Read Twi Asante 2 Samuel 10 Bible Online

2 Samuel 10 - Twi Asante bible

2 Samuel 10

¹ Na yei akyiri no, Amonfoɔ hene wui, na ne ba Hanun bɛsii n’ananmu dii hene.

² Ɛnna Dawid kaa sɛ: Mɛyɛ Nahas ba Hanun adɔeɛ, sɛdeɛ n’agya yɛɛ me adɔeɛ no. Na Dawid somaa ne nkoa maa wɔkɔmaa no hyɛden, n’agya wuo no nti. Na Dawid nkoa no duruu Amonfoɔ asase so.

³ Ɛnna Amonfoɔ mpanimfoɔ ka kyerɛɛ wɔn wura Hanun sɛ: Wodwene sɛ Dawid di w’agya ni nti na wasoma wo nkyɛn awerɛkyekyefoɔ yi? Ɛnyɛ kuro yi mu hwehwɛ ne ne nsra ne ne butuo nti na Dawid somaa ne nkoa maa wɔbaa wo nkyɛn yi?

⁴Na Hanun faa Dawid nkoa no yii wɔn bɔgyesɛ fa fa, na ɔtwitwaa wɔn ntadeɛ mu fa fa bɛduruu wɔn ataaso, na ɔgyaa wɔn kwan.

⁵Na wɔbɛka kyerɛɛ Dawid no, ɔsoma maa wɔkɔhyiaa wɔn, ɛfiri sɛ wɔasopa mmarima no pa ara. Na ɔhene kaa sɛ: Montena Yeriko nkɔsi sɛ mo bɔgyesɛ bɛfuo ansa na moasane aba.

⁶Na Amonfoɔ no hunuu sɛ Dawid bo afu wɔn no, Amonfoɔ no soma maa wɔkɔbobɔɔ Bet-rehob Siriafoɔ ne Soba Siriafoɔ paa, anammɔnmufoɔ mpem aduonu ne Maakahene nnipa apem ne Tob mmarima mpem dummienu.

⁷Na Dawid teeɛ no, ɔsomaa Yoab ne akofoɔ dɔm no nyinaa kɔe.

⁸Na Amonfoɔ firii adi bɛtwaa mpasua kuro no pono ano; na Soba ne Rehob, Siriafoɔ ne Tob ne Maaka mmarima no nko gyinaa wiram.

⁹Na Yoab hunuu sɛ ɛdɔm no kyerɛ n’anim ne n’akyiri no, ɔyii Israel mu dɔmmarima nyinaa mu bi maa wɔmia kɔhyiaa Siriafoɔ.

¹⁰Na ne dɔm no nkaeɛ no, ɔde wɔn hyɛɛ ne nua Abisai nsa maa no twa kɔhyiaa Amonfoɔ.

¹¹Na ɔkaa sɛ: Sɛ Siriafoɔ yɛ den sene me a, bɛboa me, na sɛ Amonfoɔ na wɔyɛ den sene wo a, mɛba mabɛboa wo.

¹²Hyɛ wo ho den na ma yɛnko sɛ mmarima mma yɛn man ne yɛn Nyankopɔn nkuro. Na AWURADE nyɛ deɛ ɛyɛ wɔ n’ani soɔ.

¹³Na Yoab ne ɛdɔm a wɔka ne ho no ne Siriafoɔ de bɔɔ ani, na wɔdwanee n’anim.

¹⁴Na Amonfoɔ no hunuu sɛ Siriafoɔ adwane no, wɔn nso wɔdwanee Abisai anim kɔhyɛnee kuro no mu. Ɛnna Yoab sane firii Amonfoɔ koo no mu baa Yerusalem.

¹⁵Na Siriafoɔ hunuu sɛ wɔadi nkoguo wɔ Israelfoɔ anim no, wɔboaboaa wɔn ano faako.

¹⁶Na Hadadeser soma maa wɔkɔfaa Siriafoɔ a wɔwɔ Eufrate agya no bae, na wɔbaa Helam. Na Hadadeser sahene Sobak dii wɔn anim.

¹⁷Na wɔbɛka kyerɛɛ Dawid no, ɔboaboaa Israel nyinaa ano, na ɔkɔtwaa Yordan kɔɔ Helam. Na Siriafoɔ twitwaa mpasua hyiaa Dawid, na wɔne no koe.

¹⁸Na Siriafoɔ dwanee Israel anim; na Dawid kunkumm Siriafoɔ mu nteaseɛnamfoɔ ahanson ne apɔnkɔfoɔ mpem aduanan, na ɔpiraa ɔsahene Sobak maa no wuu wɔ hɔ.

¹⁹Na ahemfo a wɔyɛ Hadadeser nkoa no nyinaa hunuu sɛ wɔadi nkoguo wɔ Israel anim no, wɔne Israel yɛɛ asomdwoeɛ apam, na wɔsom wɔn. Na Siriafoɔ suroo sɛ wɔbɛboa Amonfoɔ no bio.