Read Twi Asante Eksodɔs 11 Bible Online

Eksodɔs 11 - Twi Asante bible

Eksodɔs 11

¹Na AWURADE ka kyerɛɛ Mose sɛ: Mɛma ɔhaw baako aba Farao ne Misraim so bio, na ɛno akyiri no, ɔbɛma moafiri ha akɔ koraa; pamo mpo na ɔbɛpamo mo afiri ha.

² Afei kasa ma ɔman no nte sɛ: Mmarima ne mmaa mmisabisa wɔn nnamfonom hɔ dwetɛ nnwinneɛ ne sika nnwinneɛ.

³Na AWURADE maa ɔman no anim baa nyam wɔ Misraimfoɔ anim; nso ɔbarima Mose no yɛ kɛseɛ pa wɔ Misraim asase no so wɔ Farao nkoa ne ɔman no anim.

⁴Na Mose kaa sɛ: Sɛ AWURADE seɛ nie: Anadwo dasuo mu no, mɛfiri adi mafa Misraim,

⁵ na Misraim asase so mmakan nyinaa bɛwuwu, ɛfiri Farao abakan a ɔtena n’adwa soɔ so de kɔsi afenaa a ɔwɔ oyuyammoɔ akyire abakan ne mmoa mmakan nyinaa so.

⁶Na osu kɛseɛ a ɛso bi mmaa da, na ɛso bi nso remma bio bɛba Misraim asase nyinaa so.

⁷ Na Israel mma nyinaa deɛ, ɔkraman mpo rentwe ne tɛkyerɛma ntia wɔn, ɛfiri nnipa so kɔsi mmoa so, na moahunu sɛ AWURADE apae Misraim ne Israel ntam.

⁸Na wo nkoa yi nyinaa bɛsiane aba me nkyɛn abɛkoto me aka sɛ: Firi adi kɔ, wo ne ɔman a ɛdi w’akyire no nyinaa. Na ɛno akyiri no mɛfiri makɔ. Na ɔde abufuhyeɛ firii Farao nkyɛn kɔe.

⁹Na AWURADE ka kyerɛɛ Mose sɛ: Farao rentie mo, na ama m’anwanwadeɛ adɔɔso wɔ Misraim asase so.

¹⁰ Na Mose ne Aaron yɛɛ anwanwadeɛ yi nyinaa wɔ Farao anim, na AWURADE pirim Farao akoma, na wamma Israelfoɔ no amfiri n’asase so ankɔ.