Read Twi Asante Eksodɔs 35 Bible Online

Eksodɔs 35 - Twi Asante bible

Eksodɔs 35

¹Na Mose hyiaa Israelfoɔ asafo no nyinaa, na ɔka kyerɛɛ wɔn sɛ. Nsɛm a AWURADE ahyɛ sɛ monni soɔ nie:

² Nnansia na wɔmfa nyɛ adwuma, na ɛda a ɛtɔ so nson no nyɛ mo homeda kronkron a mode home ma AWURADE; obiara a ɔbɛyɛ mu adwuma no, wɔbɛku no.

³Monnsɔ gya mo tenaberɛ nyinaa homeda.

⁴Na Mose ka kyerɛɛ Israelfoɔ asafo no nyinaa sɛ: Asɛm a AWURADE ahyɛ nie:

⁵ Monyi mmasoɔ afɔrebɔdeɛ wɔ mo mu mmrɛ AWURADE; obiara a n’akoma pɛ no mfa mmasoɔ afɔrebɔdeɛ mmrɛ AWURADE: Sika, dwetɛ ne kɔbere mfrafraeɛ,

⁶ne bibire, asaawa a ɛbere dum, koogyan, ne asaawa fitaa ne mmirekyie nwi.

⁷Deɛ ɛka ho ne adwennini nwoma a wɔahyɛ no kɔkɔɔ, sukraman nwoma, okuo nnua,

⁸kanea no ho ngo, nnuhwam a wɔde bɛyɛ sra ngo, ɔhyeɛ aduhwam,

⁹apopobibire aboɔ, nsisimu aboɔ a wɔde bɛyɛ asɔfotadeɛ ne adaaboɔ no.

¹⁰Na mo mu akoma mu anyansafoɔ nyinaa mmra mmɛyɛ adeɛ a AWURADE ahyɛ nyinaa,

¹¹ tenabea no, ntomadan ne ne nkatasoɔ, nkɔtɔkorɔ ne ne ntaaboɔ a ɛsisi ho, ne mmeamu, n’adum ne ne nnyinasoɔ;

¹²adaka no ne ne mpoma, mpata adwa no ne ntwamutam a ɛtwa mu no,

¹³ɛpono no ne ne mpoma ne ɛho nnoɔma nyinaa ne kyerɛ paanoo no.

¹⁴Bio, kaneadua no ne ɛho nnoɔma ne ne nkanea ne ɛho ngo,

¹⁵ne aduhwamhyeɛ bukyia no ne ne mpoma ne sra ngo no ne hyeɛ aduhwam no ne tenabea no ano nkataano no;

¹⁶ɔhyeɛ afɔrebukyia no ne ne kɔbere mfrafraeɛ ntentan no, ne mpoma ne ɛho nnoɔma nyinaa, kuduo no ne ne ntaaseɛ.

¹⁷Deɛ ɛka ho ne adihɔ no ho ntwamutam no, n’adum ne ne nnyinasoɔ ne adihɔ no aboboano nkataano no,

¹⁸tenabea no ho mpɛɛwa ne ɛho ntampehoma;

¹⁹ɔsom ntadeɛ a wɔde som kronkronbea hɔ, Ɔsɔfoɔ Aaron ntadeɛ kronkron no ne ne mma ntadeɛ a wɔde bɛdi asɔfoɔ no.

²⁰Na Israelfoɔ asafo no nyinaa firii Mose anim kɔe.

²¹ Na wɔbae, obiara a n’akoma kanyan no ne obiara a ne honhom kaa no, na wɔde AWURADE mmasoɔ afɔrebɔdeɛ baa sɛ wɔmfa nyɛ ahyiaeɛ ntomadan no ne ɛho som nnoɔma nyinaa ne ntadeɛ kronkron no.

²²Na mmarima ne mmaa nyinaa, dodoɔ a wɔn akoma pɛ nyinaa bae, na wɔde nkapo ne nsomuadeɛ ne mpɛtea ne krakyere ne sika nnwinneɛ ahodoɔ nyinaa bae, na obiara a ɔpɛ sɛ ɔde sika ohim afɔdeɛ brɛ AWURADE,

²³ne obiara a ne nsam wɔ bibire ne asaawa a ɛbere dum ne koogyan ne asaawa fitaa ne mmirekyie nwi ne adwennini nwoma kɔkɔɔ ne sukraman nwoma no de bae;

²⁴obiara a ɔkura dwetɛ ne kɔbere mfrafraeɛ mmasoɔ afɔrebɔdeɛ ma AWURADE de bae, na obiara a ne nsam wɔ okuo nnua a wɔde bɛyɛ ɔsom nnoɔma no biara nso de bae.

²⁵Na mmaa a wɔwɔ nyansa akoma nyinaa de wɔn nsa too asaawa, na wɔde deɛ wɔtoeɛ no bae, bibire ne asaawa a ɛbere dum ne koogyan ne asaawa fitaa;

²⁶na mmaa a wɔn akoma pɛ de wɔn nyansa mu nyinaa too mmirekyie nwi asaawa.

²⁷Na mpanimfoɔ no de apopobibire aboɔ ne nsisimu aboɔ a wɔde bɛyɛ asɔfotadeɛ ne adaaboɔ no bae.

²⁸Wɔde nnuhwam ne ngo a wɔde bɛyɛ nkanea ngo ne sra ngo ne ɔhyeɛ aduhwam no nso bae.

²⁹Na Israelfoɔ mu mmarima ne mmaa nyinaa a wɔn akoma pɛ wɔn sɛ wɔmfa nnwuma a AWURADE nam Mose so hyɛɛ sɛ wɔnyɛ no ho biribi mmra no de ayamyi ayɛyɛdeɛ brɛɛ AWURADE.

³⁰ Na Mose ka kyerɛɛ Israelfoɔ no sɛ: Monhwɛ, AWURADE afrɛ Hur ba Uri ba Besalel a ɔfiri Yuda abusuakuo mu,

³¹na ɔde Nyankopɔn honhom ahyɛ no ma, nyansa, nhunumu, nimdeɛ ne adwinnie nyinaa mu,

³²sɛ ɔnni adwini ahodoɔ; sika, dwetɛ ne kɔbere mfrafraeɛ,

³³ne nsisimu aboɔ mu nkurukyireeɛ, nnuasene ne adwini ahodoɔ,

³⁴na ɔde ahyɛ n’akomam sɛ ɔnkyerɛ ebinom nso. Ɔno ne Ahisamak ba Oholiab a ɔfiri Dan abusuakuo mu no.

³⁵Wɔn na ɔde akoma mu nyansa ahyɛ wɔn ma sɛ wɔnni adwini ahodoɔ nyinaa, sikadwumfoɔ, duadwumfoɔ, ɔnwomfoɔ a ɔdi bibire ne asaawa a ɛbere dum ne koogyan ne asaawa fitaa mu adwini ne ntomanwomfoɔ deɛ; wɔn a wɔdi adwini biara, ne wɔn a wɔbɔ wɔn tirim di adwini ahodoɔ.