Read Twi Asante Eksodɔs 33 Bible Online

Eksodɔs 33 - Twi Asante bible

Eksodɔs 33

¹ Na AWURADE ka kyerɛɛ Mose sɛ: Sim firi ha kɔ, wo ne ɔman a wokɔyii wɔn firi Misraim baeɛ no, kɔ asase a mekaa ɛho ntam mekyerɛɛ Abraham, Isak ne Yakob sɛ: W’asefoɔ na mede bɛma wɔn no so.

² Na mɛsoma ɔbɔfoɔ adi w’anim, na matu Kanaanfoɔ, Amorifoɔ, Hetifoɔ, Perisifoɔ, Hewifoɔ ne Yebusifoɔ no.

³ Kɔ asase a nufosuo ne ɛwoɔ sene soɔ no so; na me deɛ merenni wo mu nkɔ, ɛfiri sɛ woyɛ ɔman a wo kɔn asene, na mammene wo ɔkwan no mu.

⁴Na ɔman no tee asɛmmɔne yi no, wɔdii abooboo, na obiara anhyɛ n’ahokekadeɛ.

⁵Na AWURADE ka kyerɛɛ Mose sɛ: Kɔka kyerɛ Israelfoɔ no sɛ: Moyɛ ɔman a mo kɔn asene; sɛ medi mo mu kakraa bi ne mo kɔ a, anka mɛhye mo. Na afei monyi mo ho ahokekadeɛ, na menhunu deɛ mɛyɛ mo.

⁶ Ɛnna Israelfoɔ no yiyii wɔn ho ahokekadeɛ firi bepɔ Horeb ho hɔ ara.

⁷ Na Mose taa fa ntomadan no de kɔsi nsraban no akyi akyirikyiri, na ɔfrɛɛ no ahyiaeɛ ntomadan. Na obiara a ɔhwehwɛ AWURADE no firi adi kɔ ahyiaeɛ ntomadan no a ɛwɔ nsraban no akyiri no ho.

⁸Na sɛ Mose firi kɔ ntomadan no ho a, ɔman no nyinaa sɔresɔre kɔgyinagyina wɔn ntomadan ano, na wɔde Mose akyiri hwɛ ara kɔsi sɛ ɔhyɛne ntomadan no mu.

⁹ Na sɛ Mose hyɛne ntomadan no mu a, mununkum dum no siane bɛgyina ntomadan no ano, na AWURADE ne Mose kasa.

¹⁰Na ɔman no nyinaa hunu mununkum dum no sɛ ɛgyina ntomadan no ano a, ɔman no nyinaa sɔresɔre, na obiara koto sɔre wɔ ne ntomadan ano.

¹¹ Na AWURADE ne Mose di nhwɛanim kasa sɛ onipa ne ne yɔnko kasa. Na ɔsane ba nsraban no mu a, ne somfoɔ Nun ba Yosua a ɔyɛ aberanteɛ no deɛ, ɔmfiri ntomadan no mu.

¹² Na Mose ka kyerɛɛ AWURADE sɛ: Hwɛ, wo ara na woaka akyerɛ me sɛ: Fa ɔman yi kɔ, nanso womma menhunu deɛ wobɛsoma no na ɔne me akorɔ. Nanso wo ara na woaka sɛ: Mede wo din menim wo, na woanya m’anim animuonyam nso.

¹³ Enti mesrɛ wo, sɛ manya w’anim adom a, ma menhunu wo kwan ɛ, na mahu wo, na hunu sɛ nkurɔfoɔ yi yɛ wo man a!

¹⁴Na AWURADE kaa sɛ: Me ara ankasa mɛdi wo anim ne wo akɔ, na mama woakɔhome.

¹⁵Na ɔka kyerɛɛ no sɛ: Sɛ wo ankasa ne yɛn ankɔ deɛ a, ɛnneɛ mfa yɛn mfiri ha nkɔ.

¹⁶ Na ɛdeɛn na wɔde bɛhunu wɔ ha sɛ me ne wo man yi anya w’anim adom, ɛnyɛ wo korɔ a wo ne yɛn bɛkorɔ no? Na me ne wo man yi ada nso wɔ aman a wɔwɔ asase ani nyinaa mu.

¹⁷ Na AWURADE ka kyerɛɛ Mose sɛ: Asɛm a woaka yi nso, mɛyɛ, ɛfiri sɛ woanya m’anim adom, na mede wo din menim wo.

¹⁸Na Mose kaa sɛ: Ɛnneɛ, ma menhunu w’animuonyam.

¹⁹ Na ɔse: Mɛma me papa nyinaa asene w’anim, na mɛpae me din YHWH (AWURADE) wɔ w’anim; na medom deɛ medom no, na mehunu deɛ mehu no mmɔbɔ no mmɔbɔ.

²⁰ Na ɔse: Wontumi nhunu m’anim, ɛfiri sɛ onipa renhunu m’anim nnya nkwa.

²¹ Na AWURADE se: Hwɛ, ɔkwan wɔ me nkyɛn ha, na gyina ɔbotan no so;

²² na sɛ m’animuonyam resene a, mede wo bɛhyɛ ɔboɔ tokuro mu, na mede me nsa makata wo so masene ansa,

²³na mayi me nsa, na woahunu m’akyi fam; na m’anim deɛ, worenhunu.