Read Twi Asante Eksodɔs 6 Bible Online

Eksodɔs 6 - Twi Asante bible

Eksodɔs 6

¹ Na AWURADE ka kyerɛɛ Mose sɛ: Afei ansa na worebɛhunu deɛ mɛyɛ Farao, ɛfiri sɛ mede nsa a ɛyɛ den bɛma wama wɔakɔ, na mede nsa a ɛyɛ den bɛma wapamo wɔn afiri n’asase so mpo.

²Na Onyankopɔn ne Mose kasae, na ɔka kyerɛɛ no sɛ: Mene AWURADE,

³ a meyii me ho mekyerɛɛ Abraham ne Isak ne Yakob sɛ Onyankopɔn Tweaduampɔn, na me din YHWH (AWURADE) no deɛ, mamma wɔamfa anhu me.

⁴ Nanso mama m’apam a me ne wɔn pameeɛ no agyina, sɛ mede Kanaan asase a ɛyɛ wɔn ahɔhobea asase a wɔyɛɛ so ahɔhoɔ no bɛma wɔn.

⁵Nanso mate Israelfoɔ a Misraimfoɔ di wɔn nya no apinisie, na makae m’apam no.

⁶Ɛno nti ka kyerɛ Israelfoɔ sɛ: Mene AWURADE, na mɛgye mo afiri Misraim nkoasom mu, na mayi mo afiri wɔn nyadie no mu, na mede basa a atene ne atemmuo akɛseɛ magye mo.

⁷Na mɛfa mo mayɛ me man, na mayɛ Onyankopɔn ama mo, na moahunu sɛ mene AWURADE mo Nyankopɔn a ɔgyee mo firii Misraim nkoasom mu.

⁸ Na mede mo bɛkɔ asase a mekaa ntam sɛ mede bɛma Abraham, Isak, Yakob no so, na mede bɛma mo sɛ agyapadeɛ. Mene AWURADE.

⁹Na Mose kaa saa kyerɛɛ Israelfoɔ no; nanso ahometeɛ ne nkoasom denden no nti wɔantie no.

¹⁰Na AWURADE ka kyerɛɛ Mose sɛ:

¹¹Kɔ, kɔka kyerɛ Misraimhene Farao sɛ ɔmma Israelfoɔ mfiri n’asase so nkɔ.

¹² Na Mose kasae wɔ AWURADE anim sɛ: Hwɛ, Israelfoɔ ntie me, na ɛbɛyɛ dɛn na Farao bɛtie me a meyɛ ano mu momonoto yi.

¹³Na AWURADE ne Mose ne Aaron kasae, na ɔhyɛɛ wɔn sɛ wɔnkɔ Israelfoɔ ne Misraimhene Farao nkyɛn nkɔyi Israelfoɔ no mfiri Misraim asase so.

¹⁴ Yeinom ne wɔn nananom afie mu atitire: Israel abakan Ruben mma ne: Hanok, Palu, Hesron ne Karmi; yeinom ne Ruben mmusua.

¹⁵Na Simeon mma ne: Yemuel, Yamin, Ohad, Yakin, Sohar ne Saulo a ɔyɛ Kanaanni baa bi ba; yeinom ne Simeon mmusua.

¹⁶ Na yeinom ne Lewi mma din wɔn awoɔ ntoatoasoɔ mu: Gerson, Kohat ne Merari. Na Lewi mfeɛ a ɔdiiɛ yɛ mfeɛ ɔha aduasa nson.

¹⁷Na Gerson mma ne: Libni ne Simei wɔ wɔn mmusua ahodoɔ mu.

¹⁸Na Kohat mma ne: Amram ne Ishar, Hebron ne Usiel. Na Kohat mfeɛ a ɔdiiɛ yɛ mfeɛ ɔha aduasa mmiɛnsa.

¹⁹Na Merari mma ne: Mahli ne Musi. Yeinom ne Lewi mmusua, sɛdeɛ wɔn awoɔ ntoatoasoɔ teɛ.

²⁰ Na Amram faa n’agya nua Yokebed waree, na ɔwoo Aaron ne Mose maa no. Na Amram mfeɛ a ɔdiiɛ yɛ mfeɛ ɔha aduasa nson.

²¹ Na Ishar mma ne: Kora, Nefeg ne Sikri.

²² Na Usiel mma ne: Misael, Elsafan ne Sitri.

²³ Na Aaron faa Aminadab babaa Elisaba a ɔyɛ Nahson nua waree, na ɔwoo Nadab, Abihu, Eleasa ne Itamar maa no.

²⁴Na Kora mma ne: Asir, Elkana ne Abiasaf; yeinom ne Kora mma mmusua.

²⁵ Na Aaron ba Eleasa faa Putiel mma mu bi waree, na ɔwoo Pinehas maa no. Yeinom ne Lewifoɔ nananom atitire sɛdeɛ wɔn mmusua teɛ.

²⁶Yeinom ne Aaron ne Mose a AWURADE ka kyerɛɛ wɔn sɛ: Monyi Israelfoɔ mfiri Misraim asase so sɛdeɛ wɔn dɔm teɛ no.

²⁷Wɔne wɔn a wɔne Misraimhene Farao kasaa sɛ wɔbɛyi Israelfoɔ afiri Misraim akorɔ no, Mose ne Aaron korɔ no ara nie.

²⁸Na da a AWURADE ne Mose kasaa Misraim asase soɔ no,

²⁹ɔka kyerɛɛ no sɛ: Mene AWURADE, ka deɛ mɛka makyerɛ woɔ nyinaa kyerɛ Misraimhene Farao.

³⁰ Na Mose kaa no AWURADE anim sɛ: Hwɛ, ano mu momonoto ne me, na ɛbɛyɛ dɛn na Farao bɛtie me?