Read Twi Asante Eksodɔs 37 Bible Online

Eksodɔs 37 - Twi Asante bible

Eksodɔs 37

¹ Na Besalel de okuo yɛɛ adaka no, ne tentene bɛyɛ basafa baako ne fa, na ne tɛtrɛtɛ bɛyɛ anammɔn mmienu ne fa, na ne sorokɔ bɛyɛ anammɔn mmienu ne fa.

²Na ɔde sika amapa duraa emu ne ɛho, na ɔyɛɛ sika hankra twaa ho hyiae.

³Na ɔguu ɛho sika nkaa nnan de tuatuaa ne nan nnan no ho, nkaa mmienu wɔ ɔfa ha, na nkaa mmienu wɔ ɔfa ha.

⁴Na ɔde okuo senee mpoma, na ɔde sika duraduraa ho.

⁵Na ɔde mpoma no wurawuraa nkaa no mu, adaka no nkyɛn mu, na wɔde asoa adaka no.

⁶Na ɔde sika amapa yɛɛ mpata adwa no, ne tentene bɛyɛ basafa baako ne fa, na ne tɛtrɛtɛ bɛyɛ anammɔn mmienu ne fa.

⁷Na ɔde sika a wɔaborɔ yɛɛ sika kerubim mmienu maa no firi mpata adwa no tiri mmienu no mu.

⁸Ɔyɛɛ kerub baako wɔ etire ha, na ɔyɛɛ kerub baako nso wɔ etire ha; mpata adwa no mu na ɔmaa kerubim no firii ne tiri mmienu no soɔ.

⁹Na kerubim no trɛtrɛɛ wɔn ntaban mu ɔsoro de wɔn ntaban no kataa mpata adwa no so, na wɔn ani kyerɛkyerɛ wɔn ho; na wɔn anim kyerɛkyerɛ mpata adwa no so.

¹⁰ Na ɔde okuo yɛɛ ɛpono no, ne tentene basafa baako, ne tɛtrɛtɛ bɛyɛ anammɔn baako ne fa, na ne sorokɔ bɛyɛ anammɔn mmienu ne fa.

¹¹Na ɔde sika amapa duraa ho, na ɔyɛɛ ɛho sika hankra hyiae.

¹²Na ɔyɛɛ ɛho mfemfamho a ne tɛtrɛtɛ te sɛ nsam hyiae, na ɔyɛɛ mfemfamho no ho sika hankra hyiae.

¹³Na ɔguu ɛho sika nkaa nnan, na ɔde nkaa no sisii ntwea nnan a ɛwɔ ne nan nnan ho no so.

¹⁴Mfemfamho no ase pa ara na nkaa a ɛyɛ mpoma a wɔde bɛsoa ɛpono no wurabea no wɔ.

¹⁵Na ɔde okuo senee mpoma no, na ɔde sika duraduraa ho, na wɔde asoa ɛpono no.

¹⁶Na ɔde sika amapa yɛɛ ɛpono no so nnoɔma, ne nyowa ne ne nyowaa ne ne nkuruwa ne ne nkoraa a wɔde bɛhwie.

¹⁷ Na ɔde sika amapa a wɔaboro na wɔde yɛɛ kaneadua no, ne nan ne ne dua; ɛho kuruwa, ne kukuduuduu ne ne nhwiren firi ɛno ara mu.

¹⁸Na nsa nsia tuatua ho, kaneadua no nsa mmiɛnsa tuatua ɔfa ha, na kaneadua no nsa mmiɛnsa tuatua ɔfa ha.

¹⁹Nkuruwa mmiɛnsa a ɛte sɛ sorɔno deɛ wɔ nsa baako ho, ne kukuduuduu ne ne nhwiren, na nkuruwa mmiɛnsa a ɛte sɛ sorɔno deɛ wɔ nsa baako ho, ne kukuduuduu ne ne nhwiren: Saa ara na ɛteɛ wɔ nsa nsia a ɛtuatua kaneadua no ho no ho.

²⁰Na kaneadua no ho nkuruwa a ɛte sɛ sorɔno deɛ no yɛ nnan, ne kukuduuduu ne ne nhwiren;

²¹na kukuduuduu no wowɔ nsa mmienu mmienu a ɛtuatua ho no ase, nsa nsia a ɛtuatua ho no ase.

²²Ne kukuduuduu ne ne nsa no tua ho ara, ne nyinaa yɛ sika amapa a wɔaborɔ bafua.

²³Na ɔde sika amapa yɛɛ ɛso nkanea nson no ne ɛho adaban ne ɛho nso nkukuwa.

²⁴Sika amapa dwetikɛseɛ baako na ɔde yɛeɛ ɛne ɛho nnoɔma no nyinaa.

²⁵ Na ɔde okuo yɛɛ aduhwamhyeɛ no afɔrebukyia, ne tentene yɛ anammɔn baako ne fa, na ne tɛtrɛtɛ nso bɛyɛ anammɔn baako ne fa, ɛyɛ ahinanan, ne sorokɔ yɛ basafa baako; ne mmɛn nso tuatua ho ara.

²⁶Na ɔde sika amapa duraa ho, ɛso ne ɛho hyiae, ne ne mmɛn no; na ɔyɛɛ ɛho sika hankra hyiae.

²⁷Na ɔyɛɛ ɛho sika nkaa mmienu, wɔ ne hankra no ase, ne nkyɛn mu mmienu no so, sɛ ɛnyɛ mpoma no wurabea na wɔde asoa.

²⁸Na ɔde okuo senee mpoma, na ɔde sika duraduraa ho.

²⁹ Na ɔyɛɛ sra ngo kronkron ne ɛhyeɛ aduhwam korɔgyenn no, sɛdeɛ odufrafoɔ fra no.