Read Twi Asante Eksodɔs 26 Bible Online

Eksodɔs 26 - Twi Asante bible

Eksodɔs 26

¹ Na tenabea no, yɛ no ntoma du a ɛyɛ asaawa fitaa a wɔafira ne bibire, ne asaawa a ɛbere dum ne koogyan yɛ ntomanwono mu adwini.

²Ntoma no baako tentene nyɛ basafa dunan, na ntoma no baako tɛtrɛtɛ nyɛ basafa mmienu. Ntoma no nyinaa nsusuiɛ nyɛ baako.

³Wɔmfa ntoma no nnum ntoatoa so, baako ntoa baako so; na ntoma nnum nso ntoatoa so, baako ntoa baako so.

⁴Na fa bibire bobɔ ntoma baako mmuano so kantankoraa wɔ ano wɔ ntoaeɛ no so. Saa ara na yɛ wɔ ntoma a ɛdi akyire no mmuano so ntoaeɛ a ɛtɔ so mmienu no soɔ.

⁵Nkantankoraa aduonum na bobɔ wɔ ntoma baako ano, na nkantankoraa aduonum nso na bobɔ wɔ ntoma a ɛwɔ ntoaeɛ a ɛtɔ so mmienu no soɔ no ano; nkantankoraa no nni mmɔanim.

⁶Na yɛ sika nkɔtɔkorɔ aduonum, na fa nkɔtɔkorɔ no yɛ ma ntoma no baako ntoa baako so, na tenabea no nyɛ baako.

⁷Na fa mmirekyie nwi yɛ ntoma, na fa yɛ tenabea no so ntomadan. Yɛ no ntoma dubaako.

⁸Ntoma no baako tentene nyɛ basafa dunum, na ntoma no baako tɛtrɛtɛ nyɛ basafa mmienu; ntoma dubaako no nsusuiɛ nyɛ baako.

⁹Na fa ntoma no mu nnum toatoa so yɛ no baako, na fa nsia nso toatoa so yɛ no baako, na buka ntoma a ɛtɔ so nsia no ma no nkata ntomadan no so wɔ anim.

¹⁰Na bobɔ nkantankoraa aduonum wɔ ntoma baako a ɛdi akyire no mmuano so wɔ ntoaeɛ no so, ne nkantankoraa aduonum nso wɔ ntoaeɛ a ɛtɔ so mmienu no ntoma no mmuano so.

¹¹Na yɛ kɔbere mfrafraeɛ nkɔtɔkorɔ aduonum, na fa nkɔtɔkorɔ no sosɔ nkantankoraa no mu, na ma ntomadan no ntoa nyɛ baako.

¹²Na ntomadan no ntoma nkaeɛ a ɛboro soɔ no, ntoma fa no a aka no, nsensɛne tenabea no akyi.

¹³Na ntomadan no ntoma no tentene no mu anammɔn baako ne fa a ɛboro so wɔ nkyɛn ha ne anammɔn baako ne fa a ɛboro so wɔ nkyɛn ha no nsensɛne tenabea no nkyɛn mu wɔ ha ne ha nkata so.

¹⁴Na fa adwennini nwoma a wɔahyɛ no kɔkɔɔ yɛ ntomadan no nkatasoɔ, na fa sukraman nwoma yɛ ɛno so nkatasoɔ.

¹⁵ Na fa okuo yɛ tenabea no ntaaboɔ a ɛsisi hɔ.

¹⁶Taaboɔ baako tentene nyɛ basafa nnum, na taaboɔ biara tɛtrɛtɛ nyɛ bɛyɛ anammɔn mmienu ne fa.

¹⁷Nan mmienu ntuatua taaboɔ baako ase, na biribi nsosɔ nan baako ne baako mu; saa na yɛ tenabea no ntaaboɔ no nyinaa ho.

¹⁸Sei na yɛ tenabea no ntaaboɔ no: Ntaaboɔ aduonu nni anafoɔ fam nkyerɛ nifa.

