Read Twi Asante 1 Berɛsosɛm 11 Bible Online

1 Berɛsosɛm 11 - Twi Asante bible

1 Berɛsosɛm 11

¹ Na Israel nyinaa boaboaa wɔn ano baa Dawid nkyɛn wɔ Hebron bɛkaa sɛ: Hwɛ, wo bogya ne yɛn.

²Na kane a na Saulo di hene no, wo ara na wode Israel firii adie na wode wɔn baa mu. Na AWURADE wo Nyankopɔn aka akyerɛ wo sɛ: Wo na wobɛyɛne me man Israel, na wo ara na wobɛdi me man Israel so bapɔmma.

³ Na Israel mpanimfoɔ nyinaa baa ɔhene no nkyɛn Hebron, na Dawid ne wɔn pam AWURADE anim wɔ Hebron, na wɔsraa Dawid ngo sii no Israel so hene, sɛdeɛ AWURADE asɛm a ɔnam Samuel so kaeɛ no teɛ.

⁴Na Dawid ne Israel nyinaa sii mu kɔɔ Yerusalem, a na ɛne Yebus no, ɛfiri sɛ ɛhɔ na na Yebusifoɔ a wɔyɛ asase no sofoɔ no teɛ.

⁵Na Yebusifoɔ no ka kyerɛɛ Dawid sɛ: Woremma ha. Nanso Dawid faa Sion aban a ɛne Dawid kuro no.

⁶Na Dawid kaa sɛ: Obiara a ɔbɛkum Yebusifoɔ kane no, ɔbɛyɛ otitire ne ɔsafohene. Ɛnna Seruia ba Yoab foro kɔɔ kane, na ɔyɛɛ otitire.

⁷Na Dawid tenaa aban no mu, saa nti na wɔfrɛ no Dawid kuro.

⁸Na Dawid kyekyeree kuro no hyiae de firi Milo ara de twaa ho hyiae. Na Yoab siesiee kuro no nkaeɛ no.

⁹Na Dawid kɔɔ so ara yɛɛ kɛseɛ, ɛfiri sɛ Asafo AWURADE dii n’akyi.

¹⁰ Na yeinom ne nnɔmmarima a na Dawid wɔ no mu atitire a wɔhyɛɛ wɔn ho den kaa ne ho n’ahennie mu, sɛ wɔne Israel nyinaa bɛsi no hene, sɛdeɛ AWURADE asɛm a ɔkaa no Israel ho no teɛ.

¹¹ Na yeinom ne nnɔmmarima a na Dawid wɔ no dodoɔ: Hakmonini Yasobeam, ɔdi akunini tire, ɔno na ɔde ne pea kumm nnipa ahasa prɛko pɛ.

¹² Na n’akyiri na Ahohini Dodo ba Eleasa die, ɔfra nnɔmmarima baasa no mu.

¹³Ɔno na na ɔne Dawid wɔ Pas-damim no, na Filistifoɔ aboaboa wɔn ano wɔ hɔ sɛ wɔrebɛdi ako, na asasewa bi wɔ hɔ a atokoɔ ayɛ so ma, na ɔman no dwanee firii Filistifoɔ anim.

¹⁴Ɔno ne nkaeɛ no kɔgyinaa asasewa no mfimfini gyee wɔn ho, na wɔkum Filistifoɔ no. Na AWURADE de nkonimdie kɛseɛ gyee wɔn.

¹⁵ Na atitire aduasa no mu baasa siane kɔɔ ɔbotan no so Dawid nkyɛn, Adulam bodan no mu, na Filistifoɔ dɔm akyere nsraban Refaim bonhwa mu.

¹⁶Nso ɛberɛ no mu, na Dawid wɔ bepɔ so atenaeɛ no mu, na Filistifoɔ bansifoɔ wɔ Betlehem.

¹⁷Na Dawid kɔn dɔe, na ɔkaa sɛ: Hwan na ɔbɛma me Betlehem asubura a ɛwɔ kuro pono ho no mu nsuo anom?

