Read Twi Asante Eksodɔs 8 Bible Online

Eksodɔs 8 - Twi Asante bible

Eksodɔs 8

¹ Na AWURADE ka kyerɛɛ Mose sɛ: Kɔ Farao nkyɛn kɔka kyerɛ no sɛ: Sɛ AWURADE seɛ nie: Ma me man no nkɔ nkɔsom me.

²Na sɛ woampene amma wɔankɔ a, hwɛ, mede mponkyerɛne bɛha w’asase nyinaa.

³Na asuo no bɛdɔre mponkyerɛne pii, na wɔafoforo aba wo fie ne wo dabekyire, wo mpa so, wo nkoa afie, wo nkurɔfoɔ mu, w’afononoo mu ne wo mmɔre nkodoɔ mu.

⁴Na wo ne wo manfoɔ ne wo nkoa nyinaa so na mponkyerɛne no bɛforo aba.

⁵Na AWURADE ka kyerɛɛ Mose sɛ: Ka kyerɛ Aaron sɛ: Fa wo poma no, na tene wo nsa wɔ nsubɔntene, asuasu, ne ntareɛ so, na ma mponkyerɛne mmra Misraim asase nyinaa so.

⁶Na Aaron tenee ne nsa wɔ Misraim nsuo so, na mponkyerɛne ba bɛkataa Misraim asase nyinaa so.

⁷ Na akɔmfoɔ no de wɔn asumansɛm no yɛɛ saa ara maa mponkyerɛne foro baa Misraim asase so.

⁸ Ɛnna Farao frɛɛ Mose ne Aaron kaa sɛ: Mompa AWURADE kyɛw na ɔnyi mponkyerɛne no mfiri me ne me man so, na mɛma ɔman no akɔ akɔbɔ afɔdeɛ ama AWURADE.

⁹Na Mose ka kyerɛɛ Farao sɛ: Wo ara kyerɛ me da ko a ɛnkɔsie na mempa kyɛw memma wo ne wo nkoa ne wo man, na wɔnyi mponkyerɛne no mfiri wo ne wo fie so, na wɔnka asuo no nko ara mu.

¹⁰ Na ɔbuaa sɛ: Ɔkyena. Na Mose kaa sɛ: Ɛnyɛ sɛ deɛ woaka no, na woahunu sɛ obiara biara nni hɔ a ɔte sɛ AWURADE yɛn Nyankopɔn.

¹¹Na mponkyerɛne no bɛfiri wo ne wo fie ne wo nkoa ne wo man so; asuo no mu nko ara na wɔbɛka.

¹²Na Mose ne Aaron firii Farao anim kɔe. Na Mose teaa mu frɛɛ AWURADE wɔ mponkyerɛne a ɔde aba Farao soɔ no ho.

¹³Na AWURADE yɛɛ sɛdeɛ Mose kaeɛ no, na mponkyerɛne no wuwui, afie mu ne adihɔ ne wiram.

¹⁴Na wɔboaboaa wɔn ano akuakuo, na asase no so bɔnee.

¹⁵ Na Farao hunuu sɛ wanya ahotɔ no, ɔpirim n’akoma, na wantie wɔn, sɛdeɛ AWURADE kaeɛ no.

¹⁶Na AWURADE ka kyerɛɛ Mose sɛ: Ka kyerɛ Aaron sɛ: Tene wo poma no bɔ asase so mfuturo na ɛnnane edwie wɔ Misraim asase nyinaa so.

¹⁷Na wɔyɛɛ saa, na Aaron tenee ne nsa de poma no bɔɔ asase so mfuturo, na ɛdanee edwie wɔ nnipa ne mmoa so. Na asase so mfuturo nyinaa danee edwie Misraim asase nyinaa so.

¹⁸ Na akɔmfoɔ no de wɔn asumansɛm yɛɛ saa ara sɛ wɔrema edwie aba, nanso wɔantumi. Na edwie no baa nnipa ne mmoa so.

¹⁹ Ɛnna akɔmfoɔ no ka kyerɛɛ Farao sɛ: Nyankopɔn nsateaa nie. Na Farao akoma pirimii ara na wantie wɔn, sɛdeɛ AWURADE kaeɛ no.

²⁰ Na AWURADE ka kyerɛɛ Mose sɛ: Tua anɔpahema kɔgyina Farao anim; berɛ a ɔrefiri adi aba nsuo no ano; na ka kyerɛ no sɛ: Sɛ AWURADE seɛ nie: Ma me man no nkɔ na wɔnkɔsom me.

²¹Na sɛ woremma me man no nkɔ a, hwɛ, mɛma nwansena ahodoɔ aba wo ne wo nkoa ne wo man ne w’afie so, na nwansena no bɛyɛ Misraimfoɔ afie mu ne asase a wɔte soɔ no so amaama.

²² Na mɛhyɛ Gosen asase a me man te soɔ no nso da no, na nwansena no amma hɔ, na wode ahunu sɛ mene AWURADE wɔ asase nyinaa so.

²³Na mede ɔhyeɛ bɛto me man ne wo man ntam; ɔkyena na nsɛnkyerɛnneɛ yi bɛba.

²⁴Na AWURADE yɛɛ saa. Na nwansena a wɔdɔɔso pii baa Farao fie ne ne nkoa afie ne Misraim asase nyinaa so. Na nwansena no nti asase no so sɛee.

²⁵Na Farao frɛɛ Mose ne Aaron kaa sɛ: Monkɔ nkɔbɔ afɔdeɛ mma mo Nyankopɔn wɔ asase yi so.

²⁶ Na Mose kaa sɛ: Ɛmfata sɛ wɔyɛ no saa, ɛfiri sɛ Misraim akyiwadeɛ na yɛde bɛbɔ afɔdeɛ ama AWURADE yɛn Nyankopɔn. Hwɛ, sɛ yɛde Misraim akyiwadeɛ bɔ afɔdeɛ wɔ wɔn anim a, wɔrensi yɛn aboɔ anaa?

²⁷ Yɛbɛnante nnansa kwan akɔ ɛserɛ so, na yɛakɔbɔ afɔdeɛ ama AWURADE yɛn Nyankopɔn, sɛdeɛ waka akyerɛ yɛn no.

²⁸ Na Farao kaa sɛ: Me deɛ, mɛma mo kwan na moakɔbɔ afɔdeɛ ama AWURADE mo Nyankopɔn wɔ ɛserɛ so, na akyirikyiri nko na monnkorɔ; mompa kyɛw mma me.

²⁹Na Mose kaa sɛ: Hwɛ, merebɛfiri wo nkyɛn makɔ makɔpa AWURADE kyɛw na nwansena no afiri Farao ne ne nkoa ne ne man so ɔkyena; na nkontompo nko ara na Farao nntwa bio sɛ ɔremma ɔman no nkɔ nkɔbɔ afɔdeɛ mma AWURADE.

³⁰ Ɛnna Mose firii Farao anim kɔ kɔpaa AWURADE kyɛw.

³¹Na AWURADE yɛɛ deɛ Mose kaeɛ no, na ɔyii nwansena no firii Farao ne ne nkoa ne ne man so; anka baako mpo.

³² Na Farao pirim n’akoma saa berɛ yi nso, na wamma ɔman no ankɔ.