Read Twi Asante 2 Ahemfo 4 Bible Online

2 Ahemfo 4 - Twi Asante bible

2 Ahemfo 4

¹Na adiyifoɔ mma no mu baako yere teaa mu ka kyerɛɛ Elisa sɛ: W’akoa, me kunu, awu, na wo ara wonim sɛ na w’akoa suro AWURADE; na ɔkafoɔ aba rebɛfa me mma baanu akɔyɛ ne nkoa.

² Na Elisa bisaa no sɛ: Ɛdeɛn na menyɛ memma woɔ? Kyerɛ me ɛ, ɛdeɛn na wowɔ wɔ efie? Na ɔbuaa sɛ: W’afenaa nni hwee fie, gye ngo ahina baako pɛ.

³Na Elisa kaa sɛ: Firi adi kɔfemfɛm nhina wɔ wɔn a wɔtete bɛn woɔ nyinaa nkyɛn, nhina hunu, ma no nnɔɔso.

⁴Na sɛ woba mu a, to wo ne wo mma no pono mu, na hwiehwie gu nhina no nyinaa mu, na fa deɛ ayɛ ma no sisi nkyɛn.

⁵Na ɔfirii ne nkyɛn kɔe, na ɔkɔtoo ne ho ne ne mma pono mu. Wɔn deɛ, wɔde nhina no brɛɛ no, na ɔno nso hwiehwie guguu mu.

⁶Na ɛbaa sɛ nhina no yeyɛɛ amaama no, ɔka kyerɛɛ ne ba sɛ: Fa ahina bi brɛ me bio! Na ɔka kyerɛɛ no sɛ: Ahina biara nni hɔ bio; na ngo no twae.

⁷Ɛnna ɔba bɛka kyerɛɛ Nyankopɔn nipa no. Na ɔkaa sɛ: Kɔ na kɔtɔn ngo no, na fa tua wo ka, na wo ne wo mma nni deɛ aka no ntena ase.

⁸ Na da bi Elisa sene kɔɔ Sunem. Na ɔbaa ɔdefoɔ bi wɔ hɔ a ɔhyɛɛ no ma ɔdidiiɛ. Na daa ɔretwam a, ɔmane hɔ kɔdidi.

⁹Na ɔka kyerɛɛ ne kunu sɛ: Hwɛ, mahunu sɛ Nyankopɔn nipa kronkron ne oyi a ɔbɛsene yɛn nkyɛn daa yi;

¹⁰ma yɛnyɛ abansoro fasuo mu pia ketewa bi, na yɛmfa mpadua, ɛpono, adwa ne kaneadua nsisi hɔ mma no, na sɛ ɔba yɛn nkyɛn a, wamane akɔ hɔ.

¹¹Na da bi ɔbaa hɔ, na ɔmane kɔɔ abansoro pia no mu kɔdaa hɔ.

¹²Na ɔka kyerɛɛ n’abɔfra Gehasi sɛ: Kɔfrɛ Sunemni no bra! Na ɔkɔfrɛɛ no bae, na ɔbɛgyinaa n’anim.

¹³Na Elisa ka kyerɛɛ Gehasi sɛ: Bisa no sɛ: Hwɛ, wode ɔhaw yi nyinaa aha wo ho ama yɛn: Ɛdeɛn na yɛnyɛ mma woɔ? Wowɔ asɛm bi a wɔnkɔka nkyerɛ ɔhene anaa ɔsafohene? Na ɔse: Me deɛ, mete me nkurɔfoɔ mu.

¹⁴Na ɔbisaa sɛ: Gehasi, ɛdeɛn na wɔnyɛ mma no? Na Gehasi kaa sɛ: Ampa, ɔnni ba, na ne kunu nso anyini.

¹⁵Na Elisa kaa sɛ: Frɛ no! Na ɔfrɛɛ no, na ɔbɛgyinaa ɛpono ano.

¹⁶ Na ɔkaa sɛ: Afeda sɛsɛberɛ yi mu no, wobɛwo ɔba. Na ɔse: Nyɛ saa, me wura, Nyankopɔn nipa, nni atorɔ nkyerɛ w’afenaa.

¹⁷Nanso ɔbaa no nyinsɛnee, na ɔwoo ɔbabarima afeda no mu, berɛ a Elisa ka kyerɛɛ no no mu.

¹⁸Na abɔfra no nyinii. Na da bi ɔfirii adi kɔɔ n’agya nkyɛn wɔ ayutwafoɔ nkyɛn.

¹⁹Na ɔka kyerɛɛ n’agya sɛ: Me ti, me ti! Na agya no ka kyerɛɛ aberanteɛ bi sɛ: Ma no so kɔma ne na.

²⁰Na ɔmaa no so de no brɛɛ ne na; na ɔde no tenaa ne srɛ so kɔsii awigyina, na ɔwui.

²¹Na ɔforo de no kɔtoo Nyankopɔn nipa no mpa no so, na ɔtoo ɛpono no mu na ɔfirii adi.

²²Na ɔkɔfrɛɛ ne kunu sɛ: Mesrɛ wo, soma mmeranteɛ no mu baako ne mfunumu abereɛ no mu baako brɛ me, na mentutu mmirika menkɔ Nyankopɔn nipa no nkyɛn na memmra.

²³Na ɔbisaa no sɛ: Adɛn nti na wopɛ sɛ wokɔ ne nkyɛn nnɛ yi? Ɛnyɛ ɔsrane foforɔ, na ɛnyɛ homeda. Na ɔbaa no kaa sɛ: Ɛnyɛ hwee.