¹⁸Na mmarima baasa no te faa Filistifoɔ nsraban no mu kɔsaa Betlehem asubura a ɛwɔ kuro pono ho no mu nsuo de brɛɛ Dawid. Nanso Dawid ampɛ sɛ ɔnom, na ɔhwie gu maa AWURADE,

¹⁹na ɔkaa sɛ: Me Nyankopɔn mma no mpare me sɛ mɛyɛ yei. Mennom mmarima yi mogya wɔn kra so anaa? Na wɔn nkwa na wɔde too hɔ kɔfa baeɛ yi. Na wampɛ sɛ ɔnom. Yei na nnɔmmarima baasa no yɛeɛ.

²⁰Na Yoab nua Abisai nso di baasa no ti. Ɔno nso na ɔhwinhwim ne pea atɔfoɔ ahasa soɔ, na ɔwɔ din baasa no mu.

²¹Nnipa baasa no mu, na ɔwɔ animuonyam sene baanu no, na ɔdi wɔn safohene, nanso wanto akane baasa no.

²²Yehoiada ba Benaia yɛ ɔbarima katakyie a ɔfiri Kabseel a ɔyɛɛ nnoɔma akɛseɛ. Ɔno na ɔkum Moabni Ariel mma baanu no. Na ɔno nso na ɔsiane kɔkum gyata, abura bi mu, da bi a sukyerɛmma atɔ.

²³ Na ɔno ara nso na ɔkɔkumm Misraimni barima bi a ne tentene yɛ basafa mmienu ne fa. Na Misraimni no kura pea a ɛte sɛ ntomanwomfoɔ nsadua wɔ ne nsam, na ɔde poma siane kɔɔ ne nkyɛn, na ɔhwimm Misraimni no nsam pea no de ɔno ara ne pea no kumm no.

²⁴ Yei na Yehoiada ba Benaia yɛeɛ, na ɔwɔ din nnɔmmarima baasa no mu.

²⁵Hwɛ, na ɔwɔ animuonyam sene akunini aduasa no, nanso akane baasa no deɛ, wanto wɔn. Na Dawid de no sii n’ankɔbeafoɔ so.

²⁶Na dɔm no mu nnɔmmarima no ne: Yoab nua Asahel, Betlehemni Dodo ba Elhanan,

²⁷ Harorini Samot, Pelonni Heles,

²⁸Tekoani Ikes ba Ira, Anatotni Abieser,

²⁹Husani Sibekai, Ahohini Ilai,

³⁰Netofani Maharai, Netofani Baana ba Heled.

³¹Ribai a ɔfiri Gibea a ɛwɔ Benyamin mma mu ba Itai, Piratonni Benaia,

³²Nahale-gaasni Hurai, Arabani Abiel,

³³Baharumni Asmawet, Saalbonni Eliahba,

³⁴Gisoni Hasem mma, Hararini Sage ba Yonatan,

³⁵Hararini Sakar ba Ahiam, Ur ba Elifal,

³⁶Mekerani Hefer, Pelonni Ahia,

³⁷Karmelni Hesro, Esbai ba Naarai,

³⁸Natan nua Yoel, Hagri ba Mibhar,

³⁹Amonni Selek, Berotni Naharai a ɔyɛ Seruia ba Yoab akodeɛkurani,

⁴⁰Yitrini Ira, Yitrini Gereb,

⁴¹ Hetini Uria, Ahlai ba Sabad,

⁴²Rubenni Sisa ba Adina a ɔyɛ Rubenfoɔ so otitire, na nnipa aduasa ka ne ho;

⁴³Maaka ba Hanan, Mitni Yosafat,

⁴⁴Asteratni Usia, Aroerni Hotam mma Sama ne Yeiel,

⁴⁵Simri ba Yediael ne Tisini Yoha a ɔyɛ ne nua,

⁴⁶Mahawini Eliel, Elnaam mma Yeribai ne Yosawia, Moabni Yitma,

⁴⁷Eliel, ne Obed, ne Mesobaini Yaasiel.