Read Twi Asante 2 Samuel 5 Bible Online

2 Samuel 5 - Twi Asante bible

2 Samuel 5

¹ Ɛnna Israel mmusuakuo nyinaa baa Dawid nkyɛn wɔ Hebron bɛkaa sɛ: Yɛn nie, wo bogya ne yɛn.

² Nso akane no a na Saulo di yɛn so hene no, wone deɛ na ɔde Israel firi adie na ɔde wɔn ba mu; na AWURADE aka akyerɛ wo sɛ: Wo na wobɛyɛne me man Israel, na wo na wobɛdi Israel so hene.

³ Na Israel mpanimfoɔ nyinaa baa ɔhene nkyɛn Hebron, na Ɔhene Dawid ne wɔn pamee wɔ Hebron, AWURADE anim, na wɔsraa Dawid ngo de no sii Israel so hene.

⁴ Dawid bɛdii hene no, na wadi mfeɛ aduasa, na ɔdii hene mfirinhyia aduanan.

⁵Ɔdii Yuda so hene wɔ Hebron mfeɛ nson ne abosome nsia, na ɔdii Israel ne Yuda nyinaa so hene mfeɛ aduasa mmiɛnsa wɔ Yerusalem.

⁶Na ɔhene ne ne mmarima kɔɔ Yerusalem kɔtuaa Yebusifoɔ a na wɔte asase no soɔ no, na Yebusifoɔ no ka kyerɛɛ Dawid sɛ: Woremma ha, na nnipa a wɔyɛ mmerɛ te sɛ anifirafoɔ ne mpakye mpo bɛsi wo kwan. Na wɔdwene sɛ, Dawid rentumi nhyɛne mu hɔ.

⁷Nanso Dawid faa Sion aban no a ɛne Dawid kuro no.

⁸Na Dawid kaa no ɛda no sɛ: Obiara a ɔbɛkum Yebusifoɔ no, ɛsɛ sɛ ɔkɔduru nsuka no ho, na wɔato ahyɛ mpakye ne anifirafoɔ a Dawid kra tan wɔn no so! Enti na wɔka sɛ: Onifirani ne apakye mmma fie.

⁹Na Dawid tenaa aban no mu, na ɔfrɛɛ no Dawid kuro. Na Dawid totoo ɛho afasuo hyiae firi Milo ne emu fam.

¹⁰ Na Dawid kɔɔ so yɛɛ kɛseɛ ara, na AWURADE, asafo Nyankopɔn, dii n’akyi.

¹¹ Na Tirohene Hiram somaa abɔfoɔ maa wɔde ntweneduro nnua ne nnuasenfoɔ ne abantofoɔ baa Dawid nkyɛn na wɔkyekyeree efie maa Dawid.

¹²Na Dawid hunuu sɛ AWURADE de no asi Israel so hene pintinn na ne man Israel nti wama n’ahennie so.

¹³Na Dawid firi Hebron baeɛ akyiri no, ɔfefaa mpena na ɔwarewaree yerenom pii firii Yerusalem, na wɔwowoo mmammarima ne mmammaa maa no bio.

¹⁴ Na wɔn a wɔwoo wɔn maa Dawid wɔ Yerusalem no din nie: Samua, Sobab, Natan, Salomo,

¹⁵Yibhar, Elisua, Nefeg, Yafia,

¹⁶Elisama, Eliada ne Elifelet.

¹⁷Na Filistifoɔ tee sɛ wɔasra Dawid de no asi Israel so hene no, Filistifoɔ nyinaa foro baa sɛ wɔrebɛhwehwɛ Dawid. Na Dawid teeɛ no, ɔsiane kɔɔ aban no mu.

¹⁸Na Filistifoɔ no ba bɛbɔɔ nsraban wɔ Refaim bonhwa mu.

¹⁹ Na Dawid bisaa AWURADE sɛ: Menkɔ Filistifoɔ no so anaa? Wode wɔn bɛhyɛ me nsa anaa? Na AWURADE ka kyerɛɛ Dawid sɛ: Kɔ, na mede Filistifoɔ no bɛhyɛ wo nsa ampa.

²⁰Na Dawid kɔɔ Baal-perasim, na Dawid kunkumm wɔn hɔ, na ɔkaa sɛ: AWURADE apae m’atamfoɔ mu m’anim sɛdeɛ wɔpae nsuo mu no. Enti ɔfrɛɛ hɔ sɛ Baal-perasim.[2]

²¹Na wɔgyaa wɔn ahoni hɔ; na Dawid ne ne nnipa no tase kɔeɛ.

²²Na Filistifoɔ no sane foro baa bio bɛbɔɔ nsraban wɔ Refaim bonhwa mu.

²³Na Dawid bisaa AWURADE no, ɔkaa sɛ: Nkɔ! Dane wo ho kɔsi wɔn akyi, na fa baka nnua no ntentensoɔ bra wɔn so.

²⁴Na sɛ wote nanteɛ nka baka nnua no atifi a, ɛnneɛ ka wo ho, ɛfiri sɛ ɛkyerɛ sɛ AWURADE afiri redi w’anim akɔkum Filistifoɔ dɔm no.

²⁵Na Dawid yɛɛ sɛdeɛ AWURADE hyɛɛ no no, na ɔkumm Filistifoɔ no firi Geba de kɔduruu Geser.