Read Twi Asante 1 Ahemfo 4 Bible Online

1 Ahemfo 4 - Twi Asante bible

1 Ahemfo 4

¹Na Ɔhene Salomo di Israel nyinaa so hene.

² Na yeinom ne ne mmapɔmma: Sadok ba Ɔsɔfoɔ Asaria;

³Sisa mma Elihoref ne Ahia yɛ atwerɛfoɔ; Ahilud ba Yosafat ne ɔsɛnkaefoɔ;

⁴ Yoiada ba Benaia di asraadɔm no so, na Sadok ne Abiatar di asɔfoɔ;

⁵Natan ba Asaria di toɔ sohwɛfoɔ so, na Natan ba Sabud yɛ ɔsɔfoɔ ne ɔhene adamfo;

⁶ na Ahisar di ahemfie so, na Abda ba Adoniram di wɔn a wɔhyɛ wɔn ma wɔyɛ adwuma so.

⁷Na Salomo wɔ toɔ sohwɛfoɔ dummienu Israel nyinaa so a wɔhwɛ ɔhene ne ne fie aduane soɔ; afirinhyia mu bosome baako wɔn mu biara ma aduane.

⁸Wɔn din nie: Hur ba wɔ Efraim bepɔ so;

⁹Deker ba wɔ Makas ne Saalbim ne Bat-semes ne Elon-bet-anan;

¹⁰Hesed ba wɔ Arubot, (ne deɛ ne Soko ne Hefer asase nyinaa);

¹¹ Abinadab ba wɔ Nafat-dor nyinaa. (Ɔwaree Salomo babaa Tafat).

¹²Ahilud ba Baana wɔ Taanak ne Megido ne Bet-sean a ɛwɔ Saretan nkyɛn mu nyinaa Yesreel ase, de firi Bet-sean kɔduru Abel-mehola, de kɔ Yokmeam akyi;

¹³ Geber ba wɔ Ramot-gilead, (ne deɛ ne Manase ba Yair atenaeɛ a ɛwɔ Gilead no, ne deɛ nso ne Argob asase a ɛwɔ Basan, nkuro akɛseɛ aduosia a ɛho wɔ afasuo ne kɔbere mfrafraeɛ adaban);

¹⁴Ido ba Abinadab wɔ Mahanaim;

¹⁵Ahimaas wɔ Naftali; (ɔno nso faa Salomo ba Basmat wareɛ);

¹⁶Husai ba Baana wɔ Aser ne Alot;

¹⁷Parua ba Yehosafat wɔ Isakar;

¹⁸Ela ba Simei wɔ Benyamin;

¹⁹Uri ba Geber wɔ Gilead asase so, Amorifoɔ hene Sihon ne Basanhene Og asase so, na toɔ sohwɛfoɔ baako na ɔwɔ Yuda asase no soɔ.

²⁰ Yuda ne Israel dɔɔso sɛ mpoano anwea dodoɔ, wɔdidi na wɔnom, na wɔn ani gye.

²¹Na Salomo dii aman yi so firi Asubɔntene Eufrate ano kɔsi Filistifoɔ asase so ne Misraim hyeɛ so. Wɔde apeatoɔ ba na wɔsomm Salomo ne nkwa nna nyinaa.

²²Na Salomo da koro aduane yɛ esiam pa susukoraa aduasa ne ayuosiam susukoraa aduosia;

²³anantwie a wɔadorɔ du ne adidibea anantwie aduonu ne nnwan ɔha, ɛsono aforoteɛ, nnowa, awansane ne nnomaa a wɔadorɔ.

²⁴Na ɔdi asubɔnten no atɔeɛ ahemfo a wɔwɔ asubɔnten no fa ha nyinaa so tumi firi Tifsa bɛduru Gasa, na ɔnyaa asomdwoeɛ n’ahyeɛ nyinaa so hyiae.

²⁵ Na Yuda ne Israel tenaa ase dwoodwoo wɔn bobe ne wɔn borɔdɔma ase mmaako mmaako firi Dan kɔsi Beer-seba, Salomo nna nyinaa.

²⁶Na Salomo wɔ apɔnkɔdan mpem aduanan ma ne nteaseɛnam, ne apɔnkɔsotefoɔ mpem dummienu.

²⁷Na ɛtoɔ sohwɛfoɔ no hwɛɛ aduane so maa Ɔhene Salomo ne wɔn a wɔbaa Ɔhene Salomo pono ho nyinaa, obiara wɔ ne bosome mu; wɔmma hwee nka.

²⁸Na atokoɔ ne ɛserɛ a wɔde ma apɔnkɔ ne apɔnkɔ ahoɔharefoɔ nso, wɔde baa faako a wɔwɔ hɔ, wɔn nyinaa sɛdeɛ wɔahyehyɛ ama wɔn no.

²⁹ Na Onyankopɔn maa Salomo nyansa ne nhunumu bebree pa ne adwene a emu trɛ sɛ mpoano anwea.

³⁰Na Salomo nyansa dɔɔso sene apueeɛ mma nyinaa nyansa ne Misraim nyansa nyinaa.

³¹Na ɔnim nyansa sene nnipa nyinaa, ɔsene Esrahini Etan ne Heman ne Kalkol ne Darda a wɔyɛ Mahel mma no, na ne din hyetae wɔ amanaman nyinaa mu.

³² Na ɔbubuu mmɛ mpensa, na ne nnwom yɛ apem ne nnum.

³³Na ɔkasaa nnua ho firi tweneduro a ɛwɔ Lebanon so kɔsii adwera a ɛfifiri ɔfasuo mu so, na ɔkaa mmoa ne nnomaa ne wɔn a wɔwea ne mpataa ho asɛm.

³⁴ Na amanaman nyinaa mu bi baa sɛ wɔrebɛtie Salomo nyansa, wɔfirii asase so ahemfo a wɔtee ne nyansa no nyinaa nkyɛn bae.