Read Twi Asante 2 Samuel 8 Bible Online

2 Samuel 8 - Twi Asante bible

2 Samuel 8

¹ Na yei akyiri no, Dawid ko dii Filistifoɔ so, na ɔbrɛɛ wɔn ase, na Dawid gyee Metegamma firii Filistifoɔ nsam.

²Na ɔkaa Moab nso gui, na ɔmaa wɔdedaa fam akuo mmiɛnsa. Na wɔkumm nnipa akuo no mu mmienu, na wɔgyaa ekuo baako sɛ wɔntena ase. Na Moabfoɔ bɛyɛɛ Dawid nkoa a wɔtua apeatoɔ ma no.

³Dawid kaa Sobahene Rehob ba Hadadeser nso gui, ɛberɛ a ɔkɔɔ sɛ ɔrema ne tumi akɔso Asubɔntene Eufrate ho no mu.

⁴ Na Dawid kyeree wɔn apɔnkɔsotefoɔ no mu apem ahanson ne anammɔnmufoɔ mpem aduonu, na Dawid twitwaa nteaseɛnam apɔnkɔ nyinaa nantin ntini, na ɔgyaa wɔn mu nteaseɛnam ɔha deɛ.

⁵Na Damasko Siriafoɔ baa sɛ wɔrebɛboa Sobahene Hadadeser no, Dawid kumm Siriafoɔ no mu nnipa mpem aduonu mmienu.

⁶Ɛnna Dawid de bansifoɔ kɔtenaa Damasko a ɛwɔ Siria, na Siria yɛɛ Dawid nkoa a wɔtua apeatoɔ. Na AWURADE boaa Dawid maa no dii nim wɔ baabiara a ɔkɔeɛ nyinaa.

⁷Na Dawid gyegyee sika akyɛm a na Hadadeser nkoa kura no de baa Yerusalem.

⁸Na Ɔhene Dawid faa kɔbere mfrafraeɛ pii pa firii Hadadeser nkuro Beta ne Berotai mu.

⁹Na Hamathene Toi tee sɛ Dawid aka Hadadeser dɔm nyinaa aguo no,

¹⁰Toi somaa ne ba Yoram baa Ɔhene Dawid nkyɛn bɛkyeaa no maa no amo, sɛ ɔne Hadadeser ako na waka no aguo, ɛfiri sɛ na Hadadeser ne Toi di ako. Na Yoram kura dwetɛ nnwinneɛ ne sika nnwinneɛ ne kɔbere mfrafraeɛ nnwinneɛ de bae.

¹¹Ɛno nso na Ɔhene Dawid de yɛɛ akronkronneɛ maa AWURADE, sɛ dwetɛ ne sika a ɛfiri amanaman a ɔbrɛɛ wɔn aseɛ no nyinaa mu a ɔde yɛɛ akronkronneɛ no,

¹²ɛfiri Edom, Moab, Amonfoɔ, Filistifoɔ, Amalekfoɔ ne Sobahene Rehob ba Hadadeser asadeɛ no mu.

¹³ Na Dawid sane firii Siriafoɔ kum no, ɔde gyee din wɔ Nkyene-bonhwa mu sɛ ɔkumm Edomfoɔ mpem dunwɔtwe.

¹⁴ Na ɔde asraafoɔ bansifoɔ tenaa Edom; Edom nyinaa mu na ɔde bansifoɔ tenatenaeɛ, na Edomfoɔ nyinaa bɛyɛɛ Dawid nkoa. Na AWURADE boaa Dawid maa no dii nim baabiara a ɔkɔeɛ nyinaa.

¹⁵Na Dawid dii Israel nyinaa so hene; na Dawid de atɛntenenee ne tenenee dii asɛm maa ne manfoɔ nyinaa.

¹⁶ Na Seruia ba Yoab na na ɔdi asraafoɔ dɔm no soɔ, na Ahilud ba Yehosafat ne deɛ ɔtwerɛ nsɛm de sie,

¹⁷na Ahitub ba Sadok ne Abiatar ba Ahimelek ne asɔfoɔ, na Seraia ne ɔtwerɛfoɔ,

¹⁸ na Yoiada ba Benaia na na ɔdi Keretifoɔ ne Peletifoɔ[4] no soɔ, na Dawid mma ne asɔfoɔ.