Read Twi Asante Eksodɔs 27 Bible Online

Eksodɔs 27 - Twi Asante bible

Eksodɔs 27

¹ Na fa okuo yɛ afɔrebukyia no: Ne tentene basafa mmienu ne fa ne ne tɛtrɛtɛ basafa mmienu ne fa; afɔrebukyia no nyɛ ahinanan, na ne sorokorɔ nso nyɛ basafa baako ne fa.

²Na yɛ ne mmɛn sisi ne ntwea nnan so. Emu ara na ne mmɛn no mfire, na fa kɔbere mfrafraeɛ dura ho.

³Na yɛ ɛho nsenawa a wɔde ne nso bɛgu mu ne ne sofi ne ne nkoraa ne ne wɔeɛ ne ne nsramma kukuwa, ɛho nnoɔma nyinaa, kɔbere mfrafraeɛ na fa yɛ.

⁴Na fa kɔbere mfrafraeɛ nwono ntentan wɔ ho, sɛdeɛ wɔnwono atena, na yɛ atena no so kɔbere mfrafraeɛ nkaa nnan wɔ ne ntwea nnan no so.

⁵Na fa si afɔrebukyia no bamma ho wɔ aseɛ, na atena no nnuru afɔrebukyia no mfimfini.

⁶Na sensene afɔrebukyia no ho mpoma, okuo mpoma, na fa kɔbere mfrafraeɛ duradura ho.

⁷Na wɔmfa mpoma no nwurawura nkaa no mu, na mpoma no nhyehyɛ afɔrebukyia no nkyɛn nkyɛn, na wɔde asoa.

⁸ Fa ntaaboɔ yɛ, na emu nna kwan. Sɛdeɛ wɔakyerɛ wo bepɔ no soɔ no, saa ara na wɔnyɛ no.

⁹ Na yɛ tenabea no adihɔ: Na adihɔ ntwamutam a wɔde asaawa fitaa a wɔafira anwono a ne tentene yɛ basafa aduonum nni hɔ wɔ fa baako wɔ anafoɔ fam a ɛkyerɛ nifa,

¹⁰ne n’adum aduonu ne ne nnyinasoɔ aduonu a wɔde kɔbere mfrafraeɛ ayɛ; na adum no mprɛngo ne ne mmeamu nyɛ dwetɛ.

¹¹Saa ara nso na atifi fam tentene mu no, ntwamutam a ne tentene basafa aduonum ne n’adum aduonu ne ne kɔbere mfrafraeɛ nnyinasoɔ aduonu nnie; na adum no mprɛngo ne mmeamu no nyɛ dwetɛ.

¹²Na adihɔ no tɛtrɛtɛ a ɛkyerɛ atɔeɛ fam no, ntwamutam basafa aduonu nnum nni hɔ; n’adum du ne ne nnyinasoɔ du.

¹³Na adihɔ no tɛtrɛtɛ a ɛdi anim fam a ɛkyerɛ apueeɛ nyɛ basafa aduonu nnum.

¹⁴Nkyɛn ha ntwamutam no nyɛ basafa nson ne fa n’adum mmiɛnsa ne ne nnyinasoɔ mmiɛnsa.

¹⁵Na nkyɛn ha nso ntwamutam no nyɛ basafa nson ne fa, n’adum mmiɛnsa ne ne nnyinasoɔ mmiɛnsa.

¹⁶Na adihɔ no ano pono no nkataano nyɛ basafa du; wɔmfa bibire ne asaawa a ɛbere dum ne koogyan ne asaawa fitaa a wɔafira a ɛyɛ nkyeremu; na n’adum nnan ne ne nnyinasoɔ nnan.

¹⁷Adum no a ɛtwa adihɔ no ho hyia nyinaa mmeabeaeɛ a ɛbeabea ho nyɛ dwetɛ, na ne nkɔtɔkorɔ nso nyɛ dwetɛ, na ne nnyinasoɔ ayɛ kɔbere mfrafraeɛ.

¹⁸Adihɔ no tentene nyɛ basafa aduonum, na ne tɛtrɛtɛ nso nyɛ basafa aduonu nnum, na ne korɔn nso basafa mmienu ne fa; ntwamutam no nyɛ nwera a wɔafira n’asaawa, na ne nnyinasoɔ nyɛ kɔbere mfrafraeɛ.

¹⁹Tenabea no ho som nyinaa mu adwinneɛ, ne ne mpɛɛwa nyinaa ne adihɔ no ho mpɛɛwa nyinaa nyɛ kɔbere mfrafraeɛ.

²⁰ Na wo nso, hyɛ Israelfoɔ no na wɔmmrɛ wo ngodua aba a wɔasie anya mu ngo korɔgyenn, na wɔmfa nsɔ kanea no, na nkanea no nsisi so daa.

²¹Na Aaron ne ne mma nhwɛ so, ahyiaeɛ ntomadan no mu, ntwamutam a ɛkata Adanseɛ no anim no akyi, mfiri anwummerɛ nkɔsi anɔpa, AWURADE anim. Ɛnyɛ daa ahyɛdeɛ a Israelfoɔ nni so wɔ wɔn awoɔ ntoatoasoɔ nyinaa mu.