nyinaa yɛ mfeɛ ahankron aduosia nkron.

²⁸Na Lamek dii mfirinhyia ɔha aduɔwɔtwe mmienu no ɔwoo babarima.

²⁹ Na ɔtoo ne din Noa, na ɔkaa sɛ: Oyi na ɔbɛkyekyere yɛn werɛ wɔ yɛn nnwuma ne yɛn nsa ano brɛ mu wɔ asase a AWURADE adome no soɔ.

³⁰Na Lamek woo Noa akyiri no, ɔdii mfeɛ ahanum aduɔkron nnum, na emu no ɔsane woo mmammarima ne mmammaa.

³¹Na Lamek nna a ɔdiiɛ ansa na ɔrewuo nyinaa yɛ mfirinhyia ahanson aduɔson nson.

³²Na Noa dii mfirinhyia ahanum no, ɔwoo Sem, Ham ne Yafet.