Read Twi Asante Eksodɔs 30 Bible Online

Eksodɔs 30 - Twi Asante bible

Eksodɔs 30

¹ Na yɛ aduhwamhyeɛ bukyia, okuo na fa yɛ.

²Ne tentene nyɛ anammɔn baako ne fa, na ne tɛtrɛtɛ nso nyɛ anammɔn baako ne fa, na ɛnyɛ ahinanan, na ne sorokɔ nyɛ basafa baako, na ne mmɛn nso ntuatua mu ara.

³Na fa sika amapa dura ɛso ne ɛho ne ne mmɛn no ho hyia; na yɛ sika hankra twa ho hyia.

⁴Na yɛ ɛho sika nkaa mmienu wɔ ne hankra no ase, wɔ n’afanu, na wɔmfa mpoma nwurawura mu, na wɔde asoa.

⁵Na fa okuo sene mpoma no, na duradura ho sika.

⁶ Na fa si ntwamutam a ɛwɔ Adanseɛ adaka no ho no anim wɔ mpata adwa a ɛsi Adanseɛ no soɔ no anim, deɛ me ne wo bɛhyia hɔ no.

⁷ Aaron nhye so aduhwam daa anɔpa; ɔsiesie nkanea no a, ɔnhye aduhwam no.

⁸Na sɛ Aaron de nkanea no sisi so anwummerɛ a, ɔnhye aduhwam no: Ɛyɛ daa aduhwam a wɔnhye no AWURADE anim, mo awoɔ ntoatoasoɔ nyinaa mu.

⁹ Monnhye so aduhwam foforɔ biara, ɔhyeɛ afɔdeɛ anaa aduane afɔdeɛ; na monnhwie ahwiesa nso nngu so.

¹⁰ Na daa afirinhyia mu prɛko na Aaron mfa bɔne ho mpata afɔdeɛ mogya no bi mpata wɔ ne mmɛn no soɔ; daa afe ɔmpata wɔ so prɛko, mo awoɔ ntoatoasoɔ nyinaa mu. Ɛyɛ akronkronneɛ mu ade kronkron ma AWURADE.

¹¹Na AWURADE ka kyerɛɛ Mose sɛ:

¹²Sɛ wobu Israelfoɔ ano hwehwɛ wɔn dodoɔ a, wɔn kan yi mu no, wɔn nyinaa mfa wɔn kra mpata adeɛ mma AWURADE, na, sɛ wɔkan wɔn a, owuyadeɛ bi amma wɔn mu.

¹³Deɛ wɔmma nie: Obiara a wɔkan no fra dodoɔ a wɔkan wɔn no mu no mma dwetɛbena fa, sɛ kronkronbea dwetɛbena no teɛ, (dwetɛbena baako yɛ gera aduonu), dwetɛbena fa sɛ AWURADE mmasoɔ afɔrebɔdeɛ.

¹⁴Obiara a wadi mfeɛ aduonu ne akyire a wɔkan no fra dodoɔ a wɔkan wɔn no mu no mfa mmasoɔ afɔrebɔdeɛ yi mma AWURADE.

¹⁵Sɛ wɔde mmasoɔ afɔrebɔdeɛ no rema AWURADE de apata ama mo kra a, ɔdefoɔ nnto so, na ohiani nso nnte dwetɛbena fa no so.

¹⁶Na gyegye mpata sika no Israelfoɔ no nsam, na fa ma ahyiaeɛ ntomadan no mu som no, na ɛnyɛ Israelfoɔ no nkaeɛ, AWURADE anim, na wɔmfa mpata mma mo kra.

¹⁷Na AWURADE ka kyerɛɛ Mose sɛ:

¹⁸ Fa yaawa yɛ kuduo nso a n’ase nso yɛ yaawa, na wɔadware mu, na fa si ahyiaeɛ ntomadan no ne afɔrebukyia no ntam, na gu mu nsuo.

¹⁹Na Aaron ne ne mma mfa nhohoro wɔn nsa ne wɔn nan ho.

²⁰Sɛ wɔrekɔhyɛne ahyiaeɛ ntomadan no mu a, wɔmfa nsuo nhohoro wɔn ho, na wɔanwuwu; anaasɛ wɔrebɛbɛn afɔrebukyia no abɛsom abɛbɔ ogya afɔdeɛ ama AWURADE a,

²¹wɔnhohoro wɔn nsa ne wɔn nan ho, na wɔanwuwu; na ɛnyɛ daa atorɔmudeɛ mma wɔn, ɔno ne n’asefoɔ, wɔn awoɔ ntoatoasoɔ nyinaa mu.

²²Na AWURADE ka kyerɛɛ Mose sɛ:

²³Wo nso fa nnuhwam mu atitire, kurobo a anene nnwetɛbena ahanum ne dupapo hwanhwam saa fa, ahanu aduonum ne mmetire hwanhwam ahanu aduonum

²⁴ne bɛwewonua hwanhwam ahanum, kronkronbea dwetɛbena so, ne ngodua ngo susutoa baako,

²⁵ na fa yɛ sra ngo kronkron, adufra a wɔafra no adufrafoɔ nyansa mu, na ɛnyɛ sra ngo kronkron.

²⁶Na fa sra ahyiaeɛ ntomadan no ne Adanseɛ adaka no,

²⁷ne ɛpono no ne ɛho nnoɔma no nyinaa ne kaneadua no ne ɛho nnoɔma no ne aduhwamhyeɛ bukyia no,

²⁸ne ɔhyeɛ afɔrebukyia no ne ɛho nnoɔma nyinaa ne kuduo no ne ne ntaaseɛ no ho;

²⁹ na dwira ho ma no nyɛ akronkronneɛ mu ade kronkron; obiara a ɔka no nyɛ kronkron.

³⁰ Na sra Aaron ne ne mma no ngo yɛ wɔn kronkron, na wɔnni me asɔfoɔ.

³¹Na ka kyerɛ Israelfoɔ sɛ: Yei nyɛ sra ngo kronkron mma me, mo awoɔ ntoatoasoɔ nyinaa mu;

³²wɔnnhwie nngu onipa honam so; na monnsusu so nnyɛ bi a ɛte sɛ ɛno; ɛyɛ kronkron, enti ɛnyɛ kronkron mma mo.

³³Obiara a ɔbɛfra bie a ɛte sɛ ɛno anaasɛ ɔde bi bɛka ɔhɔhoɔ no, wɔbɛtwa no afiri ne man mu atwene.

³⁴Na AWURADE ka kyerɛɛ Mose sɛ: Fa nnuhwam, aneneduro ne nworahwam ne prɛkɛsɛ hwanhwam ne ohwamfufuo korɔgyenn, (wɔnsusu ne nyinaa pɛ),

³⁵ na fa yɛ aduhwam a wɔhyeɛ, adufrafoɔ nyansa so adufra a wɔaposa a ɛyɛ korɔgyenn ne kronkron.

³⁶ Na si bi fekɔfekɔ, na fa bi si Adanseɛ no anim ahyiaeɛ ntomadan no mu, deɛ me ne wo bɛhyia no: Ɛnyɛ mo akronkronneɛ mu ade kronkron.

³⁷Na aduhwam a worebɛyɛ yi, monnsusu so nnyɛ bi mmfa nyɛ wo kronkron mma AWURADE.

³⁸Obiara a ɔbɛyɛ bie a ɛte sɛ ɛno ahua ahwɛ no, wɔbɛtwa no afiri ne man mu atwene.