Read Twi Asante 2 Samuel 6 Bible Online

2 Samuel 6 - Twi Asante bible

2 Samuel 6

¹ Na Dawid sane hyiahyiaa Israel mmarima a wɔayi wɔn nyinaa bio, wɔn ano si mpem aduasa.

² Na Dawid sɔreeɛ, na ɔne dɔm a wɔka ne ho nyinaa kɔ kɔfirii Baale-yuda, sɛ wɔrekɔfa Nyankopɔn apam adaka a wɔbɔ din a ɛyɛ asafo AWURADE a ɔte Kerubim ntam no din wɔ soɔ no afiri hɔ aba.

³ Na wɔde Nyankopɔn adaka no sii teaseɛnam foforɔ so firii Abinadab fie a ɛwɔ kokoɔ soɔ no mu, na Abinadab mma Usa ne Ahio de teaseɛnam foforɔ a Nyankopɔn adaka no si soɔ no kɔe.

⁴Na Ahio di adaka no anim.

⁵Na Dawid ne Israel fie nyinaa de wɔn ahoɔden nyinaa de nsankuo, bɛnta a wɔde pepeaa nnua ayɛ, mpintin, nnonno, nsambɔ ne nnawuro goroo AWURADE anim.

⁶Na wɔduruu Nakon ayuporebea no, Usa tenee ne nsa kɔkaa Nyankopɔn adaka no sɔɔ mu, ɛfiri sɛ anantwie no hinhimii.

⁷ Na AWURADE bo fuu Usa, na mfomsoɔ no nti Onyankopɔn bɔɔ no wɔ hɔ, na ɔwuu Nyankopɔn adaka no nkyɛn mu.

⁸Na Dawid bo fui sɛ AWURADE atwe Usa aso wɔ n’abufuo mu. Na ɔfrɛɛ hɔ din sɛ Peres-usa[3] de bɛsi nnɛ.

⁹Na Dawid suroo AWURADE da no, na ɔkaa sɛ: AWURADE adaka no bɛba me nkyɛn sɛn nie?

¹⁰Enti Dawid ampɛ sɛ ɔde AWURADE adaka no ba ne nkyɛn, Dawid kuro no mu, na Dawid de mane kɔɔ Gitini Obed-edom fie.

¹¹Na AWURADE adaka no sii Gitini Obed-edom fie abosome mmiɛnsa, na AWURADE hyiraa Obed-edom ne ne fie nyinaa.

¹² Na wɔka kyerɛɛ Dawid sɛ: AWURADE ahyira Obed-edom fie ne deɛ ɔwɔ nyinaa, Nyankopɔn adaka no nti. Na Dawid kɔ kɔfaa Nyankopɔn adaka no firii Obed-edom fie de baa Dawid kuro mu anigyeɛ mu.

¹³ Na wɔn a wɔso AWURADE adaka no tutuu anammɔn nsia no, ɔde nantwie ne aboa a wadɔ bɔɔ afɔdeɛ.

¹⁴Na Dawid de n’ahoɔden nyinaa sae wɔ AWURADE anim; nso na Dawid de nwera asɔfotadeɛ amia.

¹⁵Na Dawid ne Israel fie nyinaa de osebɔ ne totorobɛntohyɛn de AWURADE adaka no foro bae.

¹⁶Na ɛbaa sɛ AWURADE adaka no duruu Dawid kuro mu no, Saulo babaa Mikal hwɛɛ mpomma mu, na ɔhunuu Ɔhene Dawid sɛ ɔrehurihuri na ɔresa AWURADE anim, na ɔbuu no animtia n’akoma mu.

¹⁷ Na wɔde AWURADE adaka no bae de bɛsii ne siberɛ, ntomadan a Dawid asi ama no no mu. Na Dawid bɔɔ ɔhyeɛ afɔdeɛ ne asomdwoeɛ afɔdeɛ AWURADE anim.

¹⁸ Na Dawid wiee ɔhyeɛ afɔdeɛ ne asomdwoeɛ afɔdeɛ no bɔ no, ɔde asafo AWURADE din hyiraa ɔman no.

¹⁹Na ɔkyɛɛ adeɛ maa ɔman no nyinaa, Israel man mu no nyinaa, mmarima ne mmaa, ɔmaa wɔn mu biara paanoo mua baako ne nankum ne bobe aba taterɛ. Ɛnna ɔman no nyinaa sii mu kɔɔ wɔn fie.

²⁰Ɛnna Dawid sane bɛhyiraa ne fiefoɔ. Na Saulo ba Mikal firii adi bɛhyiaa Dawid, na ɔkaa sɛ: Animuonyam bɛn na Israel hene anya nnɛ, sɛ wapa ne ho nnɛ wɔ n’asomfoɔ mfenaa anim, sɛ ahuhufoɔ no bi pa ne ho a n’ani mmu ne dwɛ!

²¹ Na Dawid ka kyerɛɛ Mikal sɛ: AWURADE a ɔfirii w’agya ne ne fie nyinaa akyi yii me na ɔhyɛɛ me sɛ menni ne man Israel so hene no anim na megoroeɛ.

²²Na mɛyɛ awiɛmfoɔ masene yei bio, na mayɛ w’ani so famni. Na mfenaa a woaka no, wɔn na mɛnya animuonyam wɔ wɔn ani so.

²³Na Saulo babaa Mikal annya ɔba de kɔsii ne wuda.