²⁴Na ɔhyehyɛɛ afunumubereɛ no, na ɔka kyerɛɛ n’abɔfra no sɛ: Ka no kɔ ara, ngo ammirikatuo no mu, gye sɛ meka mekyerɛ wo ansa.

²⁵ Na ɔsii mu, na ɔbɛduruu Nyankopɔn nipa no nkyɛn Karmel bepɔ so. Na ɛbaa sɛ, Nyankopɔn nipa no hunuu no akyirikyiri no, ɔka kyerɛɛ n’abɔfra Gehasi sɛ: Hwɛ, Sunemni no nie.

²⁶Afei tu mmirika kɔhyia no, na bisa no sɛ: Wo ho yɛ anaa? Wo kunu ho yɛ anaa? Abɔfra no nso ho yɛ anaa? Na ɔbuaa sɛ: Ɛyɛ.

²⁷Na ɔduruu Nyankopɔn nipa no nkyɛn bepɔ no soɔ no, ɔbɛsosɔɔ ne nan. Na Gehasi twe pinii sɛ ɔrebɛsum no. Na Nyankopɔn nipa no kaa sɛ: Gyaa no, na ne kra werɛ aho wɔ ne mu, nanso AWURADE de ahunta me, na wanka ankyerɛ me.

²⁸ Na ɔbaa no kaa sɛ: Mebɛsrɛɛ me wura hɔ ɔba? Manka sɛ: Nnaadaa me anaa!

²⁹ Ɛnna ɔka kyerɛɛ Gehasi sɛ: Bɔ abɔsoɔ, na fa me poma kura na kɔ; woto obi a, nkyea no, nso obiara kyea wo a, nnye no so; na fa me poma yi kɔto abɔfra no anim.

³⁰Na abɔfra no na kaa sɛ: Sɛ AWURADE te aseɛ na wo kra te aseɛ yi, merennya wo hɔ. Ɛnna ɔsɔre dii n’akyi.

³¹Na Gehasi dii wɔn anim kɔe, na ɔde poma no kɔtoo abɔfra no anim; nanso wante nne biara, na wanhunu nkwa ho nsɛnkyerɛnneɛ biara. Na ɔsane kɔhyiaa no, na ɔka kyerɛɛ no sɛ: Abɔfra no nnyaneeɛ.

³²Na Elisa duruu fie hɔ no, ɔhunuu sɛ, abɔfra no awu da ne mpa so.

³³ Ɛnna ɔkɔɔ mu, na ɔtoo wɔn baanu pono mu, na ɔbɔɔ AWURADE mpaeɛ.

³⁴ Na ɔforo kɔbutuu abɔfra no so, na ɔde n’ano butuu n’ano, na ɔde n’ani butuu n’ani so, na ɔde ne nsam totoo ne nsam, na ɔponoo ne mu, abɔfra no so, na abɔfra no honam yɛɛ hye.

³⁵Ɛnna ɔsane ba bɛnantee ɛdan no mu dii hɔ akɔneaba. Na ɔforo kɔɔ bio kɔponoo ne mu wɔ ne so: Ɛnna abɔfra no nwansii mprɛnson, na abɔfra no buee n’ani.

³⁶ Na ɔfrɛɛ Gehasi sɛ: Frɛ Sunemni no! Na ɔfrɛɛ no, na ɔbaa ne nkyɛn. Na ɔkaa sɛ: Fa wo ba no!

³⁷Ɛnna ɔba bɛhwee ne nan ase kotoo no butuu fam, na ɔfaa ne ba no firii adi.

³⁸Na Elisa sane baa Gilgal. Na ɛkɔm aba asase no so, na adiyifoɔ mma no tete n’anim. Na ɔka kyerɛɛ n’abɔfra sɛ: Fa ɛsɛnkɛseɛ si so na noa aduane ma adiyifoɔ mma no.

³⁹Na ɔbaako firi kɔɔ wiram sɛ ɔrekɔtete fan, na ɔkɔhunuu wiram homa bi, na ɔtetee so wiram ɛferɛ ne ntoma ma, na ɔba bɛtwitwaa mu guu ɛsɛn a aduane wɔ mu no mu; nso na ɔnnim n’adeban.

⁴⁰Ɛnna wɔhwie maa nnipa no sɛ wɔnni. Na wɔredi aduane no bie no, wɔteaa mu sɛ: Awuduro wɔ ɛsɛne no mu, Onyame nipa! Na wɔantumi anni.

⁴¹Na ɔkaa sɛ: Ɛnneɛ momfa esiam mmra. Na ɔde guu ɛsɛn no mu, na ɔkaa sɛ: Hwie ma nkurɔfoɔ no na wɔnni. Na biribi bɔne bi nni ɛsɛn no mu bio.

⁴²Na ɔbarima bi nso firi Baal-salisa bae, na ɔbrɛɛ Nyankopɔn nipa no aba a ɛdi kan paanoo, atokoɔ paanoo aduonu ne ayuo foforɔ a wɔnhwaneeɛ. Na ɔkaa sɛ: Fa ma nkurɔfoɔ no na wɔnni.

⁴³ Na ne somfoɔ no bisaa sɛ: Ɛdeɛn? Memfa yei mensi nnipa ɔha anim anaa? Na ɔkaa bio sɛ: Fa ma nkurɔfoɔ no na wɔnni. Na sɛ AWURADE seɛ nie: Wɔbɛdi na wɔagya bi.

⁴⁴ Ɛnna ɔde sii wɔn anim; na wɔdii, na wɔgyaa bi, sɛdeɛ AWURADE asɛm no teɛ no.