Read Twi Asante 2 Berɛsosɛm 9 Bible Online

2 Berɛsosɛm 9 - Twi Asante bible

2 Berɛsosɛm 9

¹ Na Seba hemmaa tee Salomo nka no, ɔbaa sɛ ɔde nsɛm a emu yɛ den rebɛsɔ no ahwɛ. Na ɔne asafo yuu pa ne yoma a wɔsoso nnuhwam ne sika pii pa, ne abohene baa Yerusalem. Na ɔduruu Salomo nkyɛn no, ɔne no bɔɔ deɛ ɛwɔ n’akomam nyinaa ho nkɔmmɔ.

²Na Salomo buaa no ne nsɛm nyinaa, na asɛm biara anhunta Salomo a wanka ankyerɛ no.

³Na Seba hemmaa no hunuu Salomo nyansa ne efie a wasie

⁴ne ne pono so nnuane, ne ne nkoa atenaeɛ, ne n’asomfo agyinaeɛ ne wɔn ntadeɛ, ne ne nsahyɛfoɔ ne wɔn ntadeɛ, ne n’aforoeɛ a ɔnam so kɔ AWURADE fie no, ne ho dwirii no.

⁵Na ɔka kyerɛɛ ɔhene no sɛ: Wo nneyɛɛ ne wo nyansa ho asɛm a metee no m’asase soɔ no yɛ nokorɛ,

⁶na mannye wɔn nsɛm no manni de bɛsii sɛ mebaeɛ, na mede m’ani mabɛhunu yi. Na hwɛ, wɔanka me wo nyansa so a ɛso no mu fa mpo, wosene wo ho nsɛm a meteeɛ no.

⁷ Nhyira ne wo nnipa, na nhyira ne wo nkoa yi a wɔgyinagyina w’anim daa yi, sɛ daa wɔte wo nyansa no.

⁸Nhyira nka AWURADE wo Nyankopɔn a ɔpɛ w’asɛm na ɔde wo atena n’adwa so sɛ di hene ma AWURADE wo Nyankopɔn. Sɛ wo Nyankopɔn dɔ Israel, sɛ ɔde no bɛtim hɔ de akɔsi daa nti, na ɔde wo asi wɔn so hene, sɛ yɛ atemmudeɛ ne teneneedeɛ.

⁹Na ɔmaa ɔhene sika dwetikɛseɛ ɔha aduonu ne nnuhwam pii pa ara ne abohene, na nnuhwam a ɛte sɛ deɛ Seba hemmaa no de maa Ɔhene Salomo no so bi amma bio.

¹⁰Na Huram nkoa ne Salomo nkoa a wɔde sika firi Ofir baeɛ no nso de abako nnua ne abohene bae.

¹¹Na ɔhene de abako nnua no yɛɛ AWURADE fie ne ɔhene fie ntrapoe ne nsankutene ne mmɛnta maa nnwontofoɔ no. Na wɔnhunuu saa nnoɔma no bi pɛn wɔ Yuda asase so.

¹²Na Ɔhene Salomo maa Seba hemmaa no n’adeɛ a ɔpɛ a ɔbisaeɛ no nyinaa, ɛsono deɛ ɔde brɛɛ ɔhene no. Ɛnna ɔno ne ne nkoa sane sii mu kɔɔ n’asase soɔ.

¹³Nso sika a na ɛba Salomo nsam afe baako mu duro yɛ sika dwetikɛseɛ ahansia aduosia nsia,

¹⁴ɛsono deɛ ɛfiri adwadifoɔ hɔ, ne deɛ abatafoɔ de ba. Na Arabia ahemfo nyinaa ne asase no so amradofoɔ no nso de sika ne dwetɛ brɛɛ Salomo.

¹⁵Na Ɔhene Salomo de sika a wɔaborɔ yɛɛ akyɛm akɛseɛ ahanu, sika a wɔaborɔ nnwetɛbena ahansia na ɔde duraa akyɛm no mu biara ho.

¹⁶Na ɔyɛɛ sika a wɔaborɔ akyɛm ahasa, sika nnwetɛbena ahasa na ɔde duraa akyɛm no mu biara ho. Na ɔhene de kɔsiee Lebanon Kwaeɛ dan no mu.

¹⁷Na ɔhene de asonse yɛɛ ahennwa kokuroo, na ɔde sika amapa duraa ho;

¹⁸na adwa no wɔ ntrapoe nsia, na sika ntiasoɔ wɔ adwa no ho a wɔabobɔ mu, na nsa wowɔ ɛha ne ha, atenaeɛ no ho, na agyata mmienu gyinagyina nsa no ho;

¹⁹na agyata dummienu gyinagyina hɔ wɔ ntrapoe nsia no so ɛha ne ha. Wɔnyɛɛ saa bi da ahennie biara mu.

²⁰Na Ɔhene Salomo nnoɔma a ɔnom mu nyinaa yɛ sika, na Lebanon Kwaeɛ dan mu nnoɔma nyinaa yɛ sika amapa, dwetɛ nni mu. Wɔmmu dwetɛ hwee Salomo berɛ so.

²¹Na ɔhene wɔ ahyɛnkuo a ɛne Huram nkoa no kɔ Tarsis; mfeɛ mmiɛnsa biara Tarsis ahyɛn no ba prɛko de sika ne dwetɛ, asonse ne nkontromfi ne nkokɔnini-abankwaa ba.

²²Na Ɔhene Salomo so senee asase so ahemfo nyinaa, adedodoɔ ne nyansa fam.

²³Na asase so ahemfo nyinaa hwehwɛɛ sɛ wɔbɛhunu Salomo anim na wɔate nyansa a Onyankopɔn de ahyɛ n’adwene mu no bie.

²⁴Na wɔde wɔn ayɛyɛdeɛ ba mmaako mmaako, dwetɛ nnoɔma ne sika nnoɔma ne ntadeɛ, akodeɛ ne nnuhwam, apɔnkɔ ne mfunumupɔnkɔ, afe biara ne ne deɛ.

²⁵ Na Salomo wɔ apɔnkɔ adan mpemnan ne nteaseɛnam ne apɔnkɔsotefoɔ mpem dummienu, na ɔde wɔn tenatenaa nteaseɛnam nkuro mu, ne ɔhene nkyɛn wɔ Yerusalem.

²⁶Na ɔdii ahennie nyinaa so de firi Asuo Eufrate ano de kɔsii Filistifoɔ asase so ne Misraim hyeɛ so.

²⁷Na ɔhene maa dwetɛ yɛɛ sɛ aboɔ, Yerusalem, na ntweneduro nso, ɔmaa no yɛɛ sɛ akyee nnua a ɛwɔ mpaperɛ soɔ no dodoɔ.

²⁸Na wɔkraa apɔnkɔ firii Misraim ne nsase nyinaa so brɛɛ Salomo.

²⁹ Na Salomo ho nsɛm nkaeɛ, akane deɛ ne akyire yi deɛ no, wɔantwerɛ no Odiyifoɔ Natan nsɛm ne Siloni Ahia adiyisɛm ne Odehwɛfoɔ ldo adehwɛ a ɔhwɛɛ no Nebat ba Yeroboam ho no mu?

³⁰Na Salomo dii Israel nyinaa so hene Yerusalem mfirinhyia aduanan.

³¹Na Salomo tii n’agyanom wɔ asamando, na wɔsiee no n’agya Dawid kuro mu. Na ne ba Rehoboam bɛdii n’adeɛ.