Read Twi Asante Gyenesis 9 Bible Online

Gyenesis 9 - Twi Asante bible

Gyenesis 9

¹ Na Onyankopɔn hyiraa Noa ne ne mma, na ɔka kyerɛɛ wɔn sɛ: Monwo na monnɔɔso, na monhyɛ asase so ma.

²Na mo ho hu ne mo ho suro mmra asase so mmoadoma nyinaa ne ewiem nnomaa nyinaa, deɛ ɛwea fam nyinaa ne ɛpo mu mpataa nyinaa so; mo nsa na wɔde wɔn ahyɛ.

³ Deɛ ɛkeka ne ho a ɛwɔ nkwa nyinaa, ɛnyɛ mo aduane; mede ne nyinaa mama mo, sɛdeɛ mede nhahan mono memaa mo no.

⁴ Nam a ne mogya da so wɔ ne mu nko na monnnie.

⁵ Na onipa biara a ɔka onipa mogya guo no, ne nsam mu na mɛbisa, na aboa mpo ka onipa mogya gu a mɛbisa afiri ne nsam.

⁶ Deɛ ɔhwie onipa mogya guo no, onipa so na wɔnam bɛhwie ne mogya aguo, ɛfiri sɛ Nyankopɔn suban so na ɔyɛɛ onipa.

⁷Na mo deɛ, monwo na monnɔ, na monnɔɔso wɔ asase so.

⁸Na Onyankopɔn ka kyerɛɛ Noa ne ne mma a wɔka ne ho no sɛ:

⁹ Hwɛ, afei merema m’apam atim hɔ ama mo ne mo asefoɔ a ɛbɛdi mo akyi,

¹⁰ ɛne akra a ɛtete aseɛ a ɛka mo ho nyinaa, nnomaa, ntɔteboa ne asase so mmoadoma a wɔne mo wɔ hɔ firi adaka no mu nyinaa.

¹¹ Na mama me ne mo apam yi agyina hɔ, sɛ meremfa nsuyire mensɛe abɔdeɛ nyinaa bio, na nsuyire remma mmɛsɛe asase bio.

¹²Na Onyankopɔn kaa sɛ: Apam a merema ada me ne mo ne akra ateasefoɔ a ɛka mo ho nyinaa ntam akɔ nnasanten awoɔ ntoatoasoɔ soɔ no ho nsɛnkyerɛnneɛ nie:

¹³Me nyankontɔn na mede masi mununkum mu, na ayɛ me ne asase ntam apam no ho nsɛnkyerɛnneɛ.

¹⁴Na sɛ mede mununkum meba asase so a, wɔbɛhunu nyankontɔn no wɔ mununkum no mu;

¹⁵na makae m’apam a ɛwɔ me ne mo, ne abɔdeɛ nyinaa mu ateasefoɔ ntam no, na nsuo annane nsuyire ansɛe abɔdeɛ nyinaa bio.

¹⁶Na nyankontɔn no bɛba mununkum mu, na mahwɛ, na mede makae daa apam a ɛwɔ Onyankopɔn ne nnipa ne abɔdeɛ mu ateasefoɔ a ɛwɔ asase soɔ nyinaa no ntam.

¹⁷Na Onyankopɔn ka kyerɛɛ Noa sɛ: Yei ne apam a mama no agyina me ne honam a ɛwɔ asase nyinaa ntam no ho nsɛnkyerɛnneɛ.

¹⁸ Na Noa mma a wɔfirii adaka no mu firii adie ne Sem, Ham ne Yafet; na Ham ne Kanaan n’agya.

¹⁹Yeinom ne Noa mma baasa no. Wɔn mu na nnipa firi petee asase nyinaa soɔ.

²⁰Na Noa firii aseɛ yɛɛ kua, na ɔyɛɛ bobeturo.

²¹Na ɔnom nsa no bi, na ɔboroe, na ɔda ne ntomadan mu a ne ho da hɔ.

²² Na Kanaan agya Ham kɔhunuu n’agya adagya mu, na ɔkɔka kyerɛɛ ne nuanom baanu no wɔ adihɔ.

²³Na Sem ne Yafet faa ntoma de guu wɔn mmatiri so nam nkyirinkyire de kɔkataa wɔn agya adagya so, na wɔdanee wɔn ani kyerɛɛ akyire, na wɔanhunu wɔn agya adagya mu.

²⁴Na Noa ani so tete firii ne nsaborɔ mu na ɔtee deɛ ne ba kumaa no ayɛ no no,

²⁵ɔkaa sɛ: Wɔadome Kanaan, ɔbɛyɛ nkoa mu akoa ama ne nuanom.

²⁶ Na ɔkaa nso sɛ: Nhyira ne Sem Nyankopɔn, AWURADE, na Kanaan nyɛ wɔn akoa.

²⁷ Onyankopɔn mma Yafet ase ntrɛ, na ɔntena Sem ntomadan mu, na Kanaan nyɛ wɔn akoa.

²⁸Na nsuyire akyiri no, Noa tenaa ase mfirinhyia ahasa aduonum.

²⁹Na Noa nna a ɔdiiɛ nyinaa yɛ mfeɛ ahankron aduonum, na ɔwui.