Read Twi Asante 2 Berɛsosɛm 4 Bible Online

2 Berɛsosɛm 4 - Twi Asante bible

2 Berɛsosɛm 4

¹ Na ɔyɛɛ kɔbere mfrafraeɛ afɔrebukyia, ne ntwemu, basafa du, na ne trɛ, basafa du, na ne korɔn, basafa nnum.

²Na ɔyɛɛ dwaresɛn no kurukuruwa. Ɛfiri ano kɔsi ano yɛ basafa nnum. Na basafa mmienu ne fa ne ne korɔn, na basafa dunum homa twa ho hyia.

³Na ntoa nsɛsoɔ wowɔ aseɛ de twa ɛho nyinaa hyia, edu wɔ anammɔn baako ne fa mu, ɛbɔ no ho kɔntɔnkrɔn; ntoa akyerɛpɛn mmienu, wɔguu no sɛdeɛ aka no.

⁴Ɛsi anantwie dummienu so, mmiɛnsa hwɛ atifi fam, na mmiɛnsa hwɛ atɔeɛ, na mmiɛnsa hwɛ anafoɔ fam, na mmiɛnsa hwɛ apueeɛ. Na ɛpo no si wɔn so ɔsoro, na wɔn akyiri nyinaa wɔ emu fam.

⁵Na ne pipiripie yɛ nsayam trɛ, na ɔyɛɛ ano sɛ kuruwa ano, te sɛ sukooko nhwiren a ahane, na galɔn mpem dunum kɔ mu.

⁶Na ɔyɛɛ nnwaresɛn du, na ɔde nnum sisii nifa fam, na ɔde nnum nso sisii atifi fam, sɛ wɔnhohoro nnoɔma ho wɔ mu; ɔhyeɛ afɔdeɛ nnoɔma no na wɔhohoro ho wɔ mu; na ɛpo no deɛ, ɛwɔ hɔ ma asɔfoɔ, na wɔahohoro wɔn ho wɔ mu.

⁷Na ɔyɛɛ sika nkaneadua du sɛdeɛ ne yɛbea teɛ, na ɔde sisii asɔredan no mu, enum wɔ anafoɔ fam, na enum nso wɔ atifi fam.

⁸Na ɔyɛɛ apono du de sisii asɔredan no mu, enum wɔ nifa, na enum wɔ benkum. Na ɔyɛɛ sika nkoraa ɔha.

⁹Na ɔyɛɛ asɔfoɔ abannwa ne ban mu adihɔ kɛseɛ no, na ɔde apono sisii adihɔ no ano, na ɔde kɔbere mfrafraeɛ duraa apono no ho.

¹⁰Na ɔde ɛpo no sii atɔeɛ fa a ɛkyerɛ apueeɛ no.

¹¹Na Huram yɛɛ nsenaa ne sesa adeɛ ne nkoraa no nso. Na Huram wiee adwuma a ɔyɛ maa Ɔhene Salomo Nyankopɔn fie no yɛ,

¹²adum mmienu no ne apɔ no ne adum no atifi aduntire mmienu no, ne ntentan mmienu a wɔde kataa adum no atifi ntaasotire apɔ mmienu no ho no,

¹³ne ntentan mmienu no akutuo ahanan, akutuo kyerɛpɛn mmienu yɛ ntentan baako deɛ, sɛ ɛnkata adum no so ntaasotire mmienu apɔ no ho;

¹⁴na ɔyɛɛ nsugyeɛ nnaka no, na ɔyɛɛ nnyinasoɔ nnaka no so nnwaresɛn no;

¹⁵ɛpo baako ne aseɛ anantwie dummienu no,

¹⁶ne nsenaa ne sesa adeɛ ne adinam no ne ɛho nnoɔma nyinaa, Huram-Abi yɛ maa Ɔhene Salomo maa AWURADE fie no, ɛyɛ kɔbere mfrafraeɛ a wɔabere ho hyɛnhyɛn.

¹⁷Yordan ho mpaperɛ so na ɔhene guu no, dɔteɛ a ɛsɔ mu, Sukot ne Sereda ntam.

¹⁸Na Salomo yɛɛ nnoɔma yi nyinaa bebree pa ara, na wɔnnim kɔbere mfrafraeɛ no nkariiɛ ano.

¹⁹Na Salomo yɛɛ Nyankopɔn fie nnoɔma no nyinaa ne sika afɔrebukyia no ne apono a kyerɛ paanoo sisi soɔ no

²⁰ne nkaneadua no ne ɛho nkanea a wɔsɔ no, sɛdeɛ ne yɛbea teɛ mpiakyire no anim no, ɛyɛ sika amapa,

²¹na ɛho nhwiren ne nkanea ne adaban no yɛ sika, ne nyinaa yɛ sika ara nko.

²²Na adumgya, nkoraa, aduhwam nkukuwa ne nsramma kukuwa no nso yɛ sika amapa kronkron, na ɛdan no ano apono a ɛwɔ emu fam kronkronkronbea ho no ne asɔrefie dan no apono no yɛ sika.