Read Twi Asante Eksodɔs 12 Bible Online

Eksodɔs 12 - Twi Asante bible

Eksodɔs 12

¹ Na AWURADE ka kyerɛɛ Mose ne Aaron wɔ Misraim asase so sɛ:

² Momfa bosome yi nyɛ abosome ti, na ɛnyɛ mo afe mu bosome a ɛdi kan.

³Monka nkyerɛ Israel asafo no nyinaa sɛ: Bosome yi da a ɛtɔ so du no, wɔmfa nnwammaa mmaako mmaako, sɛdeɛ wɔn mpanimfie teteɛ; efie baako adwammaa baako.

⁴Na sɛ efie no mufoɔ nnɔɔso sɛ wɔbɛdi adwammaa a, ma no ne deɛ ɔne no bɔ fipam mfa bi, sɛdeɛ akra no dodoɔ teɛ. Monkan adwammaa so nnipa sɛdeɛ ɛbɛso wɔn die.

⁵ Adwammaa a ɔnni dɛm na momfa, onini a wadi afe wɔ nnwanten anaa mmirekyie mu.

⁶Na momfa no nsie nkɔduru bosome yi da a ɛtɔ so dunan; na Israel asafo mu no nyinaa nkɔku wɔn anwummerɛ.

⁷ Na wɔmfa mogya no bi nsra adan a wɔbɛdi wɔ mu no aponnwa mmienu ne aponnwatifi no ho.

⁸Na wɔnni nam no anadwo no ara; wɔmfa ogya ntoto, na wɔmfa apiti ne fan nwononwono nni.

⁹Monnni no amono, na mommfa nsuo nnnoa, na mmom momfa ogya ntoto no mua a, ne ti ne n’asrɛ ne n’ayamdeɛ nyinaa ka ho.

¹⁰Na monnnya bi nnsie na adeɛ nnkye so. Na sɛ ebi ka na adeɛ kye so a, momfa ogya nhye.

¹¹ Na sɛdeɛ monni no nie: Monkyekyere mo asene, na mo mpaboa nhyehyɛ mo nan, na mo mpoma nkurakura mo nsam, na monni no herɛ so: Ɛyɛ AWURADE twam.

¹² Na merebɛtwam Misraim asase so anadwo yi, na makum Misraim asase so mmakan nyinaa, ɛfiri nnipa so kɔsi mmoa so, na mɛbu Misraim anyame nyinaa atɛn, mene AWURADE.

¹³ Na mogya no nyɛ nsɛnkyerɛnneɛ mma mo, afie a mowowɔ mu no mu, na sɛ mehunu mogya no a, masiane mo ho, na merebɔ Misraim asase a, ɔyaredɔm biara amma mo so ammɛsɛe mo.

¹⁴Na ɛda yi nyɛ mo nkaeɛ, na monhyɛ ho fa mma AWURADE, mo awoɔ ntoatoasoɔ mu; monyɛ no afahyɛ, daa atorɔmudeɛ.

¹⁵ Nnanson na monni apiti. Da a ɛdi kan no ara na monyi mmɔreka nyinaa mfiri mo afie mu, ɛfiri sɛ obiara a ɔbɛdi mmɔreka paanoo firi da a ɛdi kan no de akɔsi da a ɛtɔ so nson no, wɔbɛtwa saa ɔkra no afiri Israel mu.

¹⁶Na da a ɛdi kan no monhyia nhyia kronkron, na da a ɛtɔ so nson no nso monhyia nhyia kronkron. Wɔnnyɛ adwuma biara wɔ mu, gye deɛ obiara bɛdie nko ho adwuma na monyɛ.

¹⁷Na monhyɛ apiti fa no, ɛfiri sɛ saa da yi ara na meyii mo dɔm no firii Misraim asase soɔ. Ɛno nti monni da yi mo awoɔ ntoatoasoɔ mu nyɛ no daa atorɔmudeɛ.

¹⁸Bosome a ɛdi kan no da a ɛtɔ so dunan no anwummerɛ no momfiri apiti die ase nkɔsi bosome no da a ɛtɔ so aduonu baako anwummerɛ.

¹⁹Nnanson na mommma wɔnnhunu mmɔreka wɔ mo afie mu, ɛfiri sɛ obiara a ɔbɛdi paanoo a emu aka no, ɔhɔhoɔ oo, deɛ wɔwoo no asase no soɔ oo, wɔbɛtwa saa ɔkra no afiri Israel asafo mu.

²⁰Monnni biribiara a emu aka. Monni apiti mo tenabea nyinaa.

²¹Ɛnna Mose frɛɛ Israel mpanimfoɔ nyinaa ka kyerɛɛ wɔn sɛ: Monyiyi nnwan mfa, sɛdeɛ mo mmusua teɛ, na monkum twam aboa no.

²²Na momfa adwera esia mmɔ mogya a ɛwɔ yaawa mu no mu, na momfa yaawa no mu mogya no bi nsra aponnwatifi ne aponnwa mmienu no ho, na mo mu biara mmfiri adi mmfiri ne fie pono ano kɔsi anɔpa.

²³Ɛfiri sɛ AWURADE bɛtwam abobɔ Misraimfoɔ, na sɛ ɔhunu mogya no wɔ aponnwatifi ne aponnwa mmienu no ho a, AWURADE bɛsiane pono no ho, na ɔremma ɔsɛefoɔ no kwan mma ɔmma mo afie mmɛbobɔ mo.

²⁴Na monni asɛm yi so, na ɛnyɛ ahyɛdeɛ mma wo ne wo mma nkɔsi daa.

²⁵Na sɛ moduru asase a AWURADE de bɛma mo sɛdeɛ ɔkaeɛ no so a, monni ɛsom yi so.

²⁶ Na sɛ mo mma bisa mo sɛ: Mo som yi aseɛ ne sɛn a,

²⁷monka sɛ: Ɛyɛ twam afɔdeɛ a yɛbɔ ma AWURADE a ɔsianee Israelfoɔ afie ho wɔ Misraim, ɛda a ɔbobɔɔ Misraimfoɔ na ɔyii yɛn afie firii mu.

²⁸Na ɔman no nyinaa bobɔɔ wɔn mu ase sɔree. Na Israelfoɔ sii mu kɔ kɔyɛɛ sɛdeɛ AWURADE hyɛɛ Mose ne Aaron no.

²⁹ Na anadwo dasuo mu no, AWURADE bobɔɔ Misraim asase so mmakan nyinaa, ɛfiri Farao abakan a ɔtena n’adwa soɔ so de kɔsi dommum a ɔwɔ deduadan mu abakan so ne afieboa mmakan nyinaa.

³⁰Ɛnna Farao sɔree anadwo no ara, ɔne ne nkoa nyinaa ne Misraimfoɔ nyinaa, na esu kɛseɛ baa Misraim, ɛfiri sɛ na efie biara nni hɔ a efunu nni mu.

³¹Na Farao frɛɛ Mose ne Aaron anadwo no kaa sɛ: Monsɔre mfiri me man mu, mo ne Israelfoɔ no, na monkɔ nkɔsom AWURADE, sɛdeɛ mokaeɛ no.

³² Mo nnwan ne mo anantwie nso, momfa wɔn, sɛdeɛ mokaeɛ no, na monkɔ, na monhyira me nso.

³³ Na Misraimfoɔ piapiaa ɔman no sɛ wɔnyɛ ntɛm mfiri asase no so, ɛfiri sɛ wɔse: Yɛn nyinaa rewuwu.

³⁴Na ɔman no soasoaa wɔn mmɔre ansa na ɛreka, kyekyeree wɔn mmɔre nkodoɔ wɔ wɔn ntoma mu de sisii wɔn kɔn ho.

³⁵ Na Israelfoɔ no yeyɛɛ sɛdeɛ Mose ka kyerɛɛ wɔn no, na wɔbisabisaa Misraimfoɔ hɔ dwetɛ nnwinneɛ, sika nnwinneɛ ne ntoma.

³⁶ Na AWURADE maa ɔman no anim baa nyam, Misraimfoɔ anim, na wɔde deɛ wɔbisaeɛ maa wɔn. Na wɔfaa Misraimfoɔ agyapadeɛ no kɔe.

³⁷Na Israelfoɔ no sii mu firii Rameses kɔɔ Sukot, wɔbɛyɛ mmarima a wɔnam fam, mpem ahansia, wɔankan mmaa ne mmɔfra anka ho.

³⁸Na afrafrafoɔ pii nso ne wɔn kɔe, ne nnwan ne anantwie, mmoa pii pa ara.

³⁹Na wɔde mmɔre a wɔde firi Misraim baeɛ no totoo apiti ɔfam, na na ɛnkae, ɛfiri sɛ Misraimfoɔ no pamm wɔn, a wɔantwentwɛn wɔn nan ase, na wɔannya kwan nso ansiesie akwansoduane.

⁴⁰ Na Israelfoɔ tena a wɔtenaa Misraim no yɛ mfirinhyia ahanan aduasa.

⁴¹Na mfeɛ ahanan aduasa no awieeɛ no, ɛda no ara na AWURADE asafo no nyinaa firii Misraim asase soɔ.

⁴²Ɛyɛ anadwo a AWURADE ankasa dii Israelfoɔ no afoofi na ɔyii wɔn firii Misraim asase so. Wɔhyɛ ho fa de ma AWURADE wɔ Israelfoɔ nyinaa mu wɔn awoɔ ntoatoasoɔ mu.

⁴³Na AWURADE ka kyerɛɛ Mose ne Aaron sɛ: Yei ne twam no ho ahyɛdeɛ: Ɔnanani biara nnni bi.

⁴⁴Na obiara akoa a ɔde sika atɔ no no, twa no twetia ansa na wadi bi.

⁴⁵Mo nkyɛn tenafoɔ ne ɔpaani nnni bi.

⁴⁶ Efie baako mu na wɔnnie, wɔmmfa nam no bi mmfiri fie hɔ mmfiri adi, na mommmu ne dompe bi.

⁴⁷Israel asafo nyinaa nyɛ saa.

⁴⁸Na sɛ obi abɛyɛ wo nkyɛn hɔhoɔ na ɔpɛ sɛ ɔdi twam ma AWURADE a, ma wɔntwa ne mmarima nyinaa twetia, na ɛno ansa na ɔmpinkyɛ mmɛdie, na ɔnyɛ sɛ deɛ wɔwoo no asase no soɔ; na momonoto biara deɛ, ɔnnni bi.

⁴⁹ Mmara koro nna hɔ mma okuromani ne ɔhɔhoɔ a ɔbɛsoɛ mo mu.

⁵⁰Na Israelfoɔ nyinaa yɛɛ sɛdeɛ AWURADE hyɛɛ Mose ne Aaron no; saa ara na wɔyɛeɛ.

⁵¹Na da no ara AWURADE yii Israelfoɔ no firii Misraim asase so, sɛdeɛ wɔn asafo teɛ.