Read Twi Asante Eksodɔs 5 Bible Online

Eksodɔs 5 - Twi Asante bible

Eksodɔs 5

¹ Na yei akyi no, Mose ne Aaron kɔɔ Farao nkyɛn kɔka kyerɛɛ no sɛ: Sɛ AWURADE, Israel Nyankopɔn, seɛ nie: Ma me man nkɔ na wɔnkɔhyɛ fa mma me wɔ ɛserɛ so.

² Na Farao se: Hwan ne AWURADE a mɛtie ne nne na mama Israel akorɔ? Mennim AWURADE no, na Israel nso, meremma wɔnkɔ.

³Na wɔse: Hebrifoɔ Nyankopɔn abɛhyia yɛn; enti ma yɛnkɔ ɛserɛ so nnansa kwan, na yɛnkɔbɔ AWURADE, yɛn Nyankopɔn afɔdeɛ, na wamfa owuyadeɛ anaa nkrantɛ ammɛtua yɛn.

⁴Na Misraimhene ka kyerɛɛ wɔn sɛ: Adɛn nti na mo, Mose ne Aaron, moyi ɔman no firi wɔn nnwuma ho? Monkɔ mo adwumaden no so.

⁵ Na Farao kaa sɛ: Monhwɛ, afei a nnipa no adɔɔso wɔ asase no so, na morepɔn wɔn afiri wɔn adwumayɛ mu yi!

⁶Na da no ara Farao hyɛɛ ɔman no adwumayɛ so ahwɛfoɔ ne wɔn aboafoɔ no sɛ:

⁷Mommma ɔman no ɛserɛ a wɔde bɛyɛ ntaayaa no bio sɛ akane no; wɔn ara wɔnkɔboaboa ɛserɛ ano mfa.

⁸Na ntaayaa dodoɔ a na wɔyɛ daa no, monnye wɔn, monnyi so bi, ɛfiri sɛ wɔyɛ anihafoɔ, enti na wɔsu sɛ: Ma yɛnkɔ nkɔbɔ yɛn Nyankopɔn afɔdeɛ no.

⁹Momma wɔn adwuma a emu yɛ den na wɔnyɛ, na wɔantie nsenhunu.

¹⁰Na ɔman no adwumayɛ so ahwɛfoɔ ne wɔn aboafoɔ no firii adi bɛka kyerɛɛ ɔman no sɛ: Sɛ Farao seɛ nie: Meremma mo ɛserɛ bio.

¹¹Mo ara monkɔ nkɔpɛ ɛserɛ wɔ deɛ mobɛnya bie; na mo adwuma no nso wɔrente so hwee.

¹²Ɛnna ɔman no bɔ petee Misraim asase nyinaa so kɔboaboaa ayuo ntwakaeɛ ano de yɛɛ ɛserɛ mehemehe no.

¹³Na akafoɔ no piapiaa wɔn kaa sɛ: Monwie mo da koro adwuma wɔ ne berɛ mu, sɛ berɛ a na ɛserɛ wɔ hɔ no.

¹⁴Na wɔhwee Israelfoɔ ahwɛfoɔ a Farao adwumayɛ so ahwɛfoɔ de asisi wɔn soɔ no kaa sɛ: Ɛdeɛn nti na moanwie ntaayaa a wɔahyɛ mo nnɛ ne nnora no nyinaa sɛ akane no?

¹⁵Ɛnna Israelfoɔ ahwɛfoɔ no ba bɛsu kyerɛɛ Farao sɛ: Ɛdeɛn nti na wo ne wo nkoa redi no saa?

¹⁶ Wɔmmaa wo nkoa ɛserɛ biara, nso wɔse yɛnyɛ ntaayaa; na hwɛ, wɔahwe wo nkoa, nso ɛyɛ wo ara wo nkurɔfoɔ no mfomsoɔ.

¹⁷Na Farao buaa sɛ: Anihafoɔ, anihafoɔ na moyɛ. Enti na mose: Ma yɛnkɔ nkɔbɔ AWURADE afɔdeɛ.

¹⁸Enti monkɔ nkɔyɛ adwuma, na ɛserɛ deɛ, wɔremma mo, nso ntaayaa no dodoɔ deɛ, mobɛma ara.

¹⁹Na wɔkaa sɛ: Monnyi mo da koro adwuma mu ntaayaa no so ara da, na Israelfoɔ adwumayɛ so ahwɛfoɔ no hunuu sɛ amaneɛ na ato wɔn.

²⁰Na wɔfiri Farao nkyɛn reba no, wɔbɛtoo Mose ne Aaron a wɔgyina hɔ rebɛhyia wɔn,

²¹ na wɔka kyerɛɛ wɔn sɛ: AWURADE nhwɛ mo mmu atɛn, sɛ moama yɛn ho abɔn wɔ Farao ne ne nkoa anim, na mode nkrantɛ ahyɛ wɔn nsa sɛ wɔmfa nku yɛn.

²²Na Mose sane baa AWURADE nkyɛn bɛkaa sɛ: AWURADE, adɛn na woayɛ ɔman yi bɔne sei? Adɛn na wosomaa me yi?

²³Na ɛfiri berɛ a mebaa Farao nkyɛn na mede wo din ne no kasaeɛ no, Farao ayɛ ɔman yi bɔne, na wo nso wonnyee wo man!