Read Twi Asante 1 Ahemfo 14 Bible Online

1 Ahemfo 14 - Twi Asante bible

1 Ahemfo 14

¹Ɛberɛ no mu no, Yeroboam ba Abia yaree.

² Na Yeroboam ka kyerɛɛ ne yere sɛ: Sɔre, sakyera wo ho, na wɔanhunu sɛ wone Yeroboam yere, na kɔ Silo; hwɛ, ɛhɔ na Odiyifoɔ Ahia wɔ; ɔno na ɔka kyerɛɛ me sɛ mɛdi ɔman yi so hene.

³Na fa paanoo du ne taterɛ ne ɛwoɔ toa kura wo nsam, na kɔ ne nkyɛn; ɔno na ɔbɛka wo deɛ ɛbɛyɛ abɔfra yi.

⁴Na Yeroboam yere no yɛɛ saa, na ɔsii mu kɔɔ Silo, na ɔduruu Ahia fie. Nso na Ahia nhunu adeɛ, na akorabɔ nti n’ani so ayɛ kusuu.

⁵Na AWURADE ka kyerɛɛ Ahia sɛ: Hwɛ, Yeroboam yere reba abɛbisa wo hɔ asɛm ne ba ho, ɛfiri sɛ ɔyare. Sɛɛ ne sɛɛ na ka kyerɛ no. Ɔbaeɛ no, ɔyɛɛ ne ho sɛ ɔbaa foforɔ bi.

⁶Na Ahia tee ne nan ase sɛ ɔreba ɛpono ano no, ɔkaa sɛ: Yeroboam yere, bra! Adɛn nti na woasakyera wo ho ayɛ sɛ obi yi? Na me deɛ, wɔde asɛm denden asoma me wo nkyɛn.

⁷ Kɔka kyerɛ Yeroboam sɛ: Sɛ AWURADE Israel Nyankopɔn seɛ nie: Ɛsiane sɛ memaa wo so wo man no mu, na mesii wo me man Israel so panin,

⁸na metee ahennie no mefirii Dawid fie de maa woɔ, nanso woanyɛ sɛ m’akoa Dawid a ɔdii me mmara nsɛm soɔ, na ɔde n’akoma nyinaa dii m’akyire sɛ ɔbɛyɛ deɛ ɛtene m’ani soɔ no nko,

⁹na woayɛ bɔne asene wɔn a wɔdii w’anim nyinaa, na woakɔ akɔyɛ anyame foforɔ ne ahoni a wɔaguo sɛ wode rehuru me bo, na woato me atwene w’akyire nti,

¹⁰ hwɛ, mede bɔne bɛba Yeroboam fie so, na matwa Yeroboam fie barima biara ne Israel mu akoa ne ɔdehyeɛ atwene, na mapra Yeroboam fie sɛdeɛ obi pra fi kɔsi sɛ ɛsa.

¹¹ Yeroboam nipa biara a ɔbɛwu kuro mu no, akraman na ɛbɛdi ne nam, na deɛ ɔbɛwu wiram no, ewiem nnomaa na ɛbɛdi ne nam. AWURADE na waka.

¹²Na wo deɛ, sɔre kɔ wo fie; na wo nan si kuro no mu ara pɛ a, abɔfra no bɛwu.

¹³Na Israel nyinaa bɛgyam no na wɔasie no, na ɔno nko ne Yeroboam deɛ a ɔbɛkɔ ɛda mu, ɛfiri sɛ ɔno mu na wɔahunu adepa bi a ɛsɔ AWURADE Israel Nyankopɔn ani, Yeroboam fie.

¹⁴ Na AWURADE bɛma ɔhene bi so, Israel so a ɔbɛtwa Yeroboam fie atwene nnɛ. Na ɛfiri nnɛ,

¹⁵ AWURADE bɛbɔ Israel sɛdeɛ demmire woso nsuo mu, na watutu Israel afiri asase pa a ɔde maa wɔn agyanom yi so, na wabɔ wɔn apete akɔ asuogya, ɛsiane sɛ wɔayɛ wɔn Asera nnua de ahuru AWURADE bo.

¹⁶ Na Yeroboam bɔne a ɔyɛeɛ na ɔde maa Israel yɛɛ bɔne no nti, ɔbɛgyae Israel mu ama.

¹⁷Na Yeroboam yere no sɔre sii mu kɔɔ Tirsa. Na ɔduruu ɛdan no aponnwa ano no, abɔfra no wui.

¹⁸Na wɔsiee no, na Israel nyinaa gyamm no, sɛdeɛ AWURADE asɛm a ɔnam n’akoa Odiyifoɔ Ahia so kaeɛ no teɛ no.

¹⁹Na Yeroboam ho nsɛm nkaeɛ, sɛdeɛ ɔdii ako ne sɛdeɛ ɔdii ne hene faeɛ no, hwɛ, wɔatwerɛ no Israel ahemfo berɛsosɛm nwoma no mu.

²⁰ Na nna a Yeroboam de dii hene yɛ mfeɛ aduonu mmienu; na ɔtoaa n’agyanom wɔ asamando, na ne ba Nadab bɛdii n’adeɛ.

²¹ Na Salomo ba Rehoboam dii hene Yuda. Na Rehoboam adi mfirinhyia aduanan baako na ɔbɛdii hene, na ɔdii hene mfirinhyia dunson wɔ Yerusalem, kuro a AWURADE fa firii Israel mmusuakuo nyinaa mu sɛ ɔde ne din bɛto hɔ no mu. Na ne na din de Naama a ɔyɛ Amonni.

²²Na Yuda yɛɛ AWURADE ani so bɔne, na wɔmaa no twee wɔn ho ninkunu sene wɔn agyanom bɔne a wɔyɛ tiaa no no ho deɛ nyinaa.

²³ Na wɔn nso yeyɛɛ sorɔnsorɔmmea ne adum ne abosompɔ nkokoɔ sorɔnsorɔn nyinaa so ne nnua frɔmfrɔm nyinaa ase fae.

²⁴ Na mmarima nnwamamfoɔ nso wɔ asase no so; wɔyɛɛ sɛdeɛ amanaman a AWURADE tuu wɔn firii Israelfoɔ anim no akyiwadeɛ nyinaa teɛ.

²⁵ Na Ɔhene Rehoboam afe a ɛtɔ so nnum soɔ no Misraimhene Sisak foro baa Yerusalem so.

²⁶ Na ɔfaa AWURADE fie akoradeɛ ne ahemfie akoradeɛ, ɔfaa ne nyinaa kɔe. Na ɔfaa sika akyɛm a Salomo yɛeɛ no nso nyinaa.

²⁷Na Ɔhene Rehoboam yɛɛ kɔbere mfrafraeɛ akyɛm sisii ananmu, na ɔde hyɛɛ awɛmfoɔ a wɔhwɛ ahemfie pono ano no so asafohene nsa.

²⁸Na da biara a ɔhene bɛkɔ AWURADE fie no, awɛmfoɔ no soa kɔ, na wɔde sane bɛsie awɛmfoɔ dan mu.

²⁹Na Rehoboam ho nsɛm nkaeɛ ne deɛ ɔyɛeɛ no nyinaa, wɔantwerɛ no Yuda ahemfo berɛsosɛm nwoma no mu?

³⁰ Na akodie daa Rehoboam ne Yeroboam ntam daa.

³¹ Na Rehoboam toaa n’agyanom wɔ asamando, na wɔsiee no n’agyanom nkyɛn, Dawid kuro mu. Na ne na din de Naama a ɔyɛ Amonni. Na ne ba Abiam bɛdii n’adeɛ.