Read Twi Asante 2 Ahemfo 6 Bible Online

2 Ahemfo 6 - Twi Asante bible

2 Ahemfo 6

¹Na adiyifoɔ mma no ka kyerɛɛ Elisa sɛ: Hwɛ, w’anim ha a yɛteɛ yi yɛ hiahiaa papa ma yɛn.

²Ma yɛnkɔ Yordan ano na yɛnkɔfa mpuna mmaako mmaako mfiri hɔ, na yɛnsiesie baabi wɔ hɔ ntena hɔ. Na ɔse: Monkɔ ɛ!

³Na ɔbaako kaa sɛ: Pene na ɛne wo nkoa nkɔ. Na ɔbuaa sɛ: Me nso mɛkɔ.

⁴Na ɔne wɔn sii mu kɔe. Na wɔduruu Yordan ano no, wɔbubuu nnua no.

⁵Na ɔbaako rebu dua no, n’akuma no ti firi tɔɔ nsuo mu. Na ɔteaa mu sɛ: Ao, me wura! Wɔkɔfɛmee oo.

⁶Na Nyankopɔn nipa no bisaa sɛ: Ɛhe na ɛtɔeɛ? Na ɔkyerɛɛ no hɔ. Na ɔtwaa dua bi too hɔ, na dadeɛ no bɛtɛɛ ani.

⁷Na ɔkaa sɛ: Ma so fa! Na ɔtenee ne nsa fae.

⁸Na Siriahene ne Israel bɛdii ako; na ɔne ne nkoa tuu agyina sɛ: Ɛha ne ha na mɛbɔ me nsraban.

⁹Na Nyankopɔn nipa no soma maa wɔkɔɔ Israel hene nkyɛn sɛ: Hwɛ yie, na wɔamfa saa bea yi so, ɛfiri sɛ ɛhɔ na Siriafoɔ nam reba.

¹⁰Na Israel hene soma maa wɔkɔɔ faako a Nyankopɔn nipa no ka kyerɛɛ no na ɔtuu no ɛho foɔ no hɔ, na ɔsraa hɔ, ɛnyɛ prɛko na ɛnyɛ mprenu nso.

¹¹Ɛnna Siriahene akoma peree no asɛm yi ho; na ɔfrɛɛ ne nkoa ka kyerɛɛ wɔn sɛ: Morenkyerɛ me yɛn mu deɛ ɔwɔ Israel hene afa?

¹²Na ne nkoa no mu baako kaa sɛ: Me wura Ɔhene, ɛnte saa, na mmom Odiyifoɔ Elisa a ɔwɔ Israel no na ɔka nsɛm a woka no wo dabekyire no kyerɛ Israel hene.

¹³Na ɔse: Monkɔ nkɔsra baabi a ɔwɔ, na mensoma mma wɔnkɔfa no mmra. Na wɔkyerɛɛ no sɛ: Hwɛ, ɔwɔ Dotan.

¹⁴Ɛnna ɔsomaa apɔnkɔ ne nteaseɛnam ne dɔm kɛseɛ kɔɔ hɔ, na wɔduruu anadwo, na wɔbɛtwaa kuro no ho hyiae.

¹⁵Na Nyankopɔn nipa no somfoɔ tuaa nhema sɛ ɔresɔre afiri adie no, na hwɛ, ɛdɔm ne apɔnkɔ ne nteaseɛnam atwa kuro no ho ahyia. Na n’abɔfra no ka kyerɛɛ no sɛ: Ao, me wura, yɛbɛyɛ dɛn?

¹⁶ Na ɔse: Nsuro, na wɔn a wɔka yɛn ho dɔɔso sene wɔn a wɔka wɔn ho no.

¹⁷Na Elisa bɔɔ mpaeɛ sɛ: AWURADE, bue n’ani na ɔnhunu! Na AWURADE buee aberanteɛ no ani, no ɔhunui, na hwɛ, ogya apɔnkɔ ne nteaseɛnam ayɛ bepɔ no so ma atwa Elisa ho ahyia.

¹⁸ Ɛnna Siriafoɔ siane baa ne so, na Elisa bɔɔ AWURADE mpaeɛ sɛ: Mesrɛ wo, fa anifira bɔ dɔm yi; na ɔde anifira bɔɔ wɔn, sɛdeɛ Elisa asɛm no teɛ no.

¹⁹Na Elisa ka kyerɛɛ wɔn sɛ: Ɛnyɛ ɔkwan nie, na ɛnyɛ kuro no nie, monni m’akyi, na memfa mo nkɔ ɔbarima a morehwehwɛ no no nkyɛn. Na ɔde wɔn kɔɔ Samaria.

²⁰Na ɛbaa sɛ wɔduruu Samaria no, Elisa bɔɔ mpaeɛ sɛ: AWURADE, bue wɔn ani, na wɔnhunu; na AWURADE buee wɔn ani, na wɔhunui, na hwɛ, na wɔwɔ Samaria mfimfini.

²¹Na Israel hene hunuu wɔn no, ɔbisaa Elisa sɛ: M’agya, memmobɔ wɔn anaa?

²² Na ɔbuaa sɛ: Dabi, mmobɔ wɔn. Deɛ wode wo nkrantɛ ne wo tadua afa no dommum no na wobɔ no. Fa aduane ne nsuo sisi wɔn anim na wɔnni na wɔnnom, na wɔnkɔ wɔn wura nkyɛn.

²³Na ɔtoo ɛpono kɛseɛ maa wɔn; na wɔdidiiɛ na wɔnomeeɛ no, ɔgyaa wɔn kwan, na wɔsii mu kɔɔ wɔn wura nkyɛn. Na Siria fomfafoɔ asafo no antoa so amma Israel asase so bio.

²⁴Na ɛno akyiri no Siriahene Ben-hadad boaa ne dɔm nyinaa ano hyiae, na ɔforo ba bɛtuaa Samaria.

²⁵Na ɛkɔm kɛseɛ baa Samaria, na hwɛ, wɔkaa wɔn hyɛɛ mu ara de kɔsii sɛ wɔtɔn afunumu ti gyee nnwetɛbena aduɔwɔtwe, na mmuruburo bini kab abupɛn nnan mu baako gyee nnwetɛbena nnum

²⁶Na Israel hene retwam ɔfasuo no soɔ no, ɔbaa bi bɔn no sɛ: Owura Ɔhene, boa me!

²⁷Na ɔse: Sɛ AWURADE ammoa wo a, mɛfiri he na maboa woɔ? Ɛmfiri ayuporebea anaa nsa-kyi-amena mu?

²⁸Na Ɔhene ka kyerɛɛ no sɛ: Ɛdeɛn na ayɛ woɔ? Na ɔse: Ɔbaa yi ka kyerɛɛ me sɛ: Fa wo ba ma yɛnni ne nam nnɛ, na yɛadi me ba nam ɔkyena.

²⁹ Na yɛnoaa me ba no weeɛ; na adeɛ kyeeɛ no, mesee no sɛ: Fa wo ba bra ma yɛnwe; na ɔde ne ba no ahunta.

³⁰Na ɔhene tee ɔbaa no nsɛm no, ɔsunsuanee ne ntadeɛ mu. Na ɔretwam ɔfasuo no soɔ no, nkurɔfoɔ no hwɛe, na ɔfira ayitoma wɔ aseɛ de akata ne honam ani.

³¹Ɛnna ɔkaa sɛ: Sɛ wɔankum Safat ba Elisa nnɛ da yi a, Onyankopɔn nyɛ me sei na ɔnto so sei.

³²Nanso na Elisa te ne fie, na mpanimfoɔ no tete ne nkyɛn. Na ɔhene somaa onipa dii n’anim. Na ɔbɔfoɔ no nnya nnuruu ne nkyɛn no, ɔno ara ka kyerɛɛ mpanimfoɔ no sɛ: Sɛ moahunu sɛ owudini ba yi asoma sɛ wɔmmɛtwa me tire? Monhwɛ, sɛ ɔbɔfoɔ no ba a, monto pono mu, na mompia no nkɔ pono ano. Ɛnyɛ ne wura nan ase pim pim na ɛdi n’akyire yi?

³³ Na ɔda so ne wɔn rekasa no, hwɛ, na ɔbɔfoɔ no resiane aba ne nkyɛn. Na ɔkaa sɛ: Hwɛ, bɔne yi firi AWURADE nkyɛn, ɛdeɛn na mentwɛn AWURADE mennye bio?