¹⁹Na yɛ ntaaboɔ aduonu no ase dwetɛ nnyinasoɔ aduanan, nnyinasoɔ mmienu mmienu nhyehyɛ ntaaboɔ no mmaako mmaako ase mma ne nan mmienu mmienu no.

²⁰Na tenabea no nkyɛn baako a ɛdi atifi fam no, ntaaboɔ aduonu na ɛnni hɔ,

²¹ne ne dwetɛ nnyinasoɔ aduanan, ntaaboɔ no mmaako mmaako ase nnyinasoɔ mmienu mmienu.

²²Na tenabea no akyiri fam a ɛkyerɛ atɔeɛ no, fa ntaaboɔ nsia yɛ hɔ.

²³Na yɛ tenabea no akyiri ntweaso mmienu no so ntaaboɔ mmienu.

²⁴Na ɛmpam ho mfiri fam nkɔ, nanso ɛnyɛ mu nkɔduru ne hini so wɔ deɛ kaa a ɛdi kan no tua hɔ. Saa ara na ne mmienu nyinaa nyɛ, na ɛnni ntweaso mmienu no soɔ.

²⁵Na ɛnyɛ ntaaboɔ nwɔtwe ne ne dwetɛ nnyinasoɔ dunsia, taaboɔ baako ase nnyinasoɔ mmienu, ne taaboɔ baako no ase nnyinasoɔ mmienu.

²⁶ Na fa okuo yɛ mmeamu; enum nyɛ tenabea no nkyɛn baako ntaaboɔ no deɛ,

²⁷na mmeamu nnum no nso nyɛ tenabea no nkyɛn baako no ntaaboɔ no deɛ, na mmeamu nnum nso nyɛ tenabea no akyi wɔ atɔeɛ fam ntaaboɔ no deɛ.

²⁸Na mfimfini mmeamu a ɛfa ntaaboɔ no mfimfini no ntwam mfiri tire nkɔduru tire.

²⁹Na ntaaboɔ no, fa sika duradura ho, na fa sika yɛ ɛho nkaa no ma no nyɛ mmeamu no hyehyɛbea, na fa sika duradura mmeamu no ho nso.

³⁰ Na si tenabea no sɛdeɛ ne nsususoɔ a wɔayi akyerɛ wo bepɔ no soɔ no teɛ no.

³¹ Na fa bibire ne asaawa a ɛbere dum ne koogyan ne asaawa fitaa a wɔafira yɛ ntwamutam. Ntomanwono mu adwini a kerubim wɔ mu na wɔnyɛ no.

³²Na fa sɛne okuo adum nnan a wɔaduradura ho sika ho; ne nkɔtɔkorɔ nyɛ sika, na ɛnsisi dwetɛ nnyinasoɔ nnan so.

³³ Na fa ntwamutam no sɛne nkoamu no ase, na fa Adanseɛ adaka no bɛsi ntwamutam no akyi, na ntwamutam no ntwa kronkronbea ne kronkron mu kronkronbea no mu mma mo.

³⁴ Na fa mpata adwa no si Adanseɛ adaka no so wɔ kronkron mu kronkronbea hɔ.

³⁵ Na fa ɛpono no si ntwamutam no anim, na kaneadua no nni ɛpono no ntentensoɔ wɔ tenabea no nkyɛn mu anafoɔ fam, na fa ɛpono no si nkyɛn mu atifi fam.

³⁶Na fa bibire ne asaawa a ɛbere dum ne koogyan ne asaawa fitaa a wɔafira nwono nkyeremu fa yɛ ntomadan no ano nkataano.

³⁷Na fa okuo adum nnum yɛ nkataano no, na fa sika duradura ho, na ne nkɔtɔkorɔ nyɛ sika, na fa kɔbere mfrafraeɛ nnyinasoɔ nnum gu aseɛ.