Read Twi Asante Gyenesis 8 Bible Online

Gyenesis 8 - Twi Asante bible

Gyenesis 8

¹Na Onyankopɔn kaee Noa ne mmoadoma nyinaa ne ntɔteboa nyinaa a wɔne no wɔ adaka no mu nyinaa. Na Onyankopɔn maa mframa bɔ faa asase so, na nsuo no ano brɛɛ ase.

² Na ebunu no nsuo aniwa sisii, na ɔsoro mpomma mu totoe, maa osuo a ɛfiri soro no gyaee tɔ;

³na nsuo no twe firii asase so ara. Na ɛfiri nna ɔha aduonum akyiri no na na nsuo no so rehwan.

⁴Na ɛda a ɛtɔ so dunson wɔ bosome nson mu no, adaka no kɔsii Ararat mmepɔ so.

⁵Na nsuo no kɔɔ so twee ara kɔsii bosome a ɛtɔ so du no so; na saa bosome no ara, ne da a ɛdi kan no na mmepɔ atifi dedaa adie.

⁶Na ɛno akyiri adaduanan no, Noa buee adaka no mpomma a ɔyɛeɛ no,

⁷na ɔsomaa anene. Na ɔfirii adi, na ɔdii akɔneaba de kɔsii sɛ nsuo no wee asase soɔ.

⁸Na ɔsomaa aburuburo sɛ ɔnkɔhwɛ sɛ nsuo no awe wɔ asase ani anaa.

⁹Nanso aburuburo no annya ne nan sibea, na ɔsane baa ne nkyɛn adaka no mu, ɛfiri sɛ na nsuo no da so wɔ asase nyinaa ani. Na ɔtenee ne nsa faa no baa ne nkyɛn wɔ adaka no mu.

¹⁰Na ɔtwɛn nnanson bio, na ɔsomaa aburuburo firii adaka no mu bio.

¹¹Na aburuburo no baa ne nkyɛn anwummerɛ, na hwɛ, ngo dua ahahan frɔmfrɔm tua n’ano. Noa hunuu sɛ nsuo no awe asase so.

¹²Na ɔtwɛn nnanson bio no, ɔsomaa aburuburo no; na wansane amma ne nkyɛn bio.

¹³Na Noa afe a ɛtɔ so ahansia ne baako, bosome a ɛdi kan no da a ɛdi kan no na na nsuo no awe asase soɔ. Na Noa yii suhyɛ no firii adaka no so, na ɔhwɛe, na hwɛ, na asase ani awo.

¹⁴Bosome a ɛtɔ so mmienu no da a ɛtɔ so aduonu nson no na na asase so awo koraa.

¹⁵Na Onyankopɔn kasa kyerɛɛ Noa sɛ:

¹⁶Firi adaka no mu, wo ne wo yere, wo mma ne wɔn yerenom a wɔka wo ho;

¹⁷ mmoadoma a wɔka wo ho nyinaa a ɛfiri honam nyinaa mu, nnomaa ne ntɔteboa ne deɛ ɛwea asase soɔ nyinaa ne wo mfiri adi, na wɔnwo, na wɔnnɔɔso asase so.

¹⁸ Na Noa ne ne yere, ne ne mma ne wɔn yerenom firii adi;

¹⁹mmoadoma nyinaa, wɔn a wɔwea nyinaa ne nnomaa nyinaa, ne deɛ nkwa wɔ mu biara, sɛdeɛ wɔn mmoaban teɛ, firi adaka no mu firii adi.

²⁰ Na Noa sii afɔrebukyia maa AWURADE, na ɔfaa ntɔteboa a wɔn ho teɛ nyinaa mu bi ne nnomaa a wɔn ho teɛ nyinaa mu bi de wɔn bobɔɔ ɔhyeɛ afɔdeɛ wɔ bukyia no so.

²¹ Na AWURADE tee afɔdeɛ no hwam no, ɔkaa no n’akoma mu sɛ: Onipa nti merennome asase bio, ɛfiri sɛ onipa akoma mu adwene yɛ bɔne firi ne mmɔfraase, na merensɛe deɛ ɛte aseɛ nyinaa bio, sɛdeɛ mayɛ yi.

²² Nna a asase wɔ hɔ yi nyinaa, oguo ne otwa, awɔ ne ahuhuro, asuso ne ɔpɛ, awia ne anadwo rennyae